1. ഉപ്പുവെള്ളത്തില്‍ മുക്കിവെയ്ക്കാം
പുത്തന്‍വസ്ത്രം ആദ്യം അലക്കുന്നതിനുമുന്‍പ് ഉപ്പുവെള്ളത്തില്‍ മുക്കിവെയ്ക്കുന്നത് നല്ലതാണ്. ഇതിനായി വെള്ളത്തിലേയ്ക്ക് ഒരു കപ്പ് ഉപ്പ് ചേര്‍ക്കുക. ഇതില്‍ വസ്ത്രങ്ങള്‍ കുറച്ചു നേരം മുക്കിവെയ്ക്കുക. ഇത് കളര്‍ ഇളകിപോകാതെ വസ്ത്രങ്ങള്‍ പുത്തനാക്കി നിലനിര്‍ത്തുവാന്‍ സഹായിക്കും.
2. വിനിഗര്‍ ഉപയോഗിക്കാം
ഉപ്പ് ഉപയോഗിക്കുന്നതുപോലെതന്നെ വിനിഗറും കളര്‍ പോകാതിരിക്കുവാന്‍ നമുക്ക് ഉപയോഗിക്കാവുന്നതാണ്. ഇതിനായി പുത്തന്‍ വസ്ത്രം ആദ്യം കഴുകുന്നതിനു മുന്‍പ് കുറച്ചു വെള്ളത്തില്‍ ഒന്നരകപ്പ് വിനിഗര്‍ ഒഴച്ച് അതില്‍ മുക്കി വെയ്ക്കുക. ഓരോ അലക്കിലും ഇത്തരത്തില്‍ ചെയ്യുന്നത് നല്ലതാണ്. പിന്നീട് വെള്ളത്തില്‍ മുക്കിയെടുക്കുമ്പോള്‍ വിനിഗറിന്റെ മണം മാറുന്നതായിരിക്കും. ഇത് നല്ല ഫാബ്രിക്ക് സോഫ്റ്റ്‌നറായും പ്രവര്‍ത്തിക്കും.
3. കാറ്റ് കൊള്ളിച്ച് മടക്കി വെയ്ക്കാം
കുറച്ചുനേരം മാത്രം ഉപയോഗിച്ച വസ്ത്രങ്ങള്‍ എല്ലായ്‌പ്പോഴും കഴുകേണ്ടതിന്റെ ആവശ്യകതയില്ല. എന്നാല്‍ പലരും എപ്പോഴും വസ്ത്രം കഴുകിയെടുക്കുന്നത് കാണാം. ഇത് ഒട്ടും നല്ലതല്ല. അല്പനേരം മാത്രം ഉപയോഗിച്ച വസ്ത്രങ്ങള്‍ ഒരു ഹാങ്ങറില്‍ തൂക്കി നന്നായി കാറ്റു കൊള്ളിച്ച് മടക്കി വെയ്ക്കാവുന്നതാണ്.
4. ഡ്രൈയര്‍ ഉപയോഗിക്കാതിരിക്കുക
വസ്ത്രങ്ങള്‍ പെട്ടെന്ന് ഉണങ്ങികിട്ടുവാന്‍ നാം ഡ്രൈയര്‍ ഉപയോഗിക്കാറുണ്ട്. എന്നാല്‍ സ്ഥിരമായി ഇത്തരത്തില്‍ ഡ്രൈയര്‍ ഉപയോഗിക്കുന്നത് വസ്ത്രങ്ങള്‍ നശിക്കുവാന്‍ കാരണമാകും. ഇത്തരത്തില്‍ ഉപയോഗിക്കുന്നത് തുണികളെ പരുപരുത്തതാക്കുകയും സോഫ്റ്റ്‌നസ് നഷ്ടപ്പെടുത്തുകയും തുണികളില്‍ നൂല്‍ പൊന്തിനില്‍ക്കുന്നതിന് കാരണമാവുകയും ചെയ്യും.
Also Read: ചര്‍മ്മവും മുടിയും മനോഹരമാക്കാന്‍ മികച്ച പ്രകൃതിദത്ത പരിഹാരങ്ങള്‍
5. തുണികള്‍ ഉള്‍ഭാഗം മറച്ചിട്ട് ഉണക്കുക
തുണികള്‍ കഴുകിയശേഷം നല്ല വെയിലത്ത് പുറംഭാഗം വെയില്‍ ഏല്‍ക്കുന്നരീതിയില്‍ ഉണ്ക്കുവാന്‍ ഇടുന്ന തെറ്റായ രീതി കണ്ടുവരുന്നുണ്ട്. നേരിട്ട് സൂര്യതാപം ഏല്‍ക്കുന്നത് വസ്ത്രങ്ങള്‍ക്ക് ഒട്ടും നല്ലതല്ല. പ്രത്യേകിച്ച് കോട്ടണ്‍ വസ്ത്രങ്ങള്‍ക്ക്. അതുകൊണ്ടുതന്നെ തുണികള്‍ അകംപുറം മറച്ചിട്ടുവേണം ഉണക്കിയെടുക്കുവാന്‍. നല്ലഭാഗം വെയില്‍ കൊണ്ടാല്‍ നിറം മങ്ങുന്നതിന് കാരണമാകുന്നു.
6. വസ്ത്രങ്ങളിലെ ടാഗ് നിര്‍ദ്ദേശം പാലിക്കുക
നമ്മള്‍ വസ്ത്രങ്ങള്‍ വാങ്ങുമ്പോള്‍തന്നെ അതില്‍ എന്തുതരം വാഷാണ് ഇതിന് പറ്റുന്നത് പറ്റാത്തത് എന്നീ നിര്‍ദ്ദേശങ്ങള്‍ നല്‍കിയിട്ടുണ്ടാകും. അത് കൃത്യമായി ഫോളോ ചെയ്യുന്നത് വളരെ നല്ലതാണ്. ചില വസ്ത്രങ്ങള്‍ ബ്ലീച്ച് ചെയ്യുവാന്‍ പാടില്ലാത്തത് ഡ്രൈ ക്ലീനിംഗ് പറ്റാത്തത് എന്നിങ്ങനെ പലതരത്തിലുള്ള കെയറിംഗ് ആവശ്യമുള്ള വസ്ത്രങ്ങളുണ്ട്. അതിനനുസരിച്ച് വസ്ത്രങ്ങള്‍ പരിപാലിച്ചാല്‍ നിറം മങ്ങാതെ സൂക്ഷിക്കുവാന്‍ സാധിക്കും.
7. തണുത്തവെള്ളത്തില്‍ കഴുകുക
വസ്ത്രങ്ങള്‍ ഒരിക്കലും ചൂടുവെള്ളത്തില്‍ കഴുകുന്നത് നല്ലതല്ല. ചിലര്‍ എല്ലാ വസ്ത്രങ്ങളും ഒന്നിച്ചിട്ട് പുഴുങ്ങിയെടുക്കുന്ന പരമ്പരാഗത രീതി പിന്തുടരുന്നവരുണ്ട്. എന്നാല്‍ നല്ല വസ്ത്രങ്ങള്‍ ഇത്തരത്തില്‍ കഴുകിയാല്‍ വസ്ത്രങ്ങളിലെ നിറം വേഗത്തില്‍ ഇളകി പോകുന്നതിനും കളര്‍ മങ്ങി പഴയ വ്‌സ്തരം പോലെ തോന്നിക്കുകയും ചെയ്യും. അതുകൊണ്ട് എപ്പോഴും തണുത്തവെള്ളത്തില്‍ മാത്രം വസ്ത്രം കഴുകുവാന്‍ ശ്രദ്ധിക്കുക.
8. നല്ല ഫാബ്രിക് കണ്ടീഷ്ണര്‍ ഉപയോഗിക്കുക
വസ്ത്രങ്ങള്‍ അലക്കിയതിനുിശേഷം ഒരു പതിനഞ്ച് മിനിറ്റെങ്കിലും നല്ല ഫാബ്രിക് കണ്ടീഷ്ണറില്‍ മുക്കി വെയ്ക്കുന്നത് വസ്ത്രങ്ങള്‍ പുത്തന്‍പോലെ നിലനിര്‍ത്തുന്നതിനും നിറം വേഗം മങ്ങാതിരിക്കുന്നതിനും സഹായിക്കും. കൂടാതെ നല്ല സുഗന്ധം ഉണ്ടാകുന്നതിനും ഫാബ്രിക്കിനെ സോഫ്റ്റാക്കി നിലനിര്‍ത്തുന്നതിനും ഇത്തരം ഫാബ്രിക് കണ്ടീഷ്ണറുകള്‍ സഹായിക്കും.
9. വസ്ത്രങ്ങള്‍ തേക്കുമ്പോള്‍ ശ്രദ്ധിക്കുക
വസ്ത്രങ്ങള്‍ തേച്ചുമിനുക്കി കൊണ്ടു നടക്കുന്നത് നല്ല വൃത്തിയുടെ ലക്ഷണമാണ്. എന്നാല്‍, നല്ല ചൂടില്‍ നമ്മള്‍ വസ്ത്രങ്ങള്‍ തേയ്ക്കുന്നത് ആ വസ്ത്രത്തിന്റെ നിറം മങ്ങുന്നതിന് കാരണമാകുന്നു. കൂടാതെ, വസ്ത്രങ്ങള്‍ തേക്കുമ്പോള്‍ പ്രത്യേകിച്ച് കോട്ടണ്‍ ഫാബ്രിക് തേക്കുമ്പോള്‍ നല്ല വശത്ത് തേക്കുന്നതിനുപകരം അകംപുറം തിരിച്ചിട്ട് തേച്ചെടുക്കുന്നത് നിറം മങ്ങാതിരിക്കുവാന്‍ സഹായിക്കുന്ന ഘടകമാണ്.