ഇംപ്ലാന്റേഷന്‍ ബ്ലീഡിംഗും ആര്‍ത്തവവും തിരിച്ചറിയാം

പലപ്പോഴും ഇംപ്ലാന്റേഷന്‍ സമയത്ത് സ്ത്രീകള്‍ക്ക് ബ്ലീഡിംഗ് ഉണ്ടാകാറുണ്ട്. ഇംപ്ലാന്റേഷന്‍ സമയത്ത് ബ്ലീഡിംഗ് ഉണ്ടാകുന്നതിന് കാരണവുമുണ്ട്. ബീജ-അണ്ഡ സംയോഗം നടന്നുണ്ടാകുന്ന സൈഗോട്ട് യൂട്രസില്‍ എത്തിച്ചേര്‍ന്ന ശേഷം യൂട്രസ് ഭിത്തിയില്‍ പറ്റിപ്പിടിയ്ക്കുമ്പോള്‍ ഇവിടുള്ള ചെറിയ രക്തക്കുഴലുകള്‍ പൊട്ടുന്നു. ഇതാണ് ഇംപ്ലാന്റേഷന്‍ ബ്ലീഡിംഗ് ഉണ്ടാകാനുള്ള കാരണം.

ഇത് എല്ലാവരിലും ഇല്ലെങ്കില്‍ പോലും ചിലരിലുണ്ടാകും. പലരും ഇത് ആര്‍ത്തവ ബ്ലീഡിംഗ് എന്ന് തെറ്റിദ്ധരിയ്ക്കുകയും ചെയ്യാറുണ്ട്. എന്നാല്‍ ആര്‍ത്തവ സമയത്തെ രക്തസ്രാവവും ഇംപ്ലാന്റേഷന്‍ ബ്ലീഡിംഗും തമ്മില്‍ പല തരത്തിലെ വ്യത്യാസങ്ങളുമുണ്ട്.

ഇംപ്ലാന്റേഷന്‍ ബ്ലീഡിംഗ് എന്നത് ചെറിയ സ്‌പോട്ടിംഗ് പോലുള്ള ബ്ലീഡിംഗായിരിയ്ക്കുമെന്ന് Dr Gayathri D Kamath, Senior Consultant - Obstetrics & Gynecology, Fortis Hospitals, Bannerghatta Road, Bangalore പറയുന്നു. ഗര്‍ഭധാരണം നടന്ന് 6-12 ദിവസങ്ങള്‍ക്കുള്ളിലായിരിയ്ക്കും ഇത്തരം ഇംപ്ലാന്റേഷന്‍ ബ്ലീഡിംഗ് കാണുന്നത്. വളരെ കുറവ് മാത്രം കണ്ടു വരുന്ന ഇത്തരം ബ്ലീഡിംഗ് പലരും ലൈറ്റ് പിരീഡ് അല്ലെങ്കില്‍ ലൈറ്റ് സ്‌പോട്ടിംഗ് എന്ന രീതിയില്‍ എടുക്കും. ഇത് പിങ്ക് നിറത്തിലോ ബ്രൗണ്‍ നിറത്തിലോ ആയിരിയ്ക്കും കാണപ്പെടുന്നത്.

ചിലപ്പോള്‍ കുറച്ചു മണിക്കൂറുകള്‍ അല്ലെങ്കില്‍ കുറച്ച് ദിവസങ്ങള്‍ മാത്രമാകും ഇംപ്ലാന്റേഷന്‍ ബ്ലീഡിംഗ് ഉള്ളത്. ചിലപ്പോള്‍ ഇത് സ്ത്രീകള്‍ തിരിച്ചറിയുക പോലുമില്ല. കാരണം അത്രത്തോളം ലൈറ്റായിരിയ്ക്കും ഇത്. ചിലര്‍ക്ക് ഇത് ചെറിയ വയറുവേദന പോലുള്ള തോന്നലുണ്ടാക്കാം. ഇത്തരം ഇംപ്ലാന്റേഷന്‍ ബ്ലീഡിംഗ് ഗര്‍ഭധാരണത്തിന്റെ സാധാരണ ലക്ഷണം മാത്രമാണ്. എന്നാല്‍ ബ്ലീഡിംഗ് കനത്തതോ കൂടുതല്‍ വേദനയോടെയോ ഉണ്ടെങ്കില്‍ മെഡിക്കല്‍ സഹായം തേടുന്നതാണ് നല്ലതെന്നും ഡോക്ടര്‍ പറയുന്നു.

ഇതും ആര്‍ത്തവവും തിരിച്ചറിയാന്‍ വഴികളുണ്ട്. മാസമുറ ബ്ലീഡിംഗ് എങ്കില്‍ 5-8 ദിവസവും വരെ ബ്ലീഡിംഗുണ്ടാകും. എന്നാല്‍ ഇംപ്ലാന്റേഷന്‍ ബ്ലീഡിംഗ് വളരെ കുറവ് മണിക്കൂറുകളേ ഉണ്ടാകൂ. ഇതു പോലെ സാധാരണ ആര്‍ത്തവ ബ്ലീഡിംഗ് കൂടുതലായി അവസാന ദിവസങ്ങളില്‍ കുറഞ്ഞു വരുന്നു. ഇംപ്ലാന്റേഷന്‍ ബ്ലീഡിംഗ് ചിലപ്പോള്‍ തിരിച്ചറിയാന്‍ പോലും കഴിയാത്തത്ര ലൈറ്റായിരിയ്ക്കും. സ്‌പോട്ടിംഗ് പോലെയാകും ചിലരില്‍ ഇത്. രക്തസ്രാവമായി ഉണ്ടാകില്ല.

ആര്‍ത്തവ സമയത്ത് വേദനയും മറ്റ് അസ്വസ്ഥതകളും സാധാരണയാണ്. ഇംപ്ലാന്റേഷന്‍ ബ്ലീഡിംഗ് ഇത്തരത്തിലെ അസ്വസ്ഥതകളുണ്ടാക്കാറില്ല. ചില സ്ത്രീകളില്‍ മാത്രം ഇത് ചെറിയ വേദനയുണ്ടാക്കും. എങ്കിലും ഇത് ആര്‍ത്തവ സമയത്തെ വേദനയില്‍ നിന്നും തിരിച്ചറിയാന്‍ എളുപ്പമാണ്. ആര്‍ത്തവ സമയത്ത് രക്തം കട്ടയായി പോകുന്നത്, അതായത് ബ്ലഡ് ക്ലോട്ടുകളുണ്ടാകുന്നത് സാധാരണയാണ്.

എന്നാല്‍ ഇംപ്ലാന്റേഷന്‍ ബ്ലീഡിംഗില്‍ ഇതുണ്ടാകുന്നില്ല. ഇംപ്ലാന്റേഷന്‍ ശേഷം, ഗര്‍ഭധാരണം ഉറപ്പിച്ച ശേഷം കൂടുതല്‍ ബ്ലീഡിംഗ് ഉണ്ടാകുന്നുവെങ്കില്‍ ശ്രദ്ധ വേണം. ഇതു പോലെ വേദനയും. അബോര്‍ഷന്‍ പോലുള്ള സാധ്യതകള്‍ തള്ളിക്കളയാനാകില്ലെന്നര്‍ത്ഥം.