അടിസ്ഥാനപരമായി, മെറ്റബോളിസം എന്നത് ശരീരം ഭക്ഷണപാനീയങ്ങളെ ഊര്‍ജ്ജമാക്കി മാറ്റുന്ന പ്രക്രിയയാണ്. ഇത് എത്ര വേഗത്തിലാണോ അത്രയും വേഗത്തില്‍ കൊഴുപ്പ് ദഹിക്കും. സാവധാനത്തില്‍, നിങ്ങള്‍ കുറച്ച് കലോറി എരിച്ചുകളയുകയും ചെയ്യും. വ്യായാമം, ശരിയായ ഭക്ഷണം എന്നിവയെല്ലാമാണ് മെറ്റബോളിസം വര്‍ധിപ്പിക്കാനുള്ള മാര്‍ഗങ്ങള്‍. മെറ്റബോളിസം വര്‍ധിപ്പിക്കാന്‍ സഹായിക്കുന്ന ചില പാനീയങ്ങള്‍ നോക്കാം.
നാരങ്ങ- ഇഞ്ചി വെള്ളം
നാരങ്ങ വെള്ളത്തില്‍ ഇഞ്ചി ഇട്ട് കുടിക്കുന്നവരുണ്ട്. അമിതവണ്ണം കുറയ്ക്കാന്‍ പറ്റിയ മാര്‍ഗമാണിത്. നാരങ്ങയിലെ പല തരത്തിലുള്ള ആരോഗ്യ ഗുണങ്ങള്‍ കലോറി കുറയ്ക്കാന്‍ സഹായിക്കും. ദഹനത്തിന് വളരെയധികം സഹായിക്കുന്നതാണ് ഇഞ്ചി. പരമ്പരാഗത ചികിത്സാ രീതികളില്‍ പോലും ഇഞ്ചി വളരെയധികം ഉപയോഗിച്ചിരുന്നു. ഇഞ്ചിയില്‍ അടങ്ങിയിട്ടുള്ള ആന്റിഓക്സിഡന്റുകള്‍, ഫൈറ്റോകെമിക്കല്‍സ്, വീക്കം തടയുന്ന ആന്റി ഇന്‍ഫ്‌ലമേറ്ററി ഗുണങ്ങള്‍ എന്നിവയാണ് ഇതിനെ ഒരു ഔഷധ സസ്യമാക്കി മാറ്റുന്നത്.
ഇഞ്ചി തൊലി കളഞ്ഞ് ചെറിയ കഷ്ണങ്ങളാക്കുക. ഒരു ബ്ലെന്‍ഡറില്‍ ഇട്ടു വെള്ളവും ചേര്‍ത്ത് നന്നായി അരച്ച് എടുക്കുക. ഇത് നന്നായി ഇളക്കി ഒരു ഗ്ലാസിലേക്ക് ഒഴിക്കുക. ഇതിലേക്ക് ഒരു നാരങ്ങാനീരും വറുത്ത ജീരകപ്പൊടിയും ചേര്‍ക്കുക. നന്നായി ഇളക്കി കുടിക്കാവുന്നതാണ്.
നാരങ്ങ - ചിയ വെള്ളം
ഭാരം കുറയ്ക്കുന്നതില്‍ ചിയാ സീഡ്‌സിനുള്ള പങ്ക് വളരെ വലുതാണ്. ഇത് ഫൈബര്‍, പ്രോട്ടീന്‍ സമ്പുഷ്ടമായതാണ് ഒരു കാര്യം. നാരുകള്‍ അടങ്ങിയ ഭക്ഷണ വസ്തുക്കള്‍ വിശപ്പ് കുറയ്ക്കും. ദഹനം മെച്ചപ്പെടുത്തും. അപചയ പ്രക്രിയ ശക്തിപ്പെടുത്തും. ഇതെല്ലാം തന്നെ തടി കുറയ്ക്കാന്‍ സഹായിക്കുന്ന ഘടകങ്ങള്‍ തന്നെയാണ്. ചിയ വിത്തുകള്‍ ഈ ഗുണങ്ങള്‍ നല്‍കുന്നു.
ചിയ വിത്തുകള്‍ ഒരു കപ്പ് വെള്ളത്തില്‍ 1-2 മണിക്കൂര്‍ കുതിര്‍ക്കുക. കുതിര്‍ത്ത ചിയ വിത്ത് ഒരു ഗ്ലാസിലേക്ക് ഒഴിക്കുക, പാനീയത്തില്‍ ഒരു നാരങ്ങ പിഴിഞ്ഞ് അതില്‍ 1/2 ടീസ്പൂണ്‍ തേന്‍ ചേര്‍ക്കുക. ഇത് എല്ലാം നന്നായി യോജിപ്പിച്ച ശേഷം കുടിക്കാവുന്നതാണ്.
ജീരകം കറുവപ്പട്ട വെള്ളം
ഒരു പാനിലോ ഒരു ഗ്ലാസ് വെള്ളത്തില്‍ 4 ടീ സ്പൂണ്‍ ജീരകം 2 കറുവപ്പട്ട കഷണങ്ങള്‍ എന്നിവ ചേര്‍ത്ത് നന്നായി തിളപ്പിക്കുക. വെള്ളം നന്നായി തിളച്ച് വരുമ്പോള്‍ ചേരുവകളുടെ ഗുണങ്ങളെല്ലാം അതിന് ലഭിക്കും. ഈ വെള്ളം ഒരു ഗ്ലാസിലേക്ക് അരിച്ച് എടുക്കുക. അല്‍പ്പം നാരങ്ങ നീര് ചേര്‍ത്ത് ഇളക്കുക അല്ലെങ്കില്‍ ഈ വെള്ളം അതുപോലെ കുടിക്കാവുന്നതുമാണ്.
ഗ്രീന്‍ ടീയും പുതിനയും
വണ്ണം കുറയ്ക്കുന്നവര്‍ ഏറ്റവും കൂടുതല്‍ കുടിക്കുന്നത് ഗ്രീന്‍ ടീ ആണ്. വളരെയധികം ആരോഗ്യഗുണങ്ങളാണ് ഗ്രീന്‍ ടീയില്‍ അടങ്ങിയിരിക്കുന്നത്. ഭാരം നിയന്ത്രിക്കാന്‍ മാത്രമല്ല, കൊളസ്‌ട്രോള്‍ കുറയ്ക്കാനും ഗ്രീന്‍ ടീ വളരെയധികം സഹായിക്കും.
ഒരു ഗ്ലാസില്‍ ചൂടുവെള്ളം ഒഴിക്കുക, അതിലേക്ക് ഒരു ഗ്രീന്‍ ടീ ബാഗ് ഇട്ട് 1 മിനിറ്റ് വയ്ക്കുക. പുതിനയില, നാരങ്ങാനീര്, തേന്‍ എന്നിവ ചേര്‍ത്ത് ഇത് നന്നായി ഇളക്കുക. പുതിന ഗ്രീന്‍ ടീ വണ്ണം കുറയ്ക്കാന്‍ വളരെ മികച്ചതാണ്.