2G, 3G ഫോണുകളുടെ അമിത ഉപയോഗം ക്യാന്‍സര്‍ സാധ്യത കൂട്ടും

അമിതമായി സ്‍മാര്‍ട്ട്ഫോണുകള്‍ ഉപയോഗിക്കുന്നത് ആരോഗ്യ പ്രശ്‍നങ്ങള്‍ ഉണ്ടാക്കുമെന്നത് പുതിയ തിരിച്ചറിവല്ല. 2G, 3G സെല്‍ഫോണുകള്‍ ഉപയോഗിക്കുന്നത് ക്യാന്‍സര്‍ ഉണ്ടാകാനുള്ള സാധ്യത വര്‍ധിപ്പിക്കുമെന്നാണ് പുതിയ ഒരു പഠനത്തില്‍ തിരിച്ചറിഞ്ഞത്. അമേരിക്കയിലെ നാഷണല്‍ ഇന്‍സ്റ്റിറ്റ്യൂട്ട് ഓഫ് ഹെല്‍ത്ത് എന്ന സര്‍ക്കാര്‍ ആരോഗ്യ സംഘടനയുടെ കീഴിലുള്ള നാഷണല്‍ ടോക്സിക്കോളജി പ്രോഗ്രാം (NTP) ആണ് 2ജി, 3ജി ഫോണുകളെക്കുറിച്ച് മുന്നറിയിപ്പ് നല്‍കുന്നത്.

റേഡിയോ ഫ്രീക്വന്‍സി റേഡിയേഷന്‍ (RFR) ഉപയോഗപ്പെടുത്തുന്ന 2ജി, 3ജി ഫോണുകളിലാണ് അപകടസാധ്യത കൂടുതല്‍. ഹൃദയ ട്യൂമറുകള്‍, തലച്ചോറ്, അഡ്രിനാലിന്‍ ഗ്രന്ഥി എന്നിവിടങ്ങളാണ് ആര്‍എഫ്‍ആര്‍ മൂലമുള്ള ക്യാന്‍സര്‍ കൂടുതലുണ്ടാകുന്നത്.

ഇതില്‍ ഹൃദയത്തിലുണ്ടാകുന്ന ട്യൂമറുകള്‍ മനുഷ്യരില്‍ വളരെ അപൂര്‍വമാണെന്നും പഠനം പറയുന്നു. എലികളിലാണ് ഗവേഷണം നടന്നത്. അതുകൊണ്ടുതന്നെ പൂര്‍ണമായും പഠനഫലം മനുഷ്യരെ ബാധിക്കുമെന്ന് കരുതാനാകില്ല. - എന്‍ടിപി പുറത്തിറക്കിയ വാര്‍ത്താക്കുറിപ്പ് പറയുന്നു.

ഫോണ്‍ ഏറ്റവും അധികം ബന്ധപ്പെടുന്ന മനുഷ്യകോശങ്ങളെ അനുസരിച്ച് മാത്രമേ ക്യാന്‍സര്‍ സാധ്യത മനസിലാക്കാന്‍ കഴിയൂ. ചെറിയ ജീവികള്‍ ആയതുകൊണ്ട് എലികളുടെ ശരീരം മുഴുവന്‍ ആര്‍എഫ്‍ആര്‍ ബാധിച്ചിരുന്നു.

ദിവസം ഒമ്പത് മണിക്കൂര്‍വരെയുള്ള റേഡിയേഷന്‍ നിലകളാണ് പഠനത്തില്‍ വന്നത്. ഇതേ വ്യത്യാസങ്ങള്‍ ഉള്ളത് കൊണ്ടു തന്നെ മനുഷ്യരുടെ കാര്യത്തില്‍ ഇത് പ്രവചിക്കാന്‍ സാധിക്കില്ലെന്നാണ് കരുതുന്നത്. അമേരിക്കയിലെ ആരോഗ്യകാര്യ വിഭാഗമായ ഫുഡ്‍ ആന്‍ഡ്‍ ഡ്രഗ്‍ അഡ്‍മിനിസ്ട്രേഷന്‍, പഠനം തള്ളിക്കളഞ്ഞു.

മൃഗങ്ങളിലെ റേഡിയേഷന്‍ തോത് അനുസരിച്ച് മനുഷ്യരില്‍ ഉണ്ടാകാനിടയുള്ള മാറ്റങ്ങള്‍ പഠിക്കാനാകില്ലെന്നാണ് അവരുടെ നിലപാട്. പുതിയ പഠനം മൊബൈല്‍ഫോണ്‍ റേഡിയേഷനെക്കുറിച്ചുള്ള ചര്‍ച്ചകളില്‍ പ്രധാനമാണെങ്കിലും അതേ അര്‍ഥത്തില്‍ സ്വീകരിക്കാനോ ഒരു തീരുമാനം എടുക്കാനോ കഴിയില്ലെന്നാണ് എഫ്‍ഡിഎ നിലപാട്.