ഡിസംബർ അവസാനം ചൈനയിലെ വുഹാനിൽ വൈറസ് പൊട്ടിപ്പുറപ്പെട്ടത് ആരംഭിച്ചതു മുതൽ കൊറോണ വൈറസ് (കോവിഡ് -19) വാർത്തയിൽ നിറഞ്ഞിരിക്കുന്നു. ഇതിനോടകം 140 ലധികം രാജ്യങ്ങളിലേക്ക് വ്യാപിച്ച ഈ വൈറസ് ഇത് വരെ എടുത്തത് ആറായിരത്തോളം ജീവനുകളാണ്. ഇന്ത്യയിൽ ഇതുവരെ 115 കേസുകൾ സ്ഥിരീകരിച്ചിട്ടുണ്ട്. കേരളത്തിൽ മാത്രം ഇതുവരെ 21 പേർ രോഗബാധിതരാണെന്ന് ആരോഗ്യ വകുപ്പ് വെളിപ്പെടുത്തി. ഓരോ ദിവസവും പുറത്ത് വരുന്ന വാർത്തകൾ ജനങ്ങളിൽ ആശങ്ക വർദ്ധിപ്പിക്കുന്നുണ്ട്. രോഗം ബാധിച്ച ബഹുഭൂരിപക്ഷം ആളുകളും നേരിയ ലക്ഷണങ്ങൾ മാത്രമേ കാണിക്കുന്നുള്ളൂ എന്നതും ശ്രദ്ധിക്കേണ്ട കാര്യമാണ്, അതെ സമയം, രോഗം ബാധിച്ച പലരും സുഖം പ്രാപിക്കുന്നു എന്ന വരാത്ത ആശ്വാസം നൽകുന്നതാണ്.
കൊറോണ വൈറസും ഹൃദയാരോഗ്യവും
ഹൃദയ സംബന്ധമായ രോഗങ്ങൾ ഉൾപ്പടെ നിങ്ങൾ ഏതെങ്കിലും തരത്തിലുള്ള ശാരീരിക പ്രശ്നങ്ങൾ അനുഭവിക്കുന്ന വ്യക്തി ആണെങ്കിലും നിങ്ങളുടെ ആരോഗ്യ വകുപ്പും ഡോക്ടറും നൽകുന്ന ശുചിത്വ നിർദ്ദേശങ്ങൾ പാലിക്കുക എന്നതാണ് വൈറസിനെ ചെറുക്കാൻ വേണ്ട ഒരേയൊരു മാർഗ്ഗം. കുറഞ്ഞത് 20 സെക്കൻഡ് നേരത്തേക്ക് സോപ്പും വെള്ളവും ഉപയോഗിച്ച് കൈകൾ കഴുകി വൃത്തിയാക്കുന്നതും ഇതിൽ ഉൾപ്പെടുന്നു.
Also read: കൊറോണ വൈറസ് പടരാതിരിക്കാൻ സ്വീകരിക്കേണ്ട അടിയന്തര നടപടികൾ
നിങ്ങൾക്ക് ഡോക്ടർ നിർദ്ദേശിച്ചിട്ടുള്ള മരുന്ന് കഴിക്കുന്നത് എപ്പോഴും പ്രധാനമാണ്. നിങ്ങൾക്ക് ശാരീരിക അസ്വസ്ഥത തോന്നുന്നുവെങ്കിൽ, ഉടൻ തന്നെ ഡോക്ടറുമായി ബന്ധപ്പെടുക. ആവശ്യമെങ്കിൽ ഫാർമസിയിൽ നിന്ന് നിങ്ങളുടെ മരുന്നുകൾ ശേഖരിക്കാൻ ആരോടെങ്കിലും ആവശ്യപ്പെടുകയും ചെയ്യാം.
കൊറോണയെ തടയാൻ ഹൃദ്രോഗമുള്ളവർക്ക് എന്തെങ്കിലും പ്രത്യേക നിർദ്ദേശങ്ങളുണ്ടോ?
കൊറോണ വൈറസിനെ തടയാൻ ഹൃദ്രോഗമുള്ളവർക്കായി പ്രത്യേകം മാർഗ്ഗ നിർദ്ദേശങ്ങളൊന്നുമില്ല. എന്നാൽ വ്യക്തി ശുചിത്വം പാലിക്കുന്നതോടൊപ്പം യാത്ര, പൊതുയോഗങ്ങൾ, ആശുപത്രി സന്ദർശനങ്ങൾ തുടങ്ങിയവ നിർബന്ധമായും ഒഴിവാക്കുക. നിങ്ങളുടെ ആരോഗ്യ വിദഗ്ധൻ ഏതെങ്കിലും തരത്തിലുള്ള വിശ്രമം നിർദ്ദേശിച്ചിട്ടുണ്ടെങ്കിൽ അത് നിർബന്ധമായും പിന്തുടരുക. വ്യായാമം ചെയ്യുന്നത് മുടക്കാതിരിക്കാൻ ശ്രദ്ധിക്കുക. പുറത്തു പോയി ചെയ്യുന്നതിന് പകരം വീട്ടിലിരുന്ന് ചെയ്യാവുന്ന വ്യായാമങ്ങൾ പരിശീലിക്കാം.
ജലദോഷം ഉൾപ്പെടെയുള്ള വിവിധ രോഗങ്ങൾക്ക് കാരണമാകുന്ന വൈറസുകളുടെ ഒരു വലിയ കൂട്ടമാണ് കൊറോണ വൈറസുകൾ. ഈ നിർദ്ദിഷ്ട രോഗവ്യാപനം, മൃഗങ്ങളിൽ നിന്ന് ആരംഭിക്കുകയും പിന്നീട് മനുഷ്യരിലേക്ക് പകരുകയും ചെയ്യുകയാണ് ഉണ്ടായത്. മനുഷ്യരിൽ മുമ്പ് തിരിച്ചറിഞ്ഞിട്ടില്ലാത്തതിനാൽ നിലവിലെ ഈ വൈറസ് വ്യാപനത്തെ നോവൽ കൊറോണ വൈറസ് (കൊവിഡ് -19) എന്ന് വിളിക്കുന്നു. കൊവിഡ് -19 കേവലം ജലദോഷം മാത്രം നൽകുന്ന ഒരു വൈറസ് അല്ല. രോഗത്തിന്റെ കൂടിയ അവസ്ഥ അതി കഠിനമായ പനി, ശ്വാസകോശ പ്രശ്നങ്ങൾ, എന്നിവയിൽ തുടങ്ങി മരണത്തിന് വരെ കാരണമാകുന്നു.
Also read: കേരളത്തിൽ വീണ്ടും കൊറോണ: യാത്ര ചെയ്യുന്നവർ നിർബന്ധമായും ശ്രദ്ധിക്കുക!
കൊവിഡ്-19 ന്റെ ലക്ഷണങ്ങൾ എന്തൊക്കെയാണ്?
ശ്രദ്ധിക്കേണ്ട പ്രധാന ലക്ഷണങ്ങൾ ചുമ, പനി, ശ്വാസതടസ്സം, തൊണ്ടവേദന അല്ലെങ്കിൽ മൂക്കൊലിപ്പ് എന്നിവയാണ്. നിങ്ങൾക്ക് മറ്റേതെങ്കിലും അണുബാധയുണ്ടെങ്കിൽ നല്ല ശുചിത്വ മുൻകരുതലുകൾ പാലിക്കണം.
കൊവിഡ് -19 എത്രത്തോളം ഗുരുതരമാണ്?
ഏറ്റവും ആശ്വാസം നൽകുന്ന വാർത്ത കൊറോണ വൈറസ് ബാധിച്ച മിക്ക ആളുകളും യഥാസമയത്ത് ലഭിക്കുന്ന പരിചരണം മൂലം വേഗത്തിൽ സുഖം പ്രാപിക്കുന്നു എന്നതാണ്. എന്നിരുന്നാലും, ചില അവസ്ഥകളിൽ ഇത് കൂടുതൽ കഠിനമാകുമെന്ന് നമുക്കറിയാം. അതോടൊപ്പം തന്നെ നാം മനസിലാക്കേണ്ട പ്രധാന കാര്യം ഹൃദ്രോഗം, പ്രമേഹം, ശ്വാസകോശ സംബന്ധമായ അസുഖം അല്ലെങ്കിൽ ദുർബലമായ രോഗപ്രതിരോധ ശേഷി തുടങ്ങിയ ശാരീരിക പ്രശ്നങ്ങൾ ഉള്ള ആളുകൾക്ക് സങ്കീർണതകൾ ഉണ്ടാകാനുള്ള സാധ്യത കൂടുതലാണ്. കൊറോണ വൈറസിന്റെ ലക്ഷണങ്ങൾ ശ്രദ്ധയിൽ പെട്ടാൽ ഉടൻ തന്നെ ഇവരെ നിരീക്ഷണത്തിൽ വെയ്ക്കുകയോ ആശുപത്രിയിലേയ്ക്ക് മാറ്റുകയോ ചെയ്യേണ്ടതുണ്ട്.
നിലവിൽ, കൊവിഡ് -19 ന് പ്രത്യേക വാക്സിനോ ചികിത്സയോ ഇല്ല, അതിനാൽ ലക്ഷണങ്ങളെ ചികിത്സിക്കുകയും മറ്റുള്ളവർ രോഗബാധിതരാകാനുള്ള സാധ്യത കുറയ്ക്കുകയും ചെയ്യുക എന്നതാണ് ലക്ഷ്യം. ഇനി പറയുന്ന കാര്യങ്ങൾ അതിനെ സഹായിക്കുന്നു:
☛ ധാരാളം വിശ്രമമിക്കുക
☛ ശരീരത്തിലെ ജലാംശം നിലനിർത്തുക
☛ പനി നിയന്ത്രണത്തിലാക്കാൻ ഡോക്ടർ നിർദ്ദേശിക്കുന്ന പരിഹാര മാർഗ്ഗങ്ങൾ സ്വീകരിക്കുക
☛ ശുചിത്വം പാലിക്കുക
Also read: കൊറോണ വൈറസ് Vs. സാധാരണ പനിയും ജലദോഷവും: അറിയണം ഈ വ്യത്യാസങ്ങൾ
കൊറോണ വൈറസ് എങ്ങനെ പടരുന്നു?
കൊറോണ വൈറസ് പടരുന്നത് ശ്വസന തുള്ളികളിലൂടെയാണ് - ചുമ, തുമ്മൽ അല്ലെങ്കിൽ വൈറസ് ഉള്ള ഒരാളുമായി അടുത്ത ബന്ധം തുടങ്ങിയ കാര്യങ്ങളിലൂടെ വൈറസ് പടരുന്നു.
സാധാരണ ജലദോഷത്തിന്റെ വൈറസ് പോലെ, ഇത് ഒരു വ്യക്തിയിൽ നിന്ന് മറ്റൊരാളിലേക്ക് പടരുന്നു, പക്ഷേ ഈ അവസ്ഥ ഒരു ജലദോഷ പ്രശ്നം മാത്രമല്ല, ഇത് ഒരു ശ്വാസകോശ സംബന്ധമായ അസുഖമാണ്. ഒരു ടിഷ്യു ഉപയോഗിച്ച് തുമ്മുമ്പോൾ നിങ്ങളുടെ വായും മൂക്കും മറയ്ക്കുക എന്നതാണ് സാർവത്രികമായി നൽകുന്ന ഉപദേശം. ടിഷ്യു നേരെ അടപ്പുള്ള ചവറ്റുകുട്ടയിൽ ഇടുക. ടിഷ്യു ഇല്ലെങ്കിൽ, നിങ്ങളുടെ കൈകൾക്ക് പകരം കൈമുട്ട് കൊണ്ട് മുഖം മൂടി തുമ്മുക. സോപ്പും ചൂടുവെള്ളവും ഉപയോഗിച്ച് കൈ കഴുകുക. ചുമയും തുമ്മലും ഉള്ളവരും നിലവിൽ രോഗലക്ഷണങ്ങളുള്ള രോഗികളുമായും ഉള്ള സമ്പർക്കം ഒഴിവാക്കാൻ ശ്രമിക്കുക.