ഫലങ്ങളില്‍ ജലാംശം ധാരാളമുള്ള, സമ്മര്‍ ഫ്രൂട്ട് എന്നു പറയാവുന്ന ഒന്നാണ് തണ്ണിമത്തന്‍. മധുരമുള്ള, ദാഹവും വിശപ്പും പെട്ടെന്ന് ശമിപ്പിയ്ക്കുന്ന ഈ ഫലത്തിന് ആരോഗ്യ ഗുണങ്ങള്‍ പലതാണ്.
തോടോട് ചേര്‍ന്ന വെളുത്ത ഭാഗം
നാം പൊതുവേ തണ്ണിമത്തിന്റെ ഉള്ളിലെ ചുവന്ന നിറത്തിലെ മാംസളമായ ഭാഗമാണ് കഴിയ്ക്കുക. ഇതിനാണ് മധുരവും മാര്‍ദവവും കൂടുതലും. തോടോട് ചേര്‍ന്ന് വെളുത്ത ഭാഗം ഒഴിവാക്കുന്നതാണ് പതിവ്. എന്നാല്‍ തണ്ണിമത്തിന്റെ തോടോട് ചേര്‍ന്ന വെളുത്ത ഭാഗം ഏറെ ഗുണങ്ങള്‍ ഉള്ള ഒന്നാണ്.
അതായത് ഉള്‍ഭാഗത്തെ തോടിന്റെ ഭാഗം എന്നു തന്നെ പറയാം. മാംസളമായ ഭാഗത്തോട് ചേര്‍ന്നു നില്‍ക്കുന്ന വെളുത്ത ഭാഗമാണ് കഴിയ്‌ക്കേണ്ടത്. ഇതിന് ഏറെ ഗുണങ്ങളുണ്ടെന്ന് ന്യൂട്രീഷനിസ്റ്റ് പറയുന്നു.
കൂടുതല്‍ നാരുകള്‍
കൂടുതല്‍ നാരുകള്‍ അടങ്ങിയതാണ് തണ്ണിമത്തന്‍തോട്. അതായത് ഉള്ളിലെ വെളുത്ത ഭാഗം. ഈ നാരുകള്‍ രക്തത്തിലെ ഗ്ലൂക്കോസ് തോത് പെട്ടെന്ന് ഉയരുന്നത് തടയുന്നു. വാസ്തവത്തില്‍ തണ്ണിമത്തനില്‍ ധാരാളം മധുരമുണ്ട്. ഇത് കൂടുതല്‍ കഴിയ്ക്കുന്നത് പ്രമേഹ രോഗികള്‍ക്ക് അത്ര നല്ലതുമല്ല.
എന്നാല്‍ ചുവന്ന ഭാഗത്തോടൊപ്പം വെളുത്ത ഭാഗം കഴിയ്ക്കുന്നത് രക്തത്തിലെ ഷുഗര്‍ തോത് പെട്ടെന്ന് ഉയരുന്നത് തടയാന്‍ സാധിയ്ക്കുന്ന ഒന്നാണ്. ഈ നാരുകള്‍ കൂടുതല്‍ ഷുഗര്‍ ശരീരം വലിച്ചെടുക്കുന്നത് തടയാനും നല്ലതാണ്.
തണ്ണിമത്തന്‍ തോട്
കുടല്‍ ആരോഗ്യത്തിന്
ഇതിലെ ഫൈബര്‍ കുടല്‍ ആരോഗ്യത്തിന് നല്ലതാണ്. വിശപ്പ് പെട്ടെന്ന് കുറയ്ക്കാന്‍, വയര്‍ നിറഞ്ഞതായി തോന്നാന്‍ സഹായിക്കുന്നതിനാല്‍ തടി നിയന്ത്രിയ്ക്കാന്‍ കൂടി സഹായിക്കുന്ന ഒന്നാണ് തണ്ണിമത്തന്‍ തോടിനുളളിലെ വെളുത്ത ഭാഗം.
പ്രമേഹ നിയന്ത്രണത്തിന് മാത്രമല്ല, കൊളസ്‌ട്രോള്‍ കുറയ്ക്കാനും ഇത് സഹായിക്കുന്നു. പൊട്ടാസ്യവും മഗ്നീഷ്യവും ധാരാളം അടങ്ങിയ ഈ തോല്‍ഭാഗം ബിപി നിയന്ത്രണത്തിനും സഹായിക്കുന്നുവെന്ന ഗുണം കൂടിയാണ്.
അമിനോ ആസിഡുകള്‍
ശരീരത്തിന് ആവശ്യമായ ആരോഗ്യകരമായ അമിനോ ആസിഡുകള്‍ ഇതില്‍ അടങ്ങിയിട്ടുണ്ട്. എല്‍ സിട്രുലിന്‍ എന്ന അമിനോ ആസിഡാണ് ഇതില്‍ ഉള്ളത്. ഇത് ബിപിയും ഹൈപ്പര്‍ ടെന്‍ഷനും കുറയ്ക്കാന്‍ മാത്രമല്ല, അത്‌ലറ്റിക് കഴിവുകള്‍ വര്‍ദ്ധിപ്പിയ്ക്കാനും സഹായിക്കുന്നു. നമ്മുടെ ശരീരത്തിലെ കിഡ്‌നി ഈ എല്‍ സിട്രുലിന്‍ എല്‍ ആര്‍ജിനൈന്‍ ആയി മാറ്റുന്നു.
ഇതു പോലെ നൈട്രിക് ഓക്‌സൈഡായും ഇത് മാറ്റുന്നു. നൈട്രിക് ഓക്‌സൈഡ് ഞരമ്പുകളും നാഡികളുമെല്ലാം കൃത്യമായി പ്രവര്‍ത്തിയ്ക്കാന്‍ സഹായിക്കുന്നു. ഇത് രക്തപ്രവാഹം സുഗമമായി നടക്കാന്‍ സഹായിക്കുന്നു. ഹൃദയാരോഗ്യത്തിന് ഇതേറെ ഗുണകരമാണ്.
ചര്‍മ സംരക്ഷണത്തിന്
ചുവന്ന ഭാഗത്തേക്കാള്‍ തണ്ണിമത്തന്റെ വെളുത്ത തോട് ഭാഗത്ത് ആന്റി ഓക്‌സിഡന്റുകള്‍ കൂടുതലുണ്ട്. ഇവ വാര്‍ദ്ധക്യത്തിന് കാരണമാകുന്ന ഫ്രീ റാഡിക്കലുകളുടെ ഓക്‌സിഡേറ്റീവ് നാശം തടയുന്നു. ഇതിലൂടെ ചര്‍മ സംരക്ഷണത്തിന് സഹായിക്കുകയും ചെയ്യുന്നു. ചര്‍മാരോഗ്യത്തിനും ഇത് നല്ലതാണെന്നര്‍ത്ഥം.
പുരുഷാരോഗ്യത്തിന് സഹായിക്കുന്ന സിങ്ക് തോടിന്റെ ഈ ഭാഗത്ത് ധാരാളമുണ്ട്. കിഡ്‌നി ആരോഗ്യത്തിനും ഈ വെളുത്ത ഭാഗം നല്ലതു തന്നെയാണ്. തണ്ണിമത്തന്റെ വെളുത്ത ഭാഗവും കുരുക്കളുമെല്ലാം ഒരുപോലെ ഉപകാരപ്രദമാണെന്നര്‍ത്ഥം.