പുതുവര്‍ഷ ആഘോഷ തിമിര്‍പ്പില്‍ ഇക്കാര്യങ്ങൾ കൂടി ശ്രദ്ധിക്കാം

പുതുവര്‍ഷ പുലരി ആഘോഷിക്കുന്നതിനായി എല്ലാ നാടും നഗരവും ഒരുങ്ങിക്കഴിഞ്ഞു. സുരക്ഷ ഉറപ്പാക്കുന്നതിനായി പല സ്ഥലങ്ങളിലും പാര്‍ട്ടികള്‍ക്കും മറ്റുമെല്ലാം കര്‍ശന നിയന്ത്രണം ഏര്‍പ്പെടുത്തിയിട്ടുണ്ട്. കൊച്ചുകുട്ടികള്‍ മുതല്‍ വൃദ്ധന്മാര്‍ക്ക് വരെ പങ്കെടുക്കാന്‍ കഴിയുന്ന തരത്തിലുള്ള പാര്‍ട്ടികള്‍ക്ക് മാത്രമേ അനുമതി നല്‍കൂയെന്ന് പോലീസും വ്യക്തമാക്കി. രാത്രി 12.30 ന് ശേഷം സംഗീത വിരുന്നുകളോ പാര്‍ട്ടികളോ നടത്താന്‍ പാടില്ലെന്നും പാര്‍ട്ടികളില്‍ പോലീസ് സാന്നിധ്യം നിര്‍ബന്ധമാക്കുമെന്നും നിര്‍ദേശത്തില്‍ അറിയിക്കുന്നു. ഇക്കാര്യങ്ങളൊക്കെ നിലനില്‍ക്കെ തന്നെ ആഘോഷങ്ങൾ സുരക്ഷിതമാക്കാൻ സ്വയം ചില നിയന്ത്രണങ്ങൾ പാലിക്കേണ്ടതുണ്ട്. അവ ഏതൊക്കെയാണെന്ന് നോക്കാം

* മദ്യപിച്ച ശേഷം വാഹനമോടിക്കരുത്. അത്തരം സന്ദര്‍ഭത്തില്‍ ഒരു ഡ്രൈവറുടെ സഹായം തേടുകയോ മറ്റൊരു ടാക്സി ഏര്‍പ്പെടുത്തുകയോ ചെയ്യുക

* മദ്യ ഉപയോഗത്തിലൂടെയുള്ള റോഡ് അപകടങ്ങള്‍ ഏറ്റവും കൂടുതല്‍ നടക്കുന്ന സമയമായതിനാല്‍ രാത്രി 8മണിക്കും പുലര്‍ച്ചെ 2 മണിക്കുമിടെ റോഡിലൂടെയുള്ള കാല്‍നടയാത്ര കഴിവതും ഒഴിവാക്കുക.

* വാഹനം ഓടിക്കുന്ന വേളയില്‍ സൈക്കിള്‍ യാത്രക്കാരേയും മദ്യപിച്ചു നടക്കുന്നവരേയും പ്രത്യേകം ശ്രദ്ധിക്കണം.

* ഉയര്‍ന്ന ശബ്ദമോ കരിമരുന്ന് പ്രയോഗമോ ഉള്ള സ്ഥലങ്ങളിലേക്ക് നിങ്ങളുടെ വളര്‍ത്തു മൃഗങ്ങളെ കൊണ്ടുപോകരുത്. അവയെ വീടിനുള്ളില്‍ തന്നെ നിര്‍ത്തണം

* പ്രായപൂര്‍ത്തിയാകാത്തവര്‍ക്ക് ഒരു കാരണവശാലും മദ്യം കൊടുക്കരുത്.

* സാമൂഹ്യ മാധ്യമങ്ങളുടെ ഉപഭോഗത്തില്‍ കുറച്ച് നിയന്ത്രണം ഏര്‍പ്പെടുത്തുക.

Please mind these thing while celebrate New Year Night