കുഞ്ഞ് വളരുകയാണ്, 25ാം ആഴ്ചയിലെ പ്രധാന മാറ്റങ്ങളും ശ്രദ്ധിക്കേണ്ട കാര്യങ്ങളും

കുഞ്ഞിൻ്റെ ശരീരം വളരുന്ന സമയമാണിത്. വളരെ വലിയ മാറ്റങ്ങൾ കുഞ്ഞിനുണ്ടായിട്ടുണ്ട്. തലച്ചോറും അതുപോലെ ഞരമ്പുകളുമൊക്കെ രൂപപ്പെട്ടിരിക്കുകയാണ്. ഗർഭകാലത്തെ വേദനകൾ കുറയ്ക്കാൻ ഈ ഘട്ടത്തിൽ ചെയ്യുന്ന പല വ്യായാമങ്ങളും സഹായിക്കും. കുഞ്ഞ് വളരുന്നത് അനുസരിച്ച് അമ്മമാരുടെ വയറും വലുതാകുന്നുണ്ട്. കൂടാതെ ഭാരം കൂടാനും തുടങ്ങും.

മലബന്ധം, വേദന തുടങ്ങിയവയെല്ലാം ഈ ഘട്ടത്തിൽ പൊതുവെ ഗർഭിണികൾ അനുഭവിക്കുന്ന ബുദ്ധിമുട്ടുകളാണ്. ഗർഭപാത്രം വളരുന്നത് അനുസരിച്ച് സിയാറ്റിക് നാഡിയിൽ കൂടുതൽ സമ്മർദ്ദം ഉണ്ടാകാനുള്ള സാധ്യത കൂടുതലാണ്. അയൺ ഗുളികകൾ കഴിക്കുന്നത് മലബന്ധത്തിന് കാരണമാകാറുണ്ട്. ധാരാളം വെള്ളം കുടിക്കാനും നാരുകൾ അടങ്ങിയ ഭക്ഷണങ്ങൾ കഴിക്കാൻ ശ്രമിക്കുന്നതും മലബന്ധം കുറയ്ക്കാൻ നല്ലതാണ്. കൂടാതെ നെഞ്ച് എരിച്ചിലും ഈ ഘട്ടത്തിലെ പ്രധാന ലക്ഷണമാണ്. കാലിനും നടുവിനും വേദന ഉണ്ടാകുന്നത് പോലെ തന്നെ പെൽവിക് വേദനയും സ്വാഭാവികമാണ്.

കുഞ്ഞിന് തടി കൂടാൻ തുടങ്ങുന്ന സമയമാണിത്. കൊഴുപ്പ് വരുന്നത് അനുസരിച്ച് ചർമ്മത്തിലെ ചുളിവുകൾ മാറാൻ തുടങ്ങും. കൂടാതെ കുഞ്ഞിൻ്റെ തലച്ചോറിൽ കോർടെക്സ് പാളികൾ രൂപപ്പെടുന്നു. നേരത്തെ രൂപപ്പെട്ട തലച്ചോറിലെ മറ്റ് അവയവങ്ങളാണ് ഈ ഘട്ടത്തിൽ കുഞ്ഞിൻ്റെ പ്രവർത്തനങ്ങൾ നിയന്ത്രിക്കുന്നത്. തലച്ചോറിന് പുറമെ നാഡിവ്യവസ്ഥയും രൂപപ്പെട്ടിട്ടുണ്ട്. പുറത്ത് നിന്നുള്ള ശബ്ദങ്ങളോട് അവർ പ്രതികരിക്കുകയും ചെയ്യുന്നു. കുഞ്ഞിൻ്റെ അനക്കവും നല്ല രീതിയിൽ ഈ ഘട്ടത്തിൽ അറിയാൻ സാധിക്കും.

25 ആഴ്ച ഗർഭിണിയായിരിക്കുമ്പോൾ ബ്രാക്സ്റ്റൺ ഹിക്സ് സങ്കോചങ്ങൾ അനുഭവപ്പെടാം. ഇവ യഥാർത്ഥ സങ്കോചങ്ങളേക്കാൾ പരിശീലന സങ്കോചങ്ങളാണെന്ന് പറയാം. ശരീരത്തെ കുഞ്ഞിൻ്റെ ജനനത്തിനായി തയ്യാറാക്കാൻ ഇത് സഹായിക്കുന്നു. ഗർഭിണികളുടെ അടിവയറ്റിൽ ചെറിയ രീതിയിൽ ഇറുകിയതായി അനുഭവപ്പെടാം, കൂടാതെ മൃദുവായത് മുതൽ വേദനാജനകമായത് വരെയാകാം ഈ വേദന. അമിതമായി എന്തെങ്കിലും വേദനയോ അല്ലെങ്കിൽ അസ്വാഭാവികതയോ തോന്നിയാൽ തീ‍ർച്ചയായും ഡോക്ടറുടെ സഹായം തേടുക.