നഖം കടിക്കുന്ന ശീലമുണ്ടോ...ഇൗ രോഗങ്ങളെല്ലാം നിങ്ങളോടൊപ്പമുണ്ട്

പലര്‍ക്കു ഒഴിവാക്കാന്‍ കഴിയാത്ത പല ശീലങ്ങളുമുണ്ടാവാം. പ്രായഭേദമന്യേ മിക്കവരിലും കണ്ടുവരുന്ന ഒരു ദുശ്ശീലമാണ് നഖം കടിക്കൽ. വിരസതയും മാനസിക സമ്മർദവുമാണ് നഖംകടിക്കുന്നതിനു പിന്നിലെ പ്രധാന കാരണം. ആശങ്കയും ഏകാന്തതയും ചിലരെ ഈ ശീലത്തിലേക്കു തളളിവിടുന്നുവെന്നു തെളിഞ്ഞിട്ടുണ്ട്. കാരണം എന്തായാലും നഖംകടി കൊണ്ടുണ്ടാവുന്ന ദൂഷ്യഫലങ്ങള്‍ ഏറെയാണ്.

അണുബാധ

നഖം കടി കാരണം അണുബാധ ഉണ്ടായേക്കാം. സാൽമോണല്ല, ഇ–കോളി തുടങ്ങിയ ബാക്ടീരിയകളുടെ വാസസ്ഥലമാണ് നഖം. നഖം കടിക്കുമ്പോൾ ഇവ വായ്ക്കുള്ളിലാവുന്നു. ഇത് എളുപ്പത്തില്‍ പകര്‍ച്ചവ്യാധികളെ ക്ഷണിച്ചുവരുത്തുകയും ചെയ്യും.

ദന്ത പ്രശ്നങ്ങള്‍

പല്ലിന്റെ താഴത്തെയും മുകളിലത്തെയും നിരകൾ തമ്മിലുള്ള അന്തരത്തിന് നഖംകടി കാരണമാകുന്നു.

നഖത്തിനു ചുററും അണുബാധ

നഖത്തിനു ചുറ്റുമുണ്ടാകുന്ന അണുബാധയാണ് നഖം കടിക്കുന്നവരില്‍ കണ്ടു വരുന്ന മറ്റൊരു രോഗം. നഖം കടിക്കുമ്പോൾ ബാക്ടീരിയ, യീസ്റ്റ്, മറ്റു സൂക്ഷ്മജീവികൾ എന്നിവ ചെറിയ മുറിവുകളിലൂടെയും പൊട്ടലുകളിലൂടെയും ഉള്ളില്‍ക്കയറുന്നു . ഇത് നഖത്തിനു ചുറ്റും പഴുപ്പ് വരുന്നതിനു കാരണമാവുന്നു

മുറിവുണ്ടാവാന്‍ സാധ്യത

ഇത്തരം ശീലമുള്ളവർ പല്ലുപയോഗിച്ചായിരിക്കും വളർന്നുവരുന്ന നഖം മുറിക്കുക. ഇതുമൂലം പലപ്പോഴും മുറിവുകൾ ഉണ്ടാവാനുളള സാധ്യതയുമുണ്ട്

പനിയും ജലദോഷവും

പനിക്കും ജലദോഷത്തിനുമൊക്കെ കാരണമാകുന്ന രോഗാണുക്കൾ ഉള്ളിൽ പ്രവേശിക്കുന്നതിന് ഈ ശീലം കാരണമാകും. ഹെപ്പറ്റൈറ്റിസ് ബി പോലുള മാരക രോഗാവസ്ഥയ്ക്കും നഖം കടി കാരണമായേക്കാം.