Peanuts: അമിതമായി നിലക്കടല കഴിക്കുന്നവരാണ് നിങ്ങളെങ്കിൽ സൂക്ഷിക്കണം

കപ്പലണ്ടി ഇഷ്ടമല്ലാത്തവരായി ആരും കാണില്ല. വൈകുന്നേര സമയങ്ങളില്‍ അല്ലെങ്കില്‍ ഒരു ദിവസത്തിന്റെ ഏത് സമയത്ത് തന്നാലും കപ്പലണ്ടി ആസ്വദിച്ച് കഴിക്കുന്നവരാണ് നമ്മളില്‍ പലരും. മാംഗനീസ്, നിയാസിന്‍ എന്നിവയാല്‍ സമ്പന്നമായ നിലക്കടലയില്‍ വിറ്റാമിന്‍ ഇ, ഫോളേറ്റ്, ഫൈബര്‍ എന്നിവ അടങ്ങിയിട്ടുണ്ട്.

മാത്രമല്ല നിങ്ങളെ ആരോഗ്യത്തോടെ ഇരിക്കാന്‍ ഇത് സഹായിക്കുന്നു. ഹൃദ്രോഗ സാധ്യത കുറയ്ക്കാനും ശരീരഭാരം നിയന്ത്രിക്കാനും രക്തത്തിലെ പഞ്ചസാരയുടെ അളവ് നിയന്ത്രിക്കാനും മെറ്റാബോളിസം കൂട്ടാനും കപ്പലണ്ടിക്ക് കഴിവുണ്ട്. പക്ഷെ അമിതമായി കപ്പലണ്ടി കഴിക്കുന്നത് വളരെയധികം പ്രശ്‌നങ്ങള്‍ക്ക് കാരണമാകുമെന്ന് അറിയാമോ?

എന്തുകൊണ്ട് ഹാനികരം?

നിലക്കടലയുടെ അമിതമായ ഉപയോഗം ഉയര്‍ന്ന കലോറിയും കൊഴുപ്പും, ആന്റി ന്യൂട്രിയന്റുകള്‍ എന്നിവയില്‍ നിന്ന് ഗുരുതരമായ പാര്‍ശ്വഫലങ്ങള്‍ ഉണ്ടാക്കും. നിലക്കടലയില്‍ അടങ്ങിയിരിക്കുന്ന ആന്റി ന്യൂട്രിയന്റുകള്‍ ശരീരത്തിലെ പോഷകങ്ങളുടെ ആഗിരണം തടയുകയും കഴിക്കുന്ന ഭക്ഷണത്തിന്റെ പോഷകമൂല്യം കുറയ്ക്കുകയും ചെയ്യുന്ന പദാര്‍ത്ഥങ്ങളാണെന്ന് പോഷകാഹാര വിദഗ്ധര്‍ പറയുന്നു.

നിലക്കടല മൂലമുണ്ടാകുന്ന മറ്റ് ചില ഗുരുതരമായ പാര്‍ശ്വഫലങ്ങളില്‍ ഇവ ഉള്‍പ്പെടുന്നു:

അമിതവണ്ണം: നിലക്കടലയില്‍ കലോറി വളരെ കൂടുതലാണ്. ഇത് അമിതമായി കഴിക്കുന്നത് ശരീരഭാരം വര്‍ധിപ്പിക്കാന്‍ കാരണമാകുമെന്നാണ് ആരോഗ്യവിദഗ്ധര്‍ പറയുന്നത്. ഒരു ഔണ്‍സില്‍ വറുത്ത നിലക്കടലയില്‍ 170 കലോറി അടങ്ങിയിട്ടുണ്ട.് നീലക്കടല അധികം കഴിക്കുന്നത് നിങ്ങളുടെ ശരീരത്തില്‍ അധിക കലോറികള്‍ ഉണ്ടാക്കാന്‍ കാരണമാകുന്നു.

Also Read: Paleo Diet: നടൻ ഭരത് കല്യാണിൻ്റെ ഭാര്യ പ്രിയദർശിനിയുടെ മരണം പാലിയോ ഡയറ്റ് മൂലമോ?

സോഡിയം കൂട്ടുന്നു: നിലക്കടലയില്‍ സോഡിയം വളരെ കൂടുതലാണ്, ഇത് നിങ്ങളുടെ രക്തസമ്മര്‍ദ്ദത്തെ ബാധിക്കും. പേശികളുടെ സങ്കോചത്തിനും നാഡീ പ്രേരണകള്‍ക്കും സഹായിക്കുന്നതിന് ശരീരത്തിന് സോഡിയം ആവശ്യമാണ്. അമിതമായ സോഡിയം രക്തക്കുഴലുകളിലേക്ക് വെള്ളം വലിച്ചെടുക്കും, ഇത് ഹൃദയത്തിന് അധിക ഭാരം ഉണ്ടാക്കുമെന്ന്് അമേരിക്കന്‍ ഹാര്‍ട്ട് അസോസിയേഷന്‍ കണ്ടെത്തിയിട്ടുണ്ട്.

പൂപ്പല്‍ മലിനീകരണത്തിന് കാരണമാകും: നിലക്കടലയില്‍ അഫ്‌ലാറ്റോക്‌സിന്‍ ഉല്‍പ്പാദിപ്പിക്കുന്ന ചില ഫംഗസുകള്‍ അടങ്ങിയിട്ടുണ്ട്. നിലക്കടല വളര്‍ത്തുകയും വിളവെടുക്കുകയും സംഭരിക്കുകയും ചെയ്യുന്ന ചൂടുള്ളതോ ഈര്‍പ്പമുള്ളതോ ആയ പ്രദേശങ്ങളില്‍ ഇത്തരത്തിലുള്ള പൂപ്പല്‍ ഉണ്ടാകാറുണ്ട്. രോഗബാധയുള്ള നിലക്കടല കഴിക്കുന്നതിലൂടെ, നിങ്ങള്‍ക്ക് അര്‍ബുദമുണ്ടാക്കുന്ന അഫ്‌ലാറ്റോക്‌സിനുകള്‍ക്ക് വിധേയമാകാം.