പാചകത്തിനു മുന്‍പ് മത്സ്യത്തിന്‍റെ രൂക്ഷഗന്ധം അകറ്റാനുള്ള മാര്‍ഗങ്ങള്‍

മീന്‍ കഴിക്കാന്‍ എല്ലാവര്‍ക്കും ഇഷ്ടമാണെങ്കിലും അതിന്‍റെ രൂക്ഷഗന്ധം ഇഷ്ടപ്പെടാത്തവരാണധികവും. പാചകത്തിന് മുൻപ് മത്സ്യത്തിന്റെ രൂക്ഷഗന്ധം അകറ്റാനുള്ള മാര്‍ഗ്ഗങ്ങള്‍ ഏതൊക്കെയാണെന്ന് നോക്കാം.

പാല്‍

മീനിന്‍റെ രൂക്ഷ ഗന്ധം അകറ്റാനുളള മികച്ച മാര്‍ഗ്ഗങ്ങളിലൊന്ന് മത്സ്യം പാലില്‍ ഇട്ട് വെക്കുക എന്നതാണ്. പത്ത് മിനിറ്റോളം പാലില്‍ ഇട്ട് വെച്ച ശേഷം വൃത്തിയാക്കുന്നതാണ് നല്ലത്.

വിനാഗിരി

പാലിനു പുറമേ വെളള വിനാഗരിയും മത്സ്യം വൃത്തിയാക്കാന്‍ വളരെ ഫലപ്രദമാണ്.
കുറച്ചു വിനാഗിരി വെള്ളത്തിൽ കലക്കിയതിനുശേഷം 5 മിനിറ്റു നേരം മത്സ്യം അതിൽ ഇട്ടുവയ്ക്കുക. അതിനുശേഷം മീൻ കഴുകി വൃത്തിയാക്കി പാചകം ചെയ്യാവുന്നതാണ്.

ഇഞ്ചി

ഇഞ്ചി നീരിന് മീനിന്‍റെ രൂക്ഷ ഗന്ധം അകറ്റാന്‍ കഴിയും. ആവശ്യത്തിന് ഇഞ്ചി ചതച്ചെടുത്തശേഷം മത്സ്യത്തില്‍ പുരട്ടിവെക്കുക പത്തു മിനിറ്റിനു ശേഷം നന്നായി കഴുകിക്കളഞ്ഞ് പാചകം ചെയ്യാം.

പഞ്ചസാര

കുറച്ച് പഞ്ചസാര എടുത്ത് മത്സ്യത്തില്‍ പുരട്ടി മൂന്നു മുതല്‍ അഞ്ച് മിനുട്ടിനുളളില്‍ കഴുകികളയാം. മത്സ്യത്തിന്‍റെ രൂക്ഷ ഗന്ധം അകലും.

ചോളപ്പൊടി, ഉപ്പ്, മഞ്ഞൾപ്പൊടി എന്നിവയുടെ മിശ്രിതം

മത്സ്യത്തിന്റെ രൂക്ഷഗന്ധം അകറ്റുവാനായി ഏറ്റവും കൂടുതൽ ഉപയോഗിക്കുന്ന പൊടിക്കൈകളിലൊന്നാണിത്. ഉപ്പ്, മഞ്ഞൾ, ചോളപ്പൊടി എന്നിവ യോജിപ്പിച്ച് മത്സ്യത്തിൽ പുരട്ടിവയ്ക്കുക. അരമണിക്കൂറിൽക്കൂടുതൽ വച്ചതിനു ശേഷം മത്സ്യം ശുദ്ധജലത്തിൽ കഴുകി വൃത്തിയാക്കാവുന്നതാണ്.

നാരങ്ങ

വിനാഗിരി പോലെ തന്നെ നാരങ്ങാനീരും മത്സ്യഗന്ധം അകറ്റുന്നതിൽ ഏറ്റവും ഫലവത്തായ മാർഗ്ഗമാണ്. വിനാഗിരി ഉപയോഗിച്ച് വൃത്തിയാക്കുന്ന അതേ രീതി തന്നെയാണ് നാരങ്ങ ഉപയോഗിച്ചും ചെയ്യുന്നത്. എന്നാൽ, നാരങ്ങ നേരിട്ട് തന്നെ മത്സ്യത്തിൽ പുരട്ടേണ്ടതാണ്. നാരങ്ങയിൽ അടങ്ങിയ സിട്രിക്ക് ആസിഡ് മത്സ്യത്തിന്റെ രൂക്ഷഗന്ധം കുറയ്ക്കുന്നു.