കാന്‍സര്‍ രോഗികള്‍ക്ക് ആശ്വാസമായി നാനോ തെറാപ്പി

ലോകത്ത് ഒാരോ വര്‍ഷവും 1.4 കോടി ജനങ്ങള്‍ കാന്‍സര്‍ രോഗത്തിന് അടിപ്പെടുകയും, അതില്‍ പകുതിയോളം പേര്‍ മരണപ്പെടുകയും ചെയ്യുന്നുവെന്നാണ് കണക്ക്. അര്‍ബുദത്തെ തടയുന്നതിനായി പല ലോകരാജ്യങ്ങളും ഇന്നും കോടികള്‍ മുടക്കി പഠനങ്ങളും ഗവേഷണങ്ങളും നടത്തിവരുന്നുണ്ട്.

അനിയന്ത്രിതമായ കോശവളര്‍ച്ചകാരണം കലകള്‍ നശിക്കുന്നുവെന്നതാണ് അര്‍ബുദത്തിന്‍റെ പ്രത്യേകത. ജീവിത ശൈലിയാണ് ഒരു പരിധിവരെ അര്‍ബുദത്തിനു കാരണമായി കണക്കാക്കപ്പെടുന്നത്. മറ്റേതൊരു രോഗത്തേയും പോലെ തുടക്കത്തിലെ കണ്ടെത്തിയാല്‍ ചികിത്സിച്ച് മാറ്റാന്‍ കഴിയുന്ന രോഗമാണ് കാന്‍സര്‍.

അര്‍ബുദ രോഗികള്‍ക്ക് ആശ്വാസമായി നാനോപാര്‍ട്ടിക്കിള്‍ ഉപയോഗിച്ചുകൊണ്ട് ഒരു പുതിയ തെറാപ്പി കണ്ടെത്തിയിരിക്കുകയാണ് ശാസ്ത്രജ്ഞര്‍. കീമോ തെറാപ്പിയേക്കാള്‍ ഫലപ്രദമാണ് നാനോ തെറാപ്പിയെന്നാണ് പറയുന്നത്.

യുകെയിലെ ഈസ്റ്റ് ആംഗ്ലിയ യൂണിവേഴ്സിറ്റിയിലെ ശാസ്ത്രജ്ഞരാണ് ഇക്കാര്യം കണ്ടെത്തിയത്. പ്രത്യേകിച്ച് സ്താനാര്‍ബുദം, പ്രോസ്റ്റേറ്റ് ക്യാന്‍സര്‍ എന്നിവ ബാധിച്ചവര്‍ക്കാണ് നാനോ തെറാപ്പി ഫലപ്രദം.

ഇത് പ്രകാരം ട്യൂമര്‍‌ വന്ന ഭാഗത്ത് നാനോപാര്‍ട്ടിക്കിളുകള്‍ വഴി നേരിട്ട് മരുന്ന് എത്തിക്കാനും ചികിത്സിക്കാനും കഴിയുമെന്നും ശാസ്ത്രജ്ഞര്‍ പറയുന്നു.
കീമോ തെറാപ്പിചെയ്യുന്നതു മൂലമുള്ള പാര്‍ശ്വ ഫലങ്ങളും ഇത് മൂലം ഒഴിവാക്കാന്‍ കഴിയുമെന്നാണ് പറയുന്നത്.