സദ്യയ്ക്ക്
സദ്യയ്ക്ക് തൊട്ടു കൂട്ടാന്‍, ചാറുകറി, കൂട്ടുകറി എന്നിവ വേണം. ഇലയുടെ ഇടത്തേ അറ്റത്താണ് ഉപ്പേരി വിളമ്പുന്നത്. കായ വറുത്തത്, ശര്‍ക്കരവരട്ടി എന്നിവ. കായ വറുത്തത് മുഴുവന്‍ വറുത്തതും നാലായി മുറിച്ച് വറുത്തതും വേണം. ചിലയിടങ്ങളില്‍ ചേന വറുത്തതും ഉണ്ടാകും. പിന്നീട് ചെറിയ പഴവും രണ്ട് പപ്പടവും. സദ്യയ്ക്ക് മുഴുവന്‍ പപ്പടം, അതും വലുതാണ് പതിവ്. പിന്നിട് ഇഞ്ചിക്കറി, നാരങ്ങ, മാങ്ങാക്കറി പോലുള്ള തൊട്ടുകറികള്‍ വിളമ്പുന്നു.
ഇല
ഇലയുടെ വലത്തേ അറ്റത്തായി അവിയല്‍ വിളമ്പുന്നു. ഇതിന് അടുത്തായി തോരന്‍ വിളമ്പും. സമീപത്തായി കിച്ചടി, പച്ചടി കൂട്ടുകള്‍ വിളമ്പണം. ഇതേ തുടര്‍ന്ന് കൂട്ടുകറി, കാളന്‍, ഓലന്‍ എന്നിവ വിളമ്പും. ചിലയിടങ്ങളില്‍ കൂടുതല്‍ വിഭവമുണ്ടാകും. ഇലയ്ക്ക് നടുവില്‍ ചോറ് വിളമ്പും. ചോറിനൊപ്പം നെയ്യു പരിപ്പുമൊഴിച്ച് കഴിയ്ക്കാം. പപ്പടവും കൂട്ടാം. ശേഷം സാമ്പാര്‍ നടുവിലൊഴിച്ച് ചോറുണ്ണുന്നു. ഒപ്പം ബാക്കിയുള്ള കറികളും കൂട്ടുന്നു.
ചിട്ട
അതിന് ശേഷം പൊതുവേ മോരോ രസമോ ചേര്‍ത്ത് വീണ്ടും ചോറുണ്ണാം. ചിട്ടയനുസരിച്ച് പായസ ശേഷമാണ് മോര് ചേര്‍ത്ത് കഴിയ്‌ക്കേണ്ടത്. എന്നാല്‍ ഈ ചിട്ട തുടരുന്നവര്‍ കുറവാണ്. പായസമാണ് അവസാനം കഴിയ്ക്കുക. ഇതിന്റെ മട്ട് മാറാന്‍ അച്ചാര്‍ തൊട്ടു നക്കി കഴിയ്ക്കുന്നവരുണ്ട്. പായസത്തിനൊപ്പം പപ്പടവും ചേര്‍ത്ത് കഴിയ്ക്കുന്ന രീതിയുമുണ്ട്. പഴം ഇതിനെല്ലാം അവസാനമാണ് കഴിയ്ക്കുക. ചിട്ട നോക്കിയാല്‍ മൂന്നു വട്ടമാണ് ചോറുണ്ണുക. ആദ്യം നെയ്യും പരിപ്പും, ശേഷം സാമ്പാറും മറ്റു കറികളും, അവസാനം മോര് എന്നിങ്ങനെ പോകുന്നു ഇത്.
പായസത്തിന്
പായസത്തിന് തന്നെ രണ്ടു വിഭാഗത്തില്‍ പെട്ടവ, അതായത് ശര്‍ക്കര, പാല്‍ എന്നിവയാണ് ചിട്ട. പ്രഥമന്‍ സദ്യയ്ക്ക് പ്രധാന ചിട്ടയാണ്. ഇത് പരിപ്പോ പഴമോ അടയോ എന്തുമാകാം. അട തന്നെ ശര്‍ക്കരയിലും പാലിലും തയ്യാറാക്കുന്നതുണ്ട്. പായസം ഗ്ലാസിലൊഴിച്ചാണ് പൊതുവേയുള്ള രീതിയെങ്കിലും ഇലയില്‍ വിളമ്പി കഴിയ്ക്കുന്നതാണ് ശരിയായ ചിട്ട. സദ്യയ്ക്ക് ശേഷം ഇല മുന്നോട്ട്, അതായത് ആള്‍ ഇരിയ്ക്കുന്നതിന് വിപരീത ദിശയിലേക്കായി പകുതി മടക്കി വയ്ക്കണം.