പലവിധ പകര്ച്ചവ്യാധികള് തുടര്ച്ചയായി ബുദ്ധിമുട്ടിച്ചുക്കൊണ്ടിരിക്കുകയയാണ്. വര്ദ്ധിച്ചുവരുന്ന കുരങ്ങുപനിയും ഏറ്റവും പുതിയതായി രാജ്യത്ത് പടര്ന്നുക്കൊണ്ടിരിക്കുന്ന തക്കാളിപ്പനി കേസുകളും ഇതിന് ആക്കം കൂട്ടുകയും ചെയ്തു. ഇപ്പോള് രാജ്യത്തുടനീളം പല ആളുകളിലും ഈ രോഗങ്ങള് കണ്ടെത്തിക്കൊണ്ടിരിക്കുന്നു. അതുക്കൊണ്ട് തന്നെ കുരങ്ങുപനിയുടെയും തക്കാളിപ്പനിയുടെയും പല ലക്ഷണങ്ങളും തമ്മിലുള്ള സാമ്യം സംബന്ധിച്ച് ആശങ്കയും വര്ദ്ധിച്ചുവരികയാണ്. കുരങ്ങുപനിയും തക്കാളിപ്പനിയും എന്താണെന്ന് അറിയാം.
മങ്കിപോക്സ്, വൈറസ് അണുബാധ മൂലമുണ്ടാകുന്ന ഒരു വൈറല് സൂനോട്ടിക് രോഗമാണ് (മൃഗങ്ങളില് നിന്നും മനുഷ്യരിലേക്ക് പകരുന്ന അസുഖങ്ങള്) മങ്കിപോക്സ്. മയോ ക്ലിനിക്ക് പറയുന്നതനുസരിച്ച്, ഇത് സാധാരണയായി എലി വര്ഗ്ഗങ്ങള് അല്ലെങ്കില് കുരങ്ങുകള് പോലുള്ള മനുഷ്യേതര പ്രൈമേറ്റുകളെ ബാധിക്കുന്നു. എന്നിരുന്നാലും, ഇത് മനുഷ്യരിലും സംഭവിക്കാം. യുഎസ് സെന്റര്സ് ഫോര് ഡിസീസ് കണ്ട്രോള് ആന്ഡ് പ്രിവന്ഷന് (സിഡിസി) പ്രകാരം 2022-ല് മങ്കിപോക്സ് പൊട്ടിപ്പുറപ്പെടുന്നതിന് മുമ്പ്, പല മധ്യ, പടിഞ്ഞാറന് ആഫ്രിക്കന് രാജ്യങ്ങളിലെ ആളുകളിലും ഈ അണുബാധ റിപ്പോര്ട്ട് ചെയ്യപ്പെട്ടിട്ടുണ്ട്.
ഹാന്ഡ് ഫൂട്ട് ആന്ഡ് മൗത്ത് ഡീസസ് (HFMD- Hand, Foot and Mouth Disease) ആണ് തക്കാളിപ്പനി (Tomato flu or Tomato fever) എന്ന് അറിയപ്പെടുന്നത്. ശരീരത്തിലുടനീളം തിണര്പ്പുകളും കുമിളകളും ഉള്ള ഒരു അപൂര്വ രോഗമാണ്. ഈ രോഗം ബാധിച്ചാല്, ശരീരത്ത് തക്കാളിയോട് സാമ്യമുള്ള ചുവന്ന കുമിളകളില് ഉണ്ടാകുന്നതിനെ തുടര്ന്നാണ് ഇതിന് തക്കാളിപ്പനി എന്ന പേര് ലഭിച്ചത്.
രോഗലക്ഷണങ്ങളിലെ വ്യത്യാസങ്ങള്
മങ്കിപോക്സ് ലക്ഷണങ്ങള് സാധാരണയായി വൈറസ് ബാധിച്ച് 3 ആഴ്ചയ്ക്കുള്ളില് ആരംഭിക്കുകയും 2-4 ആഴ്ച വരെ നീണ്ടുനില്ക്കുകയും ചെയ്യും. സിഡിസി പറയുന്ന ചില സാധാരണ ലക്ഷണള് ഇതാണ്: പനി, വിറയല്, വീര്ത്ത ലിംഫ് നോഡുകള്, ക്ഷീണം, പേശി വേദനയും നടുവേദനയും, തലവേദന, ശ്വാസകോശ ലക്ഷണങ്ങള്, തിണര്പ്പ്.
തക്കാളിപ്പനിയുടെ ലക്ഷണങ്ങള് പനി, സന്ധി വേദന, നീര്വീക്കം, ശരീരവേദന, ക്ഷീണം തുടങ്ങിയവയാകാം. തടിപ്പുകളും (കുമിളകള്) ഉണ്ടാകാം. നിലവില്, തക്കാളിപ്പനി കുട്ടികള്ക്കിടയിലാണ് കൂടുതലും വ്യാപകം. രോഗത്തിന്റെ കാരണമൊന്നും അറിയില്ല.
തക്കാളിപ്പനി തടിപ്പും കൂടാതെ കുരങ്ങുപനി തടിപ്പും എങ്ങനെ തിരിച്ചറിയാം?
കുരങ്ങുപനി തടിപ്പിനെ സംബന്ധിച്ചിടത്തോളം, ഇത് തുടക്കത്തില് കുരുകള് പോലെയോ കുമിളകള് പോലെയോ കാണപ്പെടാം. വേദനയോ ചൊറിച്ചിലോ ഉണ്ടാകാം. ഫ്ലൂ പോലുള്ള ലക്ഷണങ്ങള്ക്കൊപ്പം ആരംഭിച്ച് 1-4 ദിവസത്തിന് ശേഷം ഇത് വികസിച്ചേക്കാം.
തക്കാളി പോലെ കാണപ്പെടുന്ന ചുവന്ന കുമിളകളാണ് തക്കാളിപ്പനി അറിയപ്പെടുന്നത്. കോക്സാക്കി വൈറസ് മൂലമാണ് ഈ അസുഖം ഉണ്ടാകുന്നതെന്നാണ് വിദഗ്ദ്ധര് പറയുന്നത്. ഇത് ചര്മ്മത്തില് 4-6 മില്ലിമീറ്റര് വരെ ചെറിയ ചുവന്ന പാടുകള് ഉണ്ടാക്കുകയും പിന്നീട് ഉള്ളില് ദ്രാവകം ഉള്ള കുമിളകളായി മാറുകയും ചെയ്യുന്നു. കൈകള്, കാലുകള്, നിതംബം എന്നിവിടങ്ങളിലെ ചര്മ്മങ്ങളില് പ്രത്യക്ഷപ്പെടാം. കൊച്ചുകുട്ടികള് തമ്മിലുള്ള സമ്പര്ക്കത്തിലൂടെ ഇത് പടരുന്നു.
തക്കാളിപ്പനി കുട്ടികള്ക്കിടയില് വ്യാപകമാണ്
റിപ്പോര്ട്ടുകള് പ്രകാരം, മെയ് 6-ന് കേരളത്തിലാണ് ആദ്യത്തെ കേസ് കണ്ടെത്തിയത്. ഇപ്പോള് അഞ്ച് വയസ്സിന് താഴെയുള്ള 82 കുട്ടികളിലധികം ഇതുവരെ തക്കാളിപ്പനി കണ്ടെത്തിയിട്ടുണ്ട്. കേസുകളുടെ എണ്ണം വര്ദ്ധിക്കുന്ന സാഹചര്യത്തില്, ഉത്തര്പ്രദേശ് സര്ക്കാര് തക്കാളിപ്പനിയെക്കുറിച്ച് ഒരു നിര്ദ്ദേശം നല്കിയിരുന്നു.
അതുപ്രകാരം പറയുന്നത് - ''പ്രതിരോധത്തിനുള്ള ഏറ്റവും നല്ല കാര്യം ശരിയായ ശുചിത്വവും പരിസര ശുചിത്വവും പാലിക്കുക എന്നതാണ്. പനിയോ കുമിള ലക്ഷണങ്ങളോ ഉള്ള മറ്റ് കുട്ടികളെ കെട്ടിപ്പിടിക്കുകയോ തൊടുകയോ ചെയ്യരുതെന്ന് മാതാപിതാക്കള് കുട്ടികളോട് പറയണം'.'
കൂടാതെ, തക്കാളിപ്പനിക്ക് മറ്റ് വൈറല് അണുബാധകള്ക്ക് (പനി, ക്ഷീണം, ശരീരവേദന, തിണര്പ്പ്) സമാനമായ ലക്ഷണങ്ങള് ഉണ്ടെന്ന് വ്യക്തമാക്കിയിട്ടുണ്ട്. എന്നാല് സാര്സ് കോവ് 2 (SARS-CoV2), മങ്കിപോക്സ്, ഡെങ്കിപ്പനി അല്ലെങ്കില് ചിക്കുന്ഗുനിയ എന്നിവയുമായി ബന്ധപ്പെട്ടതല്ല.
കുരങ്ങുപനി ബാധിക്കാന് സാധ്യത കൂടുതലുള്ളത്?
മങ്കിപോക്സ് അണുബാധ ആരെയും ബാധിക്കാം. എന്നിരുന്നാലും, കുരങ്ങുപനിയുടെ പോലെ തോന്നിക്കുന്ന ചൊറിച്ചില് ഉള്ളവരുമായി അടുത്തിടപഴകുന്നവര്, രോഗം ബാധിച്ച മൃഗവുമായോ വ്യക്തിയുമായോ സമ്പര്ക്കം പുലര്ത്തിയ വസ്ത്രങ്ങള്, ഷീറ്റുകള്, പുതപ്പുകള് അല്ലെങ്കില് മറ്റ് വസ്തുക്കള് പങ്കിടുന്നവര് അല്ലെങ്കില് ആലിംഗനം ഉള്പ്പെടെയുള്ള പ്രവര്ത്തനങ്ങളില് ഏര്പ്പെടുന്നവര്, കുരങ്ങുപനി ബാധിച്ച ഒരാളുമായി ചുംബിക്കുകയോ ലൈംഗിക ബന്ധത്തിലേര്പ്പെടുകയോ ചെയ്താല്, ഈ രോഗം പിടിപെടാനുള്ള സാധ്യത കൂടുതലാണ്.
തക്കാളിപ്പനിക്കും കുരങ്ങുപനിയ്ക്കുമുള്ള ചികിത്സ
കുരങ്ങുപനിയും തക്കാളിപ്പനിയും ജീവന് അപകടപ്പെടുത്തുന്ന അവസ്ഥയല്ലെന്നും രോഗലക്ഷണങ്ങള് വീട്ടില് തന്നെ, ഐസൊലേഷനില് കൈകാര്യം ചെയ്യാമെന്നും വിദഗ്ധര് അഭിപ്രായപ്പെടുന്നു.
കുരങ്ങുപോക്സിന്റെ രോഗശാന്തിയുടെയും ദൈര്ഘ്യം 2 മുതല് 4 ആഴ്ച വരെ എടുത്തേക്കാം.
തക്കാളിപ്പനിയുടെ കാര്യത്തില്, മറ്റ് വൈറല് അണുബാധകളുടേതിന് സമാനമാണ് ചികിത്സ, കൃത്യസമയത്ത് രോഗിയെ ഐസൊലേഷനില് ഇരുത്തുക, ധാരാളം വെള്ളവും പഴച്ചാറുകളും ഒക്കെ കുടിക്കാന് നല്കുക, ആരോഗ്യകരമായ ഭക്ഷണം കഴിക്കുക, ഡോക്ടര്മാര് നിര്ദ്ദേശിക്കുന്ന മരുന്നുകള് കഴിക്കുക.
ഈ രോഗങ്ങള്ക്കെതിരെ ഓരോരുത്തരും പ്രതിരോധത്തിന് മുന്ഗണന നല്കേണ്ടത് പ്രധാനമാണ്. നല്ല ശുചിത്വം പാലിക്കുക, പരിസരം വൃത്തിയായി സൂക്ഷിക്കുക, രോഗലക്ഷണങ്ങള് കാണിക്കുന്ന ആരില് നിന്നും അകന്നു നില്ക്കുക.