എന്റെ പേര് രമ്യ ആന്റണി(യഥാര്ത്ഥ പേര് അല്ല)എന്നാണ്. ഞാന് വളരെ സന്തോഷത്തോടെയാണ് ഇത് എഴുതുന്നത് തന്നെ. കാരണം, പ്രസവാനന്തരം അമിതവണ്ണം വെച്ചത് എന്നെ മാനസികമായി വല്ലാതെ തളര്ത്തിയിരുന്നു. കുറേ കാലം ഞാന് ഈ തടി കുറയ്ക്കുവാനായി പലതും ചെയ്തു നോക്കി അവസാനം ഞാന് തന്നെ കുറേ കാര്യങ്ങള് മനസ്സിലാക്കുകയും ഇത് എന്റെ തടി കുറയ്ക്കുവാന് സഹായിക്കുകയും ചെയ്തു.
തടി ഒരു പ്രശ്നമായപ്പോള്
ഈ പ്രസവിച്ച് കഴിയുമ്പോള് വീട്ടുകാര് നടത്തുന്ന ദേഹരക്ഷയാണ് എന്നെ തടി വെപ്പിച്ചത്. കൂടാതെ കുട്ടിക്ക് ഒരു മൂന്ന് വയസ്സ് ആകുന്നത് വരെ എനിക്ക് ഒന്നും ചെയ്യുവാന് സാധിച്ചിരുന്നില്ല. കുട്ടി ബാക്കി വയ്ക്കുന്ന ഭക്ഷണം വെറുതേ കളയണ്ടല്ലോ എന്ന് വെച്ച് അതും കഴിക്കുമായിരുന്നു. ഇത്തരത്തില് നീണ്ടുപോയിരുന്ന എന്റെ ജീവിതചര്യകള് കാരണം, എന്റെ തടി കുറയ്ക്കുവാന് എനിക്ക് ഒട്ടും സാധിച്ചിരുന്നില്ല.
തടി കുറയ്ക്കുവാന് തീരുമാനിച്ചതിനു പിന്നില്
വിവാഹത്തിനു മുന്പും അതുപോലെ, വിവാഹശേഷവും എനിക്ക് കൃത്യമായ ശരീരഭാരമായിരുന്നു ഉണ്ടായിരുന്നത്. എനിക്ക് അമിതമായി വയറും ഉണ്ടായിരുന്നില്ല. പൊതുവില് എനിക്ക് അമിതമായി തടിക്കുന്നത് ഇഷ്ടമില്ലാതിരുന്ന വ്യക്തിയാണ്. ഞാന് പഠിക്കുന്ന കാലത്തായാലും കുറച്ച് തടി കൂടി, അല്ലെങ്കില് വയര് കൂടി എന്ന് കണ്ടാല് അത് കുറയ്ക്കുവാന് പരമാവധി ശ്രമിച്ചിരുന്നു.
പക്ഷേ, അന്നുകാലത്ത് കൃത്യമായ രീതിയിലല്ലായിരുന്നു തടി കുറയ്ക്കുവാന് ശ്രമിച്ചിരുന്നത് എന്ന് മാത്രം. എല്ലാ പെണ്കുട്ടികളും ചെയ്യുന്നത് പോലെ പട്ടിണി കിടക്കലായിരുന്നു മെയ്ന് പരിപാടി. അന്ന് കാലത്ത് വ്യായാമം ചെയ്യുവാന് വളരെ മടിയുള്ള കാലമാണ്. പിന്നെ കോളജിലേയ്ക്ക് സൈക്കിള് ചവിട്ടി പോകുന്നതിനാല് അതൊരു വ്യായാമമാക്കി ഞാന് മാറ്റിയെടുത്തും. അത്രതന്നെ!
തടി വെച്ചതില് പിന്നെ നേരിട്ട ബുദ്ധിമുട്ടുകള്
പണ്ടത്തെപ്പോലെ ഇഷ്ടമുള്ള വസ്ത്രങ്ങളെല്ലാം ഇടാന് പറ്റാതായി എന്നതാണ് പ്രധാന പ്രശ്നമായി എനിക്ക് അനുഭവപ്പെട്ടത്. നമ്മള് നമ്മളുടെ ശരീരത്തെക്കുറിച്ച് ചിന്തിക്കണ്ട എന്നെല്ലാം വിചാരിക്കുമെങ്കിലും ജീന്സും ടോപ്പും ധരിക്കുമ്പോള് അമിതമായി നില്ക്കുന്ന വയറും തടിയുമെല്ലാം എന്നില് അസ്വസ്ഥതകള് ഉണ്ടാക്കിയിരുന്ന കാര്യമാണ്. എന്റെ ഭര്ത്താവ് നീ കംഫര്ട്ടബിളാണെങ്കില് ഇവ ധരിച്ചോളൂ എന്ന് പറയുമെങ്കിലും എനിക്ക് എന്തോ, ഒട്ടും സ്വീകാര്യമായിരുന്നില്ല.
ഒരു ചുരിദാര് ധരിച്ചാല്പോലും അപാകതപോലെ എനിക്ക് അനുഭവപ്പെടുവാന് തുടങ്ങി. ഇത്തരത്തില് മാനസികമായും എന്നെ വിഷമത്തിലാക്കുവാന് തുടങ്ങിയതോടെ, പുറത്തേയ്ക്ക് ഇറങ്ങാതായതോടെ എന്റെ ഭര്ത്താവാണ് എന്നാല് തടി കുറയ്ക്കുവാന് വ്യായാമം ചെയ്യുവാന് നിര്ദ്ദേശിച്ചത്. സത്യത്തില് അദ്ദേഹം ഇക്കാര്യത്തില് വളരെ സപ്പോട്ടീവായിരുന്നു.
പ്രാരംഭഘട്ടത്തിലെ ബുദ്ധിമുട്ടുകള്
തുടക്കത്തില് വീട്ടില് തന്നെ യൂട്യൂബ് നോക്കി വ്യായാമം ചെയ്യലായിരുന്നു. രാവിലെ തന്നെ എഴുന്നേറ്റ് ടിവിയില് യൂട്യൂബ് കണക്ട് ചെയ്ത് അതില് നോക്കി ചെയ്യുവാന് ആരംഭിക്കുമായിരുന്നു. പലരും പറഞ്ഞതനുസരിച്ച് ചോറ് ഉപേക്ഷിച്ചും പട്ടിണികിടന്നും ആണ് ഇത്തരത്തില് ചെയ്യുവാന് ആരംഭിച്ചത്. എന്നാല്, കുറച്ച് കഴിഞ്ഞപ്പോഴേയ്ക്കും എനിക്ക് അമിതമായി ക്ഷീണം അനുഭവപ്പെടുവാന് തുടങ്ങി. പിന്നീട് ഡോക്ടറെ കണ്ട് കാര്യം പറഞ്ഞപ്പോഴാണ് ശരീരത്തിലേയ്ക്ക് വേണ്ട പോഷകങ്ങളൊന്നും എത്തുന്നില്ല എന്ന് മനസ്സിലായത്.
ഞാന് പിന്നെ, ഒരു ഡയറ്റീഷനെ കാണുകയും അയാളുടെ നിര്ദ്ദേശപ്രകാരം ഞന് എനിക്ക് വേണ്ടി ഒരു ഡയറ്റ് പ്ലാന് തയ്യാറാക്കുകയും ചെയ്തു. അതില് പ്രധാനപ്പെട്ടകാര്യമായിരുന്നു, നമ്മളുടെ ശരീരത്തിന് ദിവസേന പോഷകങ്ങളും കാര്ബ്സും മിനറല്സും അനിവാര്യമാണ്. അതിനനുസരിച്ച് എന്റെ ഭക്ഷണരീതിയെ ഞാന് തരംതിരിക്കുവാന് തുടങ്ങി.
ഭക്ഷണരീതികള്
രാവിലെ, ഹെല്ത്തിയാക്കുവാന് സാലഡും അതുപോലെ, ചീസ് എന്നിവയെല്ലാം ചേര്്ത്ത് സാന്വിച്ച് ഉണ്ടാക്കി കഴിക്കുവാന് തുടങ്ങി. ഇതിനായി മുഴുവന് ധാന്യങ്ങള് ചേര്ത്തിട്ടുള്ള ബ്രഡ് ആണ് തിരഞ്ഞെടുക്കാറ്. ചിലപ്പോള്, റാഗി കൊണ്ട് കുറുക്കും തയ്യാറാക്കി കഴിക്കാറുണ്ട്. അതുപോലെ, റാഗി ദോശ, ഉണ്ടാക്കും. മിതമായ അളവില് മാത്രമാണ് ഇത് കഴിച്ചിരുന്നത്. ഇതുപോലെ, നല്ല ഹെല്ത്തിയായിട്ടുള്ള പച്ചക്കറികള് ചേര്ത്ത് പല വിഭവങ്ങള് ഉണ്ടാക്കും.
ഇതില് വിഭവങ്ങള് തയ്യാറാക്കുമ്പോള് എന്റെ ശരീരത്തിന് എന്തെല്ലാം എത്ര അളവില് ആവശ്യമുണ്ട് എന്ന് മനസ്സിലാക്കി അതിനെ തരംതിരിച്ചാണ് എടുത്തിരുന്നത് എന്ന് മാത്രം. എണ്ണയുടെ ഉപയോഗം കുറച്ചു. പരമാവധി ഒലീവ് ഓയില് ഉപയോഗിക്കുവാന് തുടങ്ങി. അതുപോലെ, ഫൈബര് പ്രോട്ടീന് എന്നിവ അടങ്ങിയ ഭക്ഷണങ്ങളു ആഹാരത്തില് ചേര്ത്തൂ. ഉച്ചയ്ക്ക് രണ്ട് പിടി മട്ട അരി ചോറും, പച്ചക്കറിയും പയറു വര്ഗ്ഗങ്ങളും ചേര്ത്ത് ഭക്ഷണം കഴിക്കുമായിരുന്നു. അതുപോലെ, രാത്രിയില് സാലഡ് ആണ് പ്രധാനമായും കഴിച്ചിരുന്നത്.
ഭക്ഷണത്തില് മാത്രമല്ല, വ്യായാമത്തിലും മാറ്റങ്ങള് വരുത്തുവാന് ആരംഭിച്ചു. മസില്സ് വീക്കാകാതിരിക്കുവാന് ജിമ്മില് പോയി തന്നെ കുറച്ച് നാള് വര്ക്കൗട്ട് ചെയ്തു. അതുപോലെ, വയര് കുറയ്ക്കുവാന് ലെഗ് റൈസ്, സിറ്റപ്പ്, പ്ലാങ്ക് എന്നിവയെല്ലാം സ്ഥിരമായി ചെയ്തിരുന്നു. പെട്ടെന്ന് റിസള്ട്ട് കിട്ടിയില്ലെങ്കില് ഓരോ മാസത്തിലും രണ്ട് കിലോ വീതം കുറയ്ക്കുവാന് എനിക്ക് സാധിച്ചു. പ്രസവശേഷം 68 കിലോ യിലെത്തിയ ഞാന് പതിയെ അഞ്ച് മാസം കൊണ്ട് 58 കിലോയിലേയ്ക്ക് എത്തി. സത്യത്തില് ഇത് എനിക്ക് വളരെ സന്തോഷം നല്കുന്ന കാര്യമായിരുന്നു.
ഇപ്പോള് ഞാന് സ്ഥിരമായി വ്യായാമം ചെയ്യുന്ന വ്യക്ിയാണ്. വീട്ടില് തന്നെ ഇരുന്നാണ് ചെയ്യുന്നത്. ഒപ്പം ഡയറ്റും നല്ലപോലെ നോക്കുന്നുണ്ട്. ഇടയ്ക്ക് മാത്രം ജിമ്മില് പോകും. ഇന്ന് എന്റെ ശരീരഭാരം 56 കിലോ ആണ്. ഇതില് നിന്ന് കൂടാതെ നോക്കുവാന് എനിക്ക് ഇപ്പോള് സാധിക്കുന്നുണ്ട്. തടി കുറഞ്ഞതിന് ഒപ്പം തന്നെ വയറും കുറഞ്ഞതിനാല് വസ്ത്രം ധരിക്കുവാനുള്ള ബുദ്ധിമുട്ടെല്ലാം മാറിയിരിക്കുകയാണ്. ഞാന് ഇപ്പോള് വളരെയധികം ഹാപ്പിയാണ്.