ശരീരഭാരം കുറയ്ക്കാൻ സഹായിക്കുന്ന വ്യായാമങ്ങൾ എത്ര വേണമെങ്കിലും ചെയ്യാം. എന്നാൽ നിങ്ങളുടെ ഭക്ഷണക്രമത്തിൽ കുറഞ്ഞ കലോറി ഉള്ള ഭക്ഷണങ്ങൾ ഉൾപ്പെടുത്തിയില്ലെങ്കിൽ, ശരീരഭാരം കുറയ്ക്കാനുള്ള നിങ്ങളുടെ ശ്രമങ്ങൾ ഒരിക്കലും ഫലം കാണില്ല. നിങ്ങളുടെ ഭക്ഷണക്രമവും വ്യായാമ രീതിയും ഒരുമിച്ച് സമന്വയിപ്പിക്കുമ്പോൾ മാത്രമേ നിങ്ങൾക്ക് ഉദ്ദേശിച്ച ഗുണങ്ങൾ ലഭിക്കുവാൻ സാധിക്കുകയുള്ളു.
ശരീരത്തിൽ വ്യത്യസ്ത രീതികളിൽ സ്വാധീനം ചെലുത്തുന്ന വ്യത്യസ്ത തരം കലോറികൾ ഉണ്ടെന്ന കാര്യം നിങ്ങൾക്കറിയാമോ? ഉയർന്ന കലോറി ഉള്ള ഭക്ഷണം കഴിക്കുന്നത് ശരീരഭാരം വർദ്ധിപ്പിക്കുന്നതിനും അമിതവണ്ണവുമായി ബന്ധപ്പെട്ട പ്രശ്നങ്ങൾക്കും കാരണമാകുന്നു (Weight Loss). കലോറി രഹിതമായ ഭക്ഷണങ്ങൾ പക്ഷേ പോഷകമൂല്യം കുറഞ്ഞ അളവിലോ അല്ലെങ്കിൽ ഒട്ടും ഇല്ലാത്തതോ ആയിരിക്കും.
കലോറി കുറഞ്ഞ ഭക്ഷണങ്ങൾ
കുറഞ്ഞ കലോറി അടങ്ങിയ ഭക്ഷണക്രമത്തിന്റെ സിദ്ധാന്തം ലളിതമാണ്. നിങ്ങൾ കഴിക്കുന്ന കലോറി ശരീരത്തിന് ഇന്ധനം നൽകുന്നു. കുറഞ്ഞ കലോറി ഉപഭോഗം ചെയ്യുന്നതിലൂടെ, ശാരീരിക പ്രവർത്തനങ്ങൾ നിലനിർത്തുന്നതിനായി കലോറിക്ക് പകരം ശരീരത്തിൽസംഭരിച്ച കൊഴുപ്പിനെ എരിച്ചു കളയുവാൻ നമ്മുടെ ശരീരത്തെ അനുവദിക്കുന്നു.
എന്നാൽ യഥാർത്ഥ പ്രശ്നം എവിടെയാണെന്ന് നിങ്ങൾക്കറിയാമോ? കുറഞ്ഞ കലോറി ഭക്ഷണക്രമത്തിലേക്ക് വരുമ്പോൾ, ഏത് ഭക്ഷണമാണ് തിരഞ്ഞെടുക്കേണ്ടതെന്നും ഏത് ഭക്ഷണം ഒഴിവാക്കണം എന്നതും മനസിലാക്കാൻ വളരെ പ്രയാസമാണ്.
കുറഞ്ഞ കലോറി ഉള്ള, ഒട്ടേറെ ആരോഗ്യപരമായ ഗുണങ്ങളുള്ള എട്ട് ഭക്ഷണങ്ങളുടെ ഒരു പട്ടിക നിങ്ങൾക്കായി ഇതാ:
1. വെള്ളം (0 കലോറി)
ശരീരത്തിലെ ദ്രാവകങ്ങളുടെ സന്തുലിതാവസ്ഥ നിലനിർത്താൻ വെള്ളം കുടിക്കുന്നത് സഹായിക്കുന്നു. ശരീരഭാരം കുറയ്ക്കാൻ നിങ്ങൾ കലോറി അടങ്ങിയ പാനീയത്തിന് പകരമായി വെള്ളമോ കലോറി ഇല്ലാത്ത മറ്റേതെങ്കിലും പാനീയമോ തിരഞ്ഞെടുക്കുകയും, കൂടാതെ ജലസമൃദ്ധമായ ഭക്ഷണങ്ങൾ കൂടുതലായി കഴിക്കുകയും ചെയ്താൽ അത് നിങ്ങളുടെ വിശപ്പകറ്റുകയും ഒപ്പം കലോറി ഉപഭോഗം കുറയ്ക്കാൻ സഹായിക്കുകയും ചെയ്യുന്നു. നിർജ്ജലീകരണം ചർമ്മത്തെ വരണ്ടതും ചുളിവുകളുള്ളതുമാക്കി മാറ്റുന്നു. ഈ പ്രശ്നം ശരിയായ അളവിൽ വെള്ളം കുടിക്കുന്നതിലൂടെ എളുപ്പം പരിഹരിക്കുവാൻ കഴിയും.
2. ഗ്രീൻ ടീ (5 കലോറിയിൽ താഴെ)
ശരീരഭാരം കുറയ്ക്കാൻ ശ്രമിക്കുന്ന ആളുകളിൽ മിക്കവരും ആദ്യമേ തന്നെ തിരഞ്ഞെടുക്കുന്ന ഒരു പാനീയമാണ് ഗ്രീൻ ടീ. ആന്റിഓക്സിഡന്റുകൾ, പോളിഫെനോൾസ്, ഫ്ലേവനോയ്ഡുകൾ എന്നിവ അടങ്ങിയിരിക്കുന്നതിനാൽ ഗ്രീൻ ടീ ശരീരത്തിന്റെ പ്രതിരോധശേഷി വർദ്ധിപ്പിക്കുക മാത്രമല്ല അണുബാധകളിൽ നിന്ന് നമ്മളെ സംരക്ഷിക്കുകയും ചെയ്യുന്നു. ഉത്കണ്ഠ കുറയ്ക്കുന്നതിനും ഓർമ്മശക്തിയും ശ്രദ്ധയും മെച്ചപ്പെടുത്തുന്നത് ഉൾപ്പെടെയുള്ള മറ്റ് തലച്ചോറിന്റെ പ്രവർത്തനങ്ങളെ സ്വാധീനിക്കാനും ഗ്രീൻ ടീ സഹായിക്കും.
Also read: ചായയ്ക്ക് ഇനി പുതിയ നിറം, നീല ചായ കുടിച്ചാൽ ഈ ഗുണങ്ങളും
3. വള്ളിച്ചെടികളിൽ കായ്ക്കുന്ന പച്ചക്കറികൾ (30 കലോറിയിൽ താഴെ)
വള്ളിച്ചെടികളിൽ കായ്ക്കുന്ന പച്ചക്കറികളിൽ സ്വാഭാവികമായും കലോറിയും പൂരിത കൊഴുപ്പുകളും വളരെ കുറവായിരിക്കും. ശരീരഭാരവും മെറ്റബോളിസവും നിലനിർത്താൻ ഇത് സഹായിക്കുന്നു. ഇതിൽ അടങ്ങിയിരിക്കുന്ന ബീറ്റാ കരോട്ടിൻ ആന്റിഓക്സിഡന്റിന്റെ രൂപത്തിലുള്ള വിറ്റാമിൻ എയുടെ അളവ് ദോഷകരമായ ഫ്രീ റാഡിക്കലുകളിൽ നിന്ന് കണ്ണുകളെ സംരക്ഷിക്കുന്നു.
4. പച്ച ഇലക്കറികൾ (30 കലോറിയിൽ താഴെ)
പച്ച പച്ചക്കറികളിൽ കഴിക്കാൻ പലർക്കും ഭയങ്കര മടിയാണ്. പക്ഷേ അവയാണ് യഥാർത്ഥത്തിൽ ശരീരഭാരം കുറയ്ക്കാൻ ഏറ്റവുമധികം സഹായകമായ ഭക്ഷ്യവിഭവം. ഉയർന്ന അളവിലുള്ള പച്ചക്കറി നാരുകൾ കഴിക്കുന്നത് ഹൃദയ സംബന്ധമായ രോഗങ്ങൾക്കും വൻകുടൽ കാൻസറിനുമുള്ള സാധ്യത കുറയ്ക്കുന്നു. മലബന്ധം, പ്രമേഹം, ഡൈവേർട്ടിക്യുലോസിസ്, അമിതവണ്ണം എന്നിവ പരിഹരിക്കുന്നതിനും ഇലക്കറികളിൽ അടങ്ങിയിട്ടുള്ള ഫൈബർ സഹായിക്കുന്നു.
5. പഴങ്ങൾ (40 കലോറിയിൽ താഴെ)
പഴങ്ങൾ, പ്രത്യേകിച്ച് ഓരോ കാലാവസ്ഥയ്ക്ക് അനുസരിച്ച് വളരുന്ന പഴങ്ങളുടെ കാര്യത്തിൽ നിങ്ങൾക്ക് ഒരിക്കലും തെറ്റ് പറ്റില്ല. വിറ്റാമിൻ സി, ഫ്ലേവനോയ്ഡുകൾ, ഫൈബർ തുടങ്ങിയ ഒന്നിലധികം പോഷകങ്ങൾ സിട്രസ് പഴങ്ങളിൽ അടങ്ങിയിട്ടുണ്ട്. ഇത് രക്തക്കുഴലുകൾക്ക് സംരക്ഷണം നൽകുന്നു, വീക്കം കുറയ്ക്കുന്നു, കൂടാതെ ദഹനനാളത്തിന്റെ പ്രവർത്തനം മെച്ചപ്പെടുത്തുവാനും സഹായിക്കുന്നു. ലയിക്കുന്ന ഫൈബറും ഫ്ലേവനോയിഡുകളും ശരീരത്തിൽ ആരോഗ്യകരമായ എച്ച്ഡിഎൽ കൊളസ്ട്രോൾ വർദ്ധിപ്പിക്കാനും ദോഷകരമായ എൽഡിഎൽ കൊളസ്ട്രോൾ, ട്രൈഗ്ലിസറൈഡുകൾ എന്നിവ കുറയ്ക്കാനും സഹായിക്കും.
തണ്ണിമത്തൻ 92% വെള്ളമാണെന്ന് നിങ്ങൾക്കറിയാമല്ലോ. അതിനാൽ ശരീരത്തിൽ ജലാംശം നിലനിർത്താൻ സഹായിക്കുന്നതിനുള്ള ഒരു ലളിതമായ മാർഗ്ഗമാണ് ഇവ ധാരാളം കഴിക്കുക എന്നത്. ഇതിൽ ബീറ്റാ ക്രിപ്റ്റോക്സാന്തിൻ എന്ന പ്രകൃതിദത്ത പിഗ്മെന്റ് ഉണ്ട്, ഇത് നിങ്ങളുടെ സന്ധികളെ വീക്കത്തിൽ നിന്ന് സംരക്ഷിക്കും.
Also read: ബദാം മില്ക് കുടിയ്ക്കാന് കേമം, കാരണം
6. ഇഞ്ചി, വെളുത്തുള്ളി (30 കലോറിയിൽ താഴെ)
വെളുത്തുള്ളി പതിവായി കഴിക്കുന്നത് പ്രമേഹം, ഹൃദ്രോഗം പോലുള്ള വിട്ടുമാറാത്ത രോഗങ്ങൾക്കുള്ള സാധ്യത കുറയ്ക്കുന്നതിന് നിങ്ങളെ സഹായിക്കും. കുറഞ്ഞ കലോറി ഉള്ള ഭക്ഷ്യവസ്തുവാണ് ഇഞ്ചി, ഇത് സാധാരണയായി വീക്കം മൂലമുള്ള പ്രശ്നങ്ങൾ ചികിത്സിക്കാൻ സഹായിക്കുകയും കൊളസ്ട്രോളിന്റെ അളവും രക്തം കട്ടപിടിക്കാനുള്ള സാധ്യതയും കുറയ്ക്കുകയും ചെയ്യുന്നു.
7. സൂപ്പ് (40 കലോറിയിൽ താഴെ)
ശരീരഭാരം കുറയ്ക്കാൻ വെജിറ്റബിൾ സൂപ്പ് ഒരു പ്രധാന പങ്ക് വഹിക്കുന്നു, കാരണം കുറഞ്ഞ കലോറി ഉള്ള ഭക്ഷണമെന്ന നിലയിൽ ഇത് നിങ്ങൾക്ക് ആവശ്യമായ വിറ്റാമിനുകളും ധാതുക്കളും നൽകുന്നതോടൊപ്പം നിങ്ങളുടെ വിശപ്പ് അകറ്റുകയും ചെയ്യുന്നു.
8. നാരങ്ങ (30 കലോറിയിൽ താഴെ)
നാരങ്ങയിൽ ശക്തമായ ആന്റിഓക്സിഡന്റായ വിറ്റാമിൻ സി അടങ്ങിയിട്ടുണ്ട്. കൂടാതെ, ഫ്ലേവനോയ്ഡുകൾ എന്നറിയപ്പെടുന്ന ആന്റി ഓക്സിഡന്റ് ഗുണങ്ങളുള്ള സസ്യ സംയുക്തങ്ങളുടെ സമ്പുഷ്ടമായ ഉറവിടം കൂടിയാണ് നാരങ്ങ. ഇത് വീക്കം കുറയ്ക്കുവാനും സഹായകരമാകുന്നു.
ഇപ്പോൾ നിങ്ങളുടെ കുറഞ്ഞ കലോറി അടങ്ങിയ ഭക്ഷണങ്ങളുടെ വിശദമായ വിവരങ്ങൾ ലഭിച്ച സ്ഥിതിക്ക്, ഇനി ഈ ഭക്ഷ്യവസ്തുക്കൾ നിങ്ങളുടെ ഭക്ഷണക്രമത്തിൽ ഉൾപ്പെടുത്തിക്കൊണ്ട് ശരീരഭാരം കുറയ്ക്കാനുള്ള യാത്ര കൂടുതൽ സുഗമമാക്കാം!