പുകവലി സ്ത്രീ പുരുഷ വന്ധ്യതയ്ക്ക് ഇടയാക്കുന്നത്....

പ്രത്യുല്‍പാദന ശേഷിയ്ക്ക് ഹോര്‍മോണ്‍ പ്രവര്‍ത്തനം അത്യാവശ്യമാണ്. പുരുഷനില്‍ ടെസ്റ്റോസ്റ്റിറോണ്‍ ഹോര്‍മോണും സ്ത്രീകളില്‍ ഈസ്ട്രജന്‍ പോലെയുള്ള ഹോര്‍മോണുകളും. പുകവലി ഇത്തരം ഹോര്‍മോണുകളുടെ താളം തെറ്റിയ്ക്കും. ഹോര്‍മോണ്‍ പ്രക്രിയകള്‍ തകരാറിലാകുന്നത് സ്ത്രീ പുരുഷ വന്ധ്യതയ്ക്ക് ഇടയാക്കുകയും ചെയ്യും.

പുരുഷന്മാരില്‍ ഉദ്ധാരണ പ്രശ്‌നങ്ങള്‍ക്ക് ഇടയാക്കുന്ന ഒന്നാണ്. ഇത് ചിലപ്പോഴെങ്കിലും പുരുഷ വന്ധ്യതയ്ക്ക് ഇടയാക്കുന്നു. പുരുഷന്മാരിലെ ബീജ സംഖ്യയേയും ഗുണത്തേയും ബാധിയ്ക്കുന്ന ഒന്നാണ് പുകവലിയെന്നത്. ഇതു പോലെ ബീജങ്ങള്‍ക്ക് ചലന ശേഷി കുറയുന്നതിനും പുകവലി കാരണമാകുന്നു. ഇതെല്ലാം പുരുഷ വന്ധ്യതയ്ക്ക് വഴിയൊരുക്കുന്ന ഘടകങ്ങളാണ്.

സ്ത്രീകളിലും വന്ധ്യതാ പ്രശ്‌നങ്ങള്‍ക്ക് ഇടയാക്കുന്ന ഒന്നാണ് പുകവലിയയെന്നത്. പുകവലിയ്ക്കുന്ന സ്ത്രീകളില്‍ ഫെല്ലോപിയന്‍ ട്യൂബില്‍ പ്രശ്‌നങ്ങളുണ്ടാകാനുളള സാധ്യതയേറെയാണ്. ഇത് ഫെല്ലോപിയന്‍ ട്യൂബില്‍ ബ്ലോക്കുണ്ടാക്കുന്നു. ഇതിനാല്‍ എക്ടോപിക് ഗര്‍ഭധാരണത്തിന്, അതായത് ഫെല്ലോപിയന്‍ ട്യൂബില്‍ ഗര്‍ഭധാരണം നടക്കുന്നതിന് സാധ്യത വര്‍ദ്ധിപ്പിയ്ക്കുന്നു.

സ്ത്രീകളില്‍ അണ്ഡത്തിന് നാശമുണ്ടാക്കുന്ന ഒന്നാണ് പുകവലിയെന്നത്. ഇത് ഗര്‍ഭധാരണത്തിന് തടസം നില്‍ക്കുന്നു. അബോര്‍ഷന്‍, വയറ്റില്‍ വളരുന്ന ഭ്രൂണത്തിന് തകരാറുകള്‍, വൈകല്യങ്ങള്‍ എന്നിവയെല്ലാം പുകവലി കാരണം സ്ത്രീകള്‍ക്കുണ്ടാകാവുന്ന വന്ധ്യതാ പ്രശ്‌നങ്ങളാണ്.

യൂട്രസ് ലൈനിംഗിന് പുകവലിയുണ്ടാക്കുന്ന പ്രശ്‌നങ്ങള്‍ കാരണം ഇംപ്ലാന്റേഷന്‍ പരാജയപ്പെടുന്നു. ഭ്രൂണം യൂട്രസ് ഭിത്തിയില്‍ പറ്റിച്ചേരുന്ന പ്രക്രിയയമാണ് ഇംപ്ലാന്റേഷന്‍. ഇതാണ് ശരിയായ അര്‍ത്ഥത്തില്‍ ഗര്‍ഭധാരണം എന്നു പറയാവുന്നത്. കാരണം അപ്പോള്‍ മുതലാണ് ഭ്രൂണം കുഞ്ഞിലേയ്ക്കുള്ള വളര്‍ച്ചയാരംഭിയ്ക്കുന്നത്.

ഗര്‍ഭധാരണം നടന്നാല്‍ തന്നെയും അബോര്‍ഷന്‍, മാസം തികയാതെയുള്ള പ്രസവം, കുഞ്ഞിനുണ്ടാകാന്‍ സാധ്യതയുള്ള വൈകല്യങ്ങള്‍ എന്നിവയ്‌ക്കെല്ലാം ഇത് ഇടയാക്കുന്നു. നേരിച്ച് പുകവലിയ്ക്കണം എന്നില്ല, പാസീവ് സ്‌മോക്കിംഗ്, അതായത് പുകവലിയ്ക്കുന്നവരുമായുള്ള സംസര്‍ഗം പോലും പ്രശ്‌നത്തിന് ഇടയാക്കുന്നു. പുകവലിയ്ക്കുന്നവരുടെ അടുത്ത് നില്‍ക്കുന്നതും ഈ പുക ശ്വസിയ്ക്കുന്നതും പോലും വന്ധ്യതയ്ക്ക് ഇടയാക്കുന്ന ഒന്നാണ്.