ഡോക്ടര്‍ നോക്കുമ്പോള്‍ ബിപി കൂടുന്നുണ്ടോ, വൈറ്റ് കോട്ട് ഹൈപ്പര്‍ ടെന്‍ഷന്‍

നാം പലപ്പോഴും ശ്രദ്ധിച്ചു കാണും, അല്ലെങ്കില്‍ പലപ്പോഴും മറ്റുള്ളവര്‍ പറഞ്ഞോ നമ്മുടെ കാര്യത്തിലോ തിരിച്ചറിഞ്ഞ് കാണും, വീട്ടില്‍ വച്ച് നാം പരിശോധിയ്ക്കുന്ന ബിപിയേക്കാള്‍ ഉയര്‍ന്ന തോത് ആശുപത്രിയില്‍ പോയി പരിശോധിയ്ക്കുമ്പോഴോ ഡോക്ടര്‍മാരോ ആരോഗ്യവിദഗ്ധരോ പരിശോധിയ്ക്കുമ്പോഴോ കാണിയ്ക്കുന്നത്.

ഇത് പലരിലും ആശയക്കുഴപ്പമുണ്ടാക്കാറുമുണ്ട്. ബിപി മെഷീന്റെ കേടാണോ നോക്കുന്ന രീതി കൊണ്ടാണോ എന്നെല്ലാം ചിന്തിയ്ക്കുന്നത് സ്വാഭാവികവുമാണ്. എന്നാല്‍ ഇത് അസാധാരണമായ ഒന്നല്ല, തികച്ചും സാധാരണയായ ഒന്നാണ്. വൈറ്റ് കോട്ട് ഹൈപ്പര്‍ ടെന്‍ഷന്‍ എന്നാണ് ഈ പ്രത്യേക അവസ്ഥ അറിയപ്പെടുന്നത് തന്നെ. വെള്ള കോട്ടിട്ട, അതായത് ഡോക്ടര്‍മാരോ നഴ്‌സുമാരോ ലാബിലുള്ളവരോ എല്ലാം പരിശോദിയ്ക്കുമ്പോഴാണ് ഈ അവസ്ഥ കണ്ടു വരുന്നത് എന്നതിനാല്‍ തന്നെയാണ് ഇത് ഈ പേരില്‍ അറിയപ്പെടുന്നത്.

വൈറ്റ് കോട്ട് ഹെപ്പര്‍ ടെന്‍ഷന്‍ എന്നതിന് അടിസ്ഥാന കാരണമായി പറയപ്പെടുന്നത് സ്‌ട്രെസ് തന്നെയാണ്. ഡോക്ടര്‍ പരിശോധിയ്ക്കുമ്പോഴും മറ്റും സ്‌ട്രെസ് കൂടുന്നു. ഇത് ബിപിയിലും കാണപ്പെടുന്നു. ഇതിന് ശേഷം ബിപി സാധാരണ നിലയിലിയേക്ക് മടങ്ങി വരികയും ചെയ്യും. ഇത് സാധാരണ നിലയിലേയ്ക്ക് തന്നെ തിരികെ വരുന്നതിനാല്‍ തന്നെ കാര്യമായ പ്രശ്‌നമുണ്ടെന്ന് പറയാനാകില്ല.

എന്നാല്‍ ഇതിന് മറ്റൊരു വിശദീകരണം കൂടിയുണ്ട്. ഇത്തരത്തിലെ വൈറ്റ് കോട്ട് ഹൈപ്പര്‍ ടെന്‍ഷന്‍ എന്നത് ഭാവിയില്‍ കൂടിയ ബിപി സ്ഥിരം നില നില്‍ക്കാന്‍ സാധ്യതയുള്ള ഒരു കണ്ടീഷനാണെന്ന് ചില ആരോഗ്യവിദഗ്ധര്‍ കരുതുന്നു.

വൈറ്റ് കോട്ട് ഹൈപ്പര്‍ ടെന്‍ഷനുള്ളവര്‍ക്ക് കാര്‍ഡിയോ സംബന്ധമായ രോഗങ്ങള്‍ വരാനുള്ള സാധ്യതയേറെയാണെന്നും ഇത് ശരീരത്തിലെ അവയവങ്ങളെ അപകടത്തിലാക്കാനുള്ള സാധ്യതയുണ്ടെന്നും ആരോഗ്യപരമായ ചില വിശദീകരണങ്ങളുണ്ട്.

ഇതു പോലെ മാസ്‌ക്ഡ് ഹൈപ്പര്‍ ടെന്‍ഷന്‍ എന്ന ഒന്നുണ്ട്. കൂടിയ ബിപിയുണ്ടെങ്കിലും ഡോക്ടര്‍ പരിശോധിയ്ക്കുമ്പോള്‍ ഇത് സാധാരണ ബിപി എന്ന അവസ്ഥയില്‍ തന്നെയാണ് കാണുക. ഇതും ആരോഗ്യത്തിന് നല്ലതല്ല. കാരണം കൂടിയ ബിപി കുറഞ്ഞ് കാണിയ്ക്കുന്നത് ആരോഗ്യകമല്ല. വേണ്ട മുന്‍കരുതലുകള്‍ എടുക്കാത്തത് കൊണ്ട് തന്നെ ഇത് ഗുരുതരമായ പല ആരോഗ്യ പ്രശ്‌നങ്ങള്‍ക്കും വഴിയൊരുക്കുകയും ചെയ്യുന്നു.