ഗോതമ്പ് വെറുതേ കഴിച്ചാല്‍ ആരോഗ്യം കിട്ടില്ലാ, ഇത് ചെയ്യണം....

പറഞ്ഞു വരുന്നത് ഗോതമ്പിന്റെ കാര്യമാണ്. പൊതുവേ ആരോഗ്യകരമായി കണക്കാക്കുന്നതിനാല്‍ തന്നെ ഗോതമ്പ് കഞ്ഞി, ചപ്പാത്തി തുടങ്ങിയവയ്ക്ക് ഇന്നത്തെ കാലത്ത് പ്രധാന്യമേറെയാണ്. പ്രമേഹം പോലുള്ള പല രോഗങ്ങളും ഉളളവര്‍ ഇത് ഒരു നേരം ശീലമാക്കിയിട്ടുള്ളവരുമാണ്. രോഗികള്‍ മാത്രമല്ല, തടി കൂടുമെന്ന് കരുതുന്നവരും ഗോതമ്പിലേയ്ക്ക് തിരിയുന്ന കാലമാണിത്. എന്നാല്‍ ഗോതമ്പ് ആരോഗ്യകരമാക്കണമെങ്കില്‍ നാം ചെയ്യേണ്ട ചിലതുണ്ട്. പലര്‍ക്കും അറിയാത്തതാണ് ഇതെല്ലാം. നാം ഗോതമ്പ് പായ്ക്കറ്റുകളില്‍ ലഭിയ്ക്കുന്ന പൊടിയായാണ് മിക്കവാറും വാങ്ങാറ്. മുഴുവന്‍ ഗോതമ്പ് വാങ്ങി പൊടിയ്ക്കുന്നവര്‍ കുറവാണ്. എന്നാല്‍ പായ്ക്കറ്റില്‍ ലഭിയ്ക്കുന്നത് പലപ്പോഴും പോഷകങ്ങള്‍ കുറവുള്ളതാകും. ഇതിലെ തവിട് പൂര്‍ണമായും നീക്കം ചെയ്യാത്തതാകും. ഗോതമ്പ് പൊടിച്ചത് ഗോതമ്പു പൊടി, പിന്നീട് വരുന്നത് റവ, പിന്നീടു വരുന്നത് മൈദ എന്നതാണ്. അതായത് റവയും മൈദയുമെല്ലാം ഗോതമ്പിന്റെ ശുദ്ധീകരണ പ്രക്രിയയിലൂടെ ലഭിയ്ക്കുന്നവ തന്നെയാണ്. ഇതില്‍ ഗോതമ്പ് പൊടിയേക്കാള്‍ ഗുണം കുറവാണ്, നാരുകള്‍ കുറവാണ് റവയില്‍. ഇത് കഴിഞ്ഞ് ലഭിയ്ക്കുന്ന മൈദയില്‍ തീരെ നാരുകള്‍ ഇല്ല.

സങ്കീർണ്ണമായ കാർബോഹൈഡ്രേറ്റ്, പ്രോട്ടീൻ, ഫൈബർ, വിറ്റാമിൻ ബി 1, ബി 3, ബി 5, റൈബോഫ്ലേവിൻ, ഫോളേറ്റ് എന്നിവയുടെ സമൃദ്ധമായ ഉറവിടമാണ് മുഴു ഗോതമ്പ് പൊടിയും ആട്ടയും. സമ്പുഷ്ടമായ അളവിൽ കാത്സ്യം, ഇരുമ്പ് എന്നിവയും ഇതിലുണ്ട്. മൈദ, വളരെയധികം സംസ്കാരണത്തിന് വിധേയമായി വരുന്ന രൂപമാണ്. എല്ലാത്തരം ഫൈബർ, പ്രോട്ടീൻ, ധാതുക്കൾ, വിറ്റാമിനുകൾ, ആന്റിഓക്‌സിഡന്റുകൾ എന്നിവ നീക്കുന്ന വിശദമായ ഒരു സംസ്കരണ പ്രക്രിയയിലൂടെ കടന്നുവന്നതാണ് മൈദ. മൈദയിൽ നിങ്ങൾക്കായി ആകെ അവശേഷിക്കുന്നത് ശുദ്ധമായ കാർബോഹൈഡ്രേറ്റ് മാത്രമാണ്. ഗോതമ്പിനും മൈദയ്ക്കും ഇടയില്‍ നില്‍ക്കുന്ന ഗുണമാണ് റവയ്ക്കുള്ളത്. മൈദയേക്കാള്‍ അല്‍പം ഭേദം എന്നു മാത്രം പറയാം.

ഗോതമ്പിന്റെ തന്നെ ഗുണം ലഭിയ്ക്കണമെങ്കില്‍ മുഴുവന്‍ ഗോതമ്പ്, തവിടു കളയാതെ തന്നെ പൊടിച്ചത് ഉപയോഗിയ്ക്കണം. പായ്ക്കറ്റില്‍ ലഭിയ്ക്കുന്നവയ്ക്ക് ഈ ഗുണം കുറവാണ്. അതല്ലെങ്കില്‍ ഹോള്‍വീറ്റ് പോലുള്ള പൊടികള്‍ വാങ്ങണം. ഇതു പോലെ ഗോതമ്പ് പൊടിയ്‌ക്കൊപ്പം റാഗിപ്പൊടിയോ നവധാന്യപ്പൊടിയോ ചേര്‍ത്തിളക്കി ഇത് ചപ്പാത്തിയുണ്ടാക്കാനും മറ്റും ഉപയോഗിയ്ക്കുന്ന രീതിയാണ് കൂടുതല്‍ നല്ലത്. ഇതില്‍ പോഷകമൂല്യം കൂടുതലാണ്. വാങ്ങുന്ന ഗോതമ്പ് പൊടിയെ ഒരു പരിധി വരെ പോഷകമുള്ളതാക്കാന്‍ ഇതിന് സാധിയ്ക്കും. മാത്രമല്ല, റാഗിപ്പൊടിയും നവധാന്യവുമെല്ലാം തന്നെ ആരോഗ്യത്തിന് ഏറെ നല്ലതുമാണ്.

ഗോതമ്പ് ആരോഗ്യകരമായ ഭക്ഷണമെങ്കിലും എല്ലാവര്‍ക്കും ചേരുന്ന ഒന്നല്ല. ദഹന പ്രശ്‌നങ്ങളുള്ളവര്‍, സീലിയാക് രോഗമുള്ളവര്‍ എന്നിവര്‍ക്കൊന്നും ഗോതമ്പ് നല്ലതല്ല. തൈറോയ്ഡ് രോഗികള്‍ക്ക് വരെ ഇതിലെ ഗ്ലൂട്ടെന്‍ നല്ലതല്ലെന്നതാണ് വാസ്തവം. ഇതു പോലെ ചോറിന് പകരം ചപ്പാത്തി കഴിയ്ക്കുന്നവര്‍, അല്ലെങ്കില്‍ ഗോതമ്പ് കഞ്ഞി കുടിയ്ക്കുന്നവര്‍ ഇത് കൂടുതല്‍ കഴിച്ചാലും ഗുണമുണ്ടാകില്ല. ഇത് ചോറ് കഴിയ്ക്കുന്നതിന് തുല്യമായ രീതി തന്നെയായിപ്പോകും. അതായത് ഒരു കപ്പ് ചോറിന് പകരം ആറേഴ് ചപ്പാത്തി കഴിച്ചിട്ട് കാര്യമില്ലെന്നര്‍ത്ഥം. ചപ്പാത്തി കഴിയ്ക്കാന്‍ സാധിയ്ക്കാത്തവര്‍ക്ക് ഓട്‌സ്, റാഗി പോലുള്ള മറ്റ് ധാന്യങ്ങളെ ആശ്രയിക്കാം.