വെള്ളം നന്നായി കുടിച്ച് ശീലിച്ചോളൂ! മടിപിടിച്ചാൽ ഇതായിരിക്കും ഫലം

Authored byഅഞ്ജലി എം സി | Samayam Malayalam 21 Jan 2023, 11:33 am

നമ്മളുടെ ശരീരം കൃത്യമായി പ്രവർത്തിക്കണമെങ്കിൽ നന്നായി വെള്ളം കുടിക്കേണ്ടത് അനിവാര്യമാണ്. ഒരു ദിവസം കുറഞ്ഞത് 3 ലിറ്റർ വെള്ളം കുടിക്കണം എന്നാണ് പറയുന്നത്.

side effects of not drinking enough water — വെള്ളം നന്നായി കുടിച്ച് ശീലിച്ചോളൂ! മടിപിടിച്ചാൽ ഇതായിരിക്കും ഫലം

എന്നാൽ, പലർക്കും വെള്ളം കുടിക്കാൻ മടിയാണ്. നമ്മൾ കൃത്യമായി വെള്ളം കുടിക്കാതിരുന്നാൽ അത് ഏതെല്ലാം വിധത്തിൽ ശരീരത്തെ ബാധിക്കുന്നു എന്ന് നോക്കാം.

വെള്ളം നന്നായികുടിച്ചില്ലെങ്കിൽ

നമ്മളുടെ ശരീരത്തിന്റെ 70% വെള്ളമാണ്. നമ്മൾ വെള്ളം കൃത്യമായി കുടിക്കാതിരിക്കുമ്പോൾ അത് ശരീരത്തിന്റെ മൊത്തത്തിലുള്ള പ്രവർത്തനത്തെയാണ് ബാധിക്കുന്നത്.

കാലാവസ്ഥ ഏതായാലും ശരീരം നല്ലപോലെ ഹൈഡ്രേറ്റ് ചെയ്ത് നിലനിർത്തണം. എന്നാൽ, ശരീരത്തിൽ വെള്ളം കൃത്യമായ അളവിൽ ഇല്ലെങ്കിൽ ചിലപ്പോൾ അതിന് സാധിച്ചെന്ന് വരികയില്ല.

കൂടാതെ, ദഹനം കൃത്യമായി നടക്കുന്നതിനും ഇലക്ട്രോലൈറ്റ് ബാലൻസ് ചെയ്യുന്നതിനും ശരീരഭാരം നിയന്ത്രിച്ച് നിലനിർത്തുന്നതിനും ശരീരത്തിലെ മാലിന്യങ്ങളെ പുറംതള്ളുന്നതിനും വെള്ളം അനിവാര്യം തന്നെ. വെള്ളം കുടിക്കാതിരിക്കുമ്പോൾ, ഈ പ്രവർത്തനങ്ങളൊന്നും തന്നെ കൃത്യമായി നടക്കാതെ ആകുന്നു.

നിർജലീകരണം

നമ്മൾ വെള്ളം കൃത്യമായി കുടിക്കാതിരക്കുമ്പോൾ തുടക്കത്തിൽ നമുക്ക് ദാഹിക്കുന്നത് പോലെ അനുഭവപ്പെടും. എന്നാൽ, സ്ഥിരമായി വെള്ളം ആവശ്യത്തിന് കുടിക്കാതാകുന്നതോടെ നമുക്ക് ദാഹം അനുഭവപ്പെടുന്നതും കുറയാൻ തുടങ്ങും. ഇത് നിർജലീകരണത്തിന് കാരണമാകുന്നു.

നമ്മളുടെ ശരീരത്തിൽ വെള്ളം എത്രത്തോളം ആവശ്യമുണ്ട് എന്ന് ദാഹിക്കാതെ വരുമ്പോൾ നമുക്ക് സ്വയം മനസ്സിലാക്കാൻ സാധിക്കാതെ വരുന്നു. ഇത് നല്ലതല്ല. അതിനാൽ, ഒരു ദിവസം പരമാവധി 6 മുതൽ 8 ഗ്ലാസ്സ് വെള്ളം കുടിക്കാൻ ശ്രദ്ധിക്കുന്നത് നല്ലതാണ്.

മൂത്രം പോകാത്ത അവസ്ഥ

വെള്ളം നല്ലപോലെ കുടിച്ചാൽ മാത്രമാണ് നല്ലപോലെ മൂത്രവും പോവുക. മൂത്രം സത്യത്തിൽ നമ്മളുടെ ശരീരത്തിലെ മാലിന്യമാണ് വഹിക്കുന്നത്. അതിനാൽ, കൃത്യമായി നല്ല അളവിൽ മൂത്രം പോകേണ്ടതും അനിവാര്യം.

മൂത്രം കൃത്യമായി പോകണമെങ്കിൽ നന്നായി വെള്ളം കുടിക്കണം. നമ്മൾ വെള്ളം കുടിക്കുന്നത് കുറയുമ്പോൾ മൂത്രത്തിന്റെ നിറം മാറുകയും അതുപോലെ, അളവ് കുറയുകയും ചെയ്യുന്നു.

കൃത്യമായി ഒട്ടും വെള്ളം കുടിക്കാതെ ആകുന്നത് വൃക്കയുടെ ആരോഗ്യത്തെപോലും നശിപ്പിക്കുന്നു.
മൂത്രത്തെ മാത്രമല്ല, മലം പോകുന്നതിനും ബുദ്ധിമുട്ട് അനുഭവപ്പെടും. ഇത് മൂലക്കുരു പോലെയുള്ള ആരോഗ്യ പ്രശ്നങ്ങളിലേയ്ക്കും നയിക്കാം. അതിനാൽ, ആവശ്യത്തിന് വെള്ളം കുടിക്കാൻ ശ്രദ്ധിക്കുക.

വരണ്ട ചർമ്മം

വരണ്ട ചർമ്മം നിരവധി ചർമ്മ പ്രശ്നങ്ങളിലേയ്ക്കാണ് നിങ്ങളെ നയിക്കുക. ചൊറിച്ചിൽ, താരൻ, ചർമ്മം വിണ്ടുകീറൽ, പുകച്ചിൽ എന്നിങ്ങനെയുള്ള പലവിധ ചർമ്മ പ്രശ്നങ്ങളിലേയ്ക്ക് വരണ്ട ചർമ്മം നയിക്കുന്നുണ്ട്.

ചർമ്മം വരണ്ട് പോകാതെ, അതിനെ ഹൈഡ്രേറ്റ് ചെയ്ത് നിലനിർത്തണമെങ്കിൽ വെള്ളം നന്നായി കുടിക്കണം. അതുപോലെ, ചർമ്മത്തിലെ മാലിന്യങ്ങൾ പുറം തള്ളാൻ നന്നായി വിയർക്കേണ്ടതും അനിവാര്യം. അതിനും വെള്ളം അനിവാര്യമാണ്.

ഇത്തരം പ്രശ്നങ്ങളെ നേരിടാൻ എന്തെല്ലാം ചെയ്യാം

എന്നും നന്നായി വെള്ളം കുടിക്കുന്നുണ്ട് എന്ന് ഉറപ്പ് വരുത്താം. ഇതിനായി നിങ്ങളുടെ അടുത്ത് ഒരു ബോട്ടിൽ നിറയെ വെള്ളം നിറച്ച് കരുതാവുന്നതാണ്.

സാധാ വെള്ളം കുടിക്കുന്നതിനോടൊപ്പം നാരങ്ങ വെള്ളം, ജ്യൂസ് എന്നിവയും കുടിക്കുന്നത് നല്ലതാണ്.

ചിലർക്ക് വെള്ളം ദാഹിച്ചാലും ചിലപ്പോൾ വിശക്കുന്നത് പോലെയാണ് അനുഭവപ്പെടുക. പ്രത്യേകിച്ച് കുട്ടികൾക്ക്. അതിനാൽ, ആഹാരം കഴിക്കുന്നതിന് മുൻപ് വെള്ളം കുടിക്കുന്നത് നല്ലതാണ്.

നിങ്ങൾക്ക് നിർജലീകരണം സംഭവിച്ചാൽ, അത് ആദ്യം പ്രകടമാകുന്നത് നിങ്ങളുടെ ചർമ്മത്തിൽ തന്നെ ആയിരിക്കും. നല്ല വരണ്ട ചർമ്മമായിരിക്കും നിങ്ങൾക്ക് ലഭിക്കുന്നത്. അതിനാൽ, ചർമ്മം വരണ്ടാൽ, നന്നായി വെള്ളം കുടിക്കണം എന്നാണ് അർത്ഥം.