ജോലിയോടുള്ള അമിതാവേശം നിങ്ങളെ രോഗിയാക്കാം

നിങ്ങളുടെ സമയത്തിന്‍റെ കൂടുതല്‍ ഭാഗവും നിങ്ങള്‍ ചിലവഴിക്കുന്നത് സ്വന്തം കുടുംബത്തോടൊപ്പമോ അതോ ജോലിസ്ഥലത്തോ? ആഴ്ചയില്‍ 35-40 മണിക്കൂര്‍ ജോലി ചെയ്യുന്നതാണ് ഏറ്റവും ഉചിതമായ രീതി. ജോലി ചെയ്യുന്ന മണിക്കൂറുകള്‍ കൂടുന്നത് ഹൃദയ സംബന്ധമായ രോഗങ്ങള്‍ വര്‍ധിക്കുന്നതിനും പക്ഷാഘാതം ഉണ്ടാകുന്നതിനും ഇടയാക്കുമെന്ന് പുതിയ പഠനങ്ങള്‍ വ്യക്തമാക്കുന്നു.

തുടക്കത്തില്‍ ഹൃദ്രോഗങ്ങള്‍ ഇല്ലാത്ത 603838 പേരിലാണ് ഗവേഷകര്‍ പഠനം നടത്തിയത്. ഏഴു മുതല്‍ എട്ടു വര്‍ഷം വരെ ഇവര്‍ കൃത്യമായ നിരീക്ഷണത്തിലായിരുന്നു. ആഴ്ചയില്‍ 55മണിക്കൂറോ അതില്‍ കൂടുതലോ ജോലി ചെയ്യുന്നവര്‍ക്ക് 13 ശതമാനത്തോളം ഹൃദ്രോഗങ്ങളും 33 ശതമാനത്തോളം പക്ഷാഘാതവും പിടിപെടാനുള്ള സാധ്യതയുണ്ട്. അതായത് ജോലി സമയം കൂടുന്നതിന് ആനുപാതികമായി പക്ഷാഘാതം ഉണ്ടാകാനുള്ള സാധ്യതയും കൂടും.

ജോലിയിലുള്ള സമ്മര്‍ദ്ദം കൂടുന്നതാകാം ഒരു കാരണം. വൈകി ജോലി ചെയ്യുന്നത് മൂലം ആലസ്യം അനുഭവപ്പെടുകയും ഇത് മദ്യപാനത്തിലേക്കും മറ്റും നയിക്കുകയും ചെയ്യുന്നത് മറ്റൊരു കാരണമാണ്. രോഗലക്ഷണങ്ങള്‍ കണ്ടു തുടങ്ങിയാല്‍ അവ അവഗണിക്കുന്നതും അപകടകരമാണ്.
കൂടുതല്‍ മണിക്കൂറുകള്‍ ജോലി ചെയ്യുന്നവര്‍ ആരോഗ്യ കാര്യത്തില്‍ ഏറെ ശ്രദ്ധ പുലര്‍ത്തണം. കൃത്യമായ ചെക്കപ്പുകള്‍ ഉറപ്പു വരുത്തകയും സമയക്രമം അനുസരിച്ച് മാത്രം ജോലി ചെയ്യാനും ശ്രദ്ധിക്കുക എന്നതാണ് ഏറ്റവും പ്രധാനം.