സെര്‍വികല്‍ മ്യൂകസ് സെര്‍വിക്‌സ് ഉല്‍പാദിപ്പിയ്ക്കുന്ന ഒന്നാണ്. ഗര്‍ഭധാരണത്തെ സ്വാധീനിയ്ക്കുന്ന ഈസ്ട്രജന്‍, പ്രൊജസ്‌ട്രോണ്‍ ഹോര്‍മോണുകള്‍ യോനീസ്രവം അഥവാ സെര്‍വിക്കല്‍ മ്യൂകസിനെ സ്വാധീനിയ്ക്കും. സെര്‍വിക്കല്‍ മ്യൂകസിന് ഓരോ മാസവും മാറ്റങ്ങള്‍ സംഭവിയ്ക്കുന്നുണ്ട്. ഇതിന്റെ അളവും മാറ്റങ്ങളും ഓരോ സ്ത്രീകളിലും വ്യത്യസ്തങ്ങളാണ്. കഴിയ്ക്കുന്ന ഭക്ഷണം, സ്‌ട്രെസ്, വ്യായാമം, കഴിയ്ക്കുന്ന മരുന്നുകള്‍ എന്നിവയെല്ലാം തന്നെ സെര്‍വിക്കല്‍ മ്യൂകസിനെ സ്വാധീനിയ്ക്കും. ഇത്തരം കാര്യങ്ങള്‍ തിരിച്ചറിഞ്ഞാല്‍ അത് എളുപ്പത്തില്‍ ഗർഭധാരണത്തിന് സഹായിക്കുന്നുണ്ട്. സെര്‍വിക്കല്‍ മ്യൂകസിന്‍റെ അളവ്അണ്ഡോത്പാദനം നടക്കുന്ന സമയത്ത് സ്വാഭാവികമായും വളരെ കൂടുതലായിരിക്കും. ഇത് തിരിച്ചറിഞ്ഞ് ഈ സമയത്ത് ലൈംഗിക ബന്ധത്തിൽ ഏർപ്പെട്ടാൽ ഗര്‍ഭധാരണത്തിനുള്ള സാധ്യത വളരെ കൂടുതലായിരിക്കും.
ഓവുലേഷനോട് അനുബന്ധിച്ച്
ആര്‍ത്തവ സമയത്ത് നമുക്ക് സെര്‍വിക്കല്‍ മ്യൂകസ് കണ്ടെത്താന്‍ സാധിയ്ക്കില്ല. അത് ബ്ലീഡിംഗ് കാരണമാണ്. ആര്‍ത്തവം കഴിഞ്ഞ് 7-8 ദിവസങ്ങളില്‍ സ്രവമുണ്ടെങ്കിലും ഇത് അധികം വലിയുന്നതോ പശിമയുളളതോ ആകില്ല. എന്നാല്‍ ഓവുലേഷനോട് അനുബന്ധിച്ച് ഇവ നല്ലതു പോലെ വലിയുന്ന സ്വഭാവമുള്ളതാകും. അതായത് കൂടുതല്‍ പശിമയുളളതാകും. ഇത് വിരലില്‍ എടുത്ത് നല്ലതു പോലെ സ്‌ട്രെച്ച് ചെയ്യുന്ന, അതായത് പൊട്ടിപ്പോകാതെയിരിയ്ക്കുന്നതാണ് ഓവുലേഷന്‍ നടക്കുന്നതിന്റെ അടയാളം എന്നു പറയാം. ഇതിനു ശേഷം, അതായത് ഓവുലേഷന്‍ ശേഷം ഈ മ്യൂകസ് പശിമ കുറഞ്ഞു വരും. അളവ് കുറയും. പിന്നീട് ആര്‍ത്തവം അടുക്കുമ്പോള്‍ ചിലര്‍ക്കിത് ചിലപ്പോള്‍ അളവു കൂടുയോ കുറയുകയോ ചെയ്യും.
സെര്‍വിക്കല്‍ മ്യൂകസ്
സെര്‍വിക്കല്‍ മ്യൂകസ് കൃത്യമായി നിരീക്ഷിച്ച് ചാര്‍ട്ട് ചെയ്യുകയെന്നതാണ് പ്രധാന വഴി. ഇത് അടിവസ്ത്രത്തില്‍ ഉണ്ടെങ്കില്‍ ഇതെടുത്ത് പരിശോധിയ്ക്കാം. അല്ലെങ്കില്‍ ടിഷ്യൂ പേപ്പര്‍ വച്ചോ പരിശോധിയ്ക്കാം. ഇത് കൃത്യമായി പരിശോധിയ്ക്കാന്‍ പ്രധാനപ്പെട്ട വഴിയുണ്ട്. ഇതിനായി കാലുകള്‍ അകറ്റി വച്ച് ഇരുന്നോ അല്ലെങ്കില്‍ ഒരു കാല്‍ അല്‍പം ഉയര്‍ത്തി വച്ചോ ഉള്ള പൊസിഷന്‍ സ്വീകരിയ്ക്കുക. പിന്നീട് ചൂണ്ടുവിരല്‍ ഉള്ളിലേയ്ക്ക് കടത്തി പതുക്കെ വട്ടം കറക്കി പുറത്തേയ്‌ക്കെടുക്കാം. വിരലില്‍ പറ്റിയിരിയ്ക്കുന്ന മ്യൂസക് കൂടുതലോ കുറവോ പശിമയുള്ളതോ മുട്ട വെള്ള പോലെയുള്ളതോ ആണോ എന്നു നോക്കുക.
സെര്‍വിക്കല്‍ മ്യൂകസും യോനീസ്രവവും
ഇതു പോലെ ചിലപ്പോള്‍ സെര്‍വിക്കല്‍ മ്യൂകസും യോനീസ്രവവും തമ്മില്‍ തിരിച്ചറിയാന്‍ ബുദ്ധിമുട്ടുണ്ടാകും. ഉദാഹരണത്തിന് സെക്‌സ് താല്‍പര്യമുണ്ടാകുമ്പോള്‍ യോനീഭാഗത്ത് സ്രവം ഉണ്ടാകാം. ഇത് സെര്‍വികല്‍ മ്യൂകസ് അല്ല. ഇൗ സമയത്ത് കളക്ട് ചെയ്യുന്നത് സെര്‍വികല്‍ മ്യൂകസ് തിരിച്ചറിയാന്‍ സഹായിക്കില്ല. സെര്‍വിക്കല്‍ കനാലില്‍ നിന്നും സെര്‍വികല്‍ മ്യൂകസ് അല്‍പം മര്‍ദമുണ്ടാകുന്ന അവസരത്തില്‍ പുറത്തു വരാം. ഉദാഹരണത്തിന് മലശോധനയുടെ സമയത്ത് സെര്‍വിക്കല്‍ മ്യൂകസ് പുറത്തു വരാന്‍ സാധ്യതയുണ്ട്. ഇതു പോലെ കീഗെല്‍ എക്‌സര്‍സൈസ് ചെയ്യുമ്പോളും ഇത് വരാന്‍ എളുപ്പമാണ്.
പിസിഒഎസ്
പിസിഒഎസ് ഉള്ളവര്‍ക്ക് ഇത്തരം സെര്‍വികല്‍ മ്യൂകസ് ഘടനയില്‍ വ്യത്യാസമുണ്ടാകാം. ഈ പ്രശ്‌നമുള്ളവര്‍ക്ക് വെള്ളം പോലെയുള്ളത് ഉണ്ടാകാനാണ് സാധ്യതയുള്ളത്. ഹോര്‍മോണ്‍ പ്രശ്‌നങ്ങള്‍ ഇല്ലെങ്കിലും ഗര്‍ഭധാരണത്തിന് ബുദ്ധിമുട്ടുണ്ടാകുന്നവരുണ്ട്. ഇതില്‍ മ്യൂകസ് കാര്യവും ശ്രദ്ധിയ്ക്കണം. കാരണം പല വിധ കാരണങ്ങളാല്‍ ഓവുലേഷന്‍ നടന്നാലും സെര്‍വിക്കല്‍ മ്യൂകസ് ഉല്‍പാദിപ്പിയ്ക്കപ്പെടാറില്ല. ഇത്തരം അവസ്ഥയില്‍ ഗര്‍ഭധാരണം ബുദ്ധിമുട്ടാകാം. ഇതുപോലെ തന്നെ സാധാരണ വെറും യോനീസ്രവമല്ല, സെര്‍വിക്കല്‍ മ്യൂകസ് എന്നതും ഓര്‍ക്കുക. സെര്‍വിക്കല്‍ മ്യൂകസ് അല്‍പം കട്ടിയുള്ള ഒന്നാകും. Also read: ഗർഭിണി കുടിക്കണം കാഷ്യൂ മിൽക്ക്, കാരണം