ഇത്തരം ഗര്‍ഭപരിശോധന നടത്തുമ്പോള്‍
എന്നാല്‍ ചിലപ്പോള്‍ ഇത്തരം ഗര്‍ഭപരിശോധന നടത്തുമ്പോള്‍ പരിശോധനാ കിറ്റില്‍ രണ്ടു വര കാണാം. ഇതില്‍ ഒന്നു തീരെ മങ്ങിയ വരയായിരിയ്ക്കും. രണ്ടു വര എന്നാല്‍ ഗര്‍ഭധാരണം എന്നാണ് അര്‍ത്ഥം. എന്നാല്‍ തീരെ മങ്ങിയ വര ഗര്‍ഭധാരണമോ അല്ലയോ, എന്താണ് ഇത്തരത്തിലെ മങ്ങിയ വര തുടങ്ങി പല സംശയങ്ങള്‍ക്കും കാരണമാക്കിയേക്കും. ഗര്‍ഭമുണ്ടോ, ഉണ്ട്, എന്നാല്‍ ഇല്ലേ ഇല്ല എന്നുള്ള അവസ്ഥയിലേയ്‌ക്കെത്തിയ്ക്കുന്ന ഒന്നാണിത്. പലര്‍ക്കും ഇത്തരം മങ്ങിയ വര ആശങ്കയുണ്ടാക്കുകയും ചെയ്യുന്നു.
ബീജവും അണ്ഡവും തമ്മില്‍ യോജിച്ചാലും
ബീജവും അണ്ഡവും തമ്മില്‍ യോജിച്ചാലും ഗര്‍ഭധാരണം എന്നു ശരിയ്ക്കും പറയാനാകില്ല. ഫെല്ലോപിയന്‍ ട്യൂബിലാണ് ഗര്‍ഭധാരണം നടക്കുക. ഇത് സഞ്ചരിച്ച് പിന്നീട് ഗര്‍ഭപാത്രത്തില്‍ എത്തി ഗര്‍ഭാപാത്ര ഭിത്തിയില്‍ പറ്റിപ്പിടിച്ചു വളരുമ്പോഴാണ് ശരിയ്ക്കും ഗര്‍ഭം എന്നു പറയാം. ഫെര്‍ട്ടിലൈസേഷന്‍ നടന്ന് മോറുള സ്‌റ്റേജിലെ ഭ്രൂണം ഗര്‍ഭപാത്രത്തില്‍ എത്തുന്നത്. ഭ്രൂണം ഇംപ്ലാന്റ് ചെയ്യുമ്പോള്‍, അതായത് ഗര്‍ഭപാത്ര ഭിത്തിയില്‍ പറ്റിപ്പിടിച്ചു വളരുമ്പോള്‍ ബി-എച്ച്‌സിജി എന്ന ഹോര്‍മോണ്‍, അതായത് ബീറ്റാ കോണിയോണിക് ഗൊണാഡോട്രോഫിന്‍ എന്ന ഹോര്‍മോണ്‍ ഉല്‍പാദിപ്പിയ്ക്കപ്പെടുന്നു. ഈ ഹോര്‍മോണ്‍ ഇവിടെ നിന്നും മറ്റു രക്തക്കുഴലുകളിലേയ്ക്കു കടക്കുന്നു. അതായത് ഈ ഹോര്‍മോണിന്റെ അംശം സ്ത്രീയുടെ ശരീരത്തില്‍ എല്ലായിടത്തും എത്തിപ്പെടുന്നു.
ഈ ഹോര്‍മോണ്‍ സാന്നിധ്യം
ഈ ഹോര്‍മോണ്‍ സാന്നിധ്യം മൂത്രത്തില്‍ വരുമ്പോഴാണ് മൂത്ര പരിശോധനയിലൂടെ ഗര്‍ഭധാരണം ഉറപ്പിയ്ക്കാന്‍ പറ്റുന്നത്. അതായത് ഗര്‍ഭിണിയില്‍ മാത്രമാണ് ഈ ഹോര്‍മോണ്‍ ഉല്‍പാദിപ്പിയ്ക്കപ്പെടുന്നത്. ഈ ഹോര്‍മോണ്‍ സാന്നിധ്യം ഗര്‍ഭധാരണം നടന്നുവെന്നതിന് തെളിവാണ്. എന്നാല്‍ ശരീരത്തില്‍ ഈ ഹോര്‍മോണ്‍ ഉല്‍പാദിപ്പിച്ചാലും മറ്റു ഭാഗങ്ങളിലേയ്ക്ക് പെട്ടെന്ന് എത്തിപ്പെടുന്നില്ല. എച്ച്‌സിജി മൂത്രത്തില്‍ എത്തിച്ചേര്‍ന്നിട്ടില്ല, എന്നാല്‍ ഗര്‍ഭധാരണം നടക്കുകയും ചെയ്തിട്ടുണ്ടെങ്കില്‍ ഈ കാലയളവില്‍ നടക്കുന്ന ഗര്‍ഭ പരിശോധനാ ഫലം ശരിയാകില്ല.
ഇതു തീരെ കുറവാകുമ്പോഴും
ഇതു തീരെ കുറവാകുമ്പോഴും രണ്ടാമത്തെ വര മങ്ങിയതായി കാണപ്പെടും. ഇതിനാല്‍ തന്നെ ആര്‍ത്തവം തെറ്റിയതിന് തൊട്ടടുത്തായോ ഇല്ലെങ്കില്‍ ഇതിനു മുന്‍പോ ആയി ഗര്‍ഭധാരണ പരിശോധനകള്‍ നടത്തുന്നുവെങ്കില്‍ ഇത്തരം ലൈന്‍ കാണപ്പെടും. അതായത് മങ്ങിയ ലൈന്‍. ചിലപ്പോള്‍ ഗര്‍ഭിണിയാണെങ്കില്‍ തന്നെയും നെഗറ്റീവ് ഫലം തരാം. ഇതിനാല്‍ തന്നെ ഓവുലേഷന്‍ ശേഷം 14 ദിവസം കഴിഞ്ഞ് ഗര്‍ഭപരിശോധന നടത്തുന്നതാണ് നല്ലത്. അതായത് അടുത്ത ആര്‍ത്തവത്തിന്റെ അടുത്ത്. കാരണം സാധാരണ 28 ദിവസം ആര്‍ത്തവ ചക്രമെങ്കില്‍ 14-ാമത്തെ ദിവസം ഓവുലേഷന്‍ നടക്കാന്‍ സാധ്യതയുണ്ട്.
പരിശോധനയില്‍ വരുന്ന ചില തെറ്റുകളും
ഇതു പോലെ തന്നെ പരിശോധനയില്‍ വരുന്ന ചില തെറ്റുകളും ഇത്തരം ലൈനുകളില്‍ തെറ്റിനു കാരണമാകും. ഗര്‍ഭപരിശോധന നടത്തിയാല്‍ ഉടന്‍ തന്നെ പരിശോധനാ ഫലം നോക്കണം. അതായത് കിററില്‍ പറഞ്ഞ ഉടന്‍. എന്നാലേ കൃത്യ ഫലം നല്‍കൂ. അല്ലാതെ പറഞ്ഞ സമയ പരിധി കഴിഞ്ഞ് ഇതില്‍ വരകളുണ്ടെങ്കില്‍ ഇത് ശരിയാകണം എന്നില്ല.
രാവിലെ മൂത്ര പരിശോധന നടത്തുന്നതാണ് നല്ലതെന്നു പറയാം. കാരണം ഗര്‍ഭത്തിന്റെ തുടക്കത്തില്‍ ഈ ഹോര്‍മോണ്‍ തോത് വളരെ കുറവായിരിയ്ക്കും. രാവിലെ നീണ്ട നേരത്തെ ഇടവേളയ്ക്കു ശേഷം നാം വിസര്‍ജിയ്ക്കുന്ന മൂത്രത്തില്‍ ഈ ഹോര്‍മോണ്‍ തോതു കണ്ടെത്തുവാന്‍ സാധ്യതയേറെയാണ്. കാരണം വെളളം കുടിച്ചാലോ മറ്റോ മൂത്ര സാന്ദ്രത കുറയും. അപ്പോള്‍ ഈ പരിശോധനാ ഫലത്തിലും വ്യത്യാസം വരാം. എന്നാല്‍ ഗര്‍ഭം ആറാഴ്ച വരെയെത്തിയാല്‍ എപ്പോള്‍ മൂത്രം പരിശോധിച്ചാലും ഫലം ലഭിയ്ക്കാം. കാരണം ഈ സമയത്ത് എച്ച്‌സിജി ഹോര്‍മോണ്‍ നല്ല രീതിയില്‍ ശരീരത്തിലുണ്ടായിക്കഴിഞ്ഞിരിയ്ക്കും.
ഗര്‍ഭധാരണം പ്രതീക്ഷിയ്ക്കുന്നുവെങ്കില്‍
ഓവുലേഷന്‍ സമയത്തു ബന്ധപ്പെട്ട് ഗര്‍ഭധാരണം പ്രതീക്ഷിയ്ക്കുന്നുവെങ്കില്‍ ഓവുലേഷന്‍ ശേഷം ഉടന്‍ പരിശോധന നടത്തിയാല്‍ ഫലം തരില്ല. നേരത്തെ പറഞ്ഞ കാലയളവ് കാത്തിരിയ്ക്കുക. കാരണം ഭ്രൂണം ഉറച്ച് ഗര്‍ഭം ഉറപ്പാക്കാന്‍ ശരീരമെടുക്കുന്ന കാലയളവാണ് ഇത്. ഇതല്ലാതെ ഒരു ദിവസം ടെസ്‌ററു ചെയ്തു, പിന്നെ അടുത്ത ദിവസം വീണ്ടും ടെസ്റ്റു ചെയ്തു. പൊസറ്റീവ് പ്രതീക്ഷിച്ച ഫലം നെഗറ്റീവ് ആയി എന്നു കരുതി നിരാശപ്പെടേണ്ടതില്ല. ഓവുലേഷന്‍ കഴിഞ്ഞ് അടുത്ത ആര്‍ത്തവം ആയില്ലെങ്കില്‍ അന്നേ ദിവസം, അല്ലെങ്കില്‍ 14 ദിവസത്തെ ഇടവേള എന്ന രീതിയില്‍ പരിശോധന നടത്തുക. Also read: ബ്ലാക് ഹെഡ്‌സ് കളയാന്‍ പേസ്റ്റില്‍ ഉപ്പ്
കാലപ്പഴക്കം ചെന്ന കിറ്റുകള്‍
ഇതു പോലെ കാലപ്പഴക്കം ചെന്ന കിറ്റുകള്‍ ഉപയോഗിയ്ക്കരുത്. ഫലത്തില്‍ തെറ്റുണ്ടാകാം. ആര്‍ത്തവത്തിനു മുന്‍പും ഇതു പോലെ ഓവുലേഷന്‍ കഴിഞ്ഞ് തൊട്ടടുത്ത ദിവസങ്ങളിലും ടെസ്റ്റു നടത്തിയാല്‍ നെഗറ്റീവ് ഫലമോ മങ്ങിയ വരയോ കാണപ്പെടാം. ചിലപ്പോള്‍ ഈ കാലയളവില്‍ ചില പ്രത്യേക മരുന്നുകള്‍ കഴിയ്ക്കുന്നതും ഈ ടെസ്റ്റിന്റെ ഫലം തെറ്റായി വരാന്‍ കാരണമാകും. പ്രധാനമായും എച്ച്‌സിജി ഹോര്‍മോണ്‍ സാന്നിധ്യം കുറയുന്നത് ഇത്തരം മങ്ങിയ വരയ്ക്കു കാരണമാകുന്നു. Also read: വ്യായാമം ഇനി ചവിട്ടുപടികളിൽ നിന്ന് തുടങ്ങാം, എളുപ്പത്തിൽ ഇങ്ങനെ