കുഞ്ഞാവ കാത്തുവയ്ക്കും അദ്ഭുതങ്ങള്‍.....

നോര്‍മല്‍ പ്രസവമെങ്കില്‍ കുഞ്ഞുങ്ങളുടെ തല അല്‍പം നീണ്ടതാകാന്‍ സാധ്യതയേറെയാണ്. ഇതിന് കാരണം നോര്‍മല്‍ പ്രസവമെന്ന പ്രക്രിയയില്‍ ബര്‍ത്ത് കനാലിലുടെ അമര്‍ന്ന് 12 മണിക്കൂറെങ്കിലും കുഞ്ഞിന് ചെലവിടേണ്ടി വരുന്നു. ഇതാണ് കുഞ്ഞിന്റെ തല അല്‍പം നീളമുള്ളതാകാന്‍ കാരണമാകുന്നത്. ഇത് പിന്നീട് തനിയെ നേരെയാകും. ചിലര്‍ കുളിപ്പിയ്ക്കുമ്പോള്‍ തല ഉഴിയാറുണ്ട്. ഇങ്ങനെ ചെയ്യുകയെങ്കില്‍ തന്നെ അധികം ബലം കൊടുക്കാതെ ചെയ്യുക. അതല്ലെങ്കിലും കുഞ്ഞിന്റെ തലയുടെ ആകൃതി അല്‍പം കഴിയുമ്പോള്‍ ശരിയാകുക തന്നെ ചെയ്യും.

ഇതു പോലെ ജനിച്ച കുഞ്ഞുങ്ങളുടെ കാലുകള്‍ വളഞ്ഞതാകും. ഇതിന് കാരണവും ഇതേ ആകൃതിയില്‍ ഇവര്‍ ഗര്‍ഭപാത്രത്തില്‍ ചിലവിടുന്നതാകും. യൂട്രസിലെ കുറവ് സ്ഥലത്താണ് ഇവര്‍ ഇത്രയും കാലം ചെലവിടുന്നത്. വലിപ്പമേറുമ്പോള്‍ അതിന് അനുസരിച്ച് കാലുകള്‍ വളച്ചാണ് ഈ പരിമിതമായ സ്ഥലത്ത് കഴിയാന്‍ ഇവര്‍ സൗകര്യം കണ്ടെത്തുന്നത്. ഇതാണ് കാലുകള്‍ വളയാന്‍ കാരണമാകുന്നത്. ഇതേ രീതിയില്‍ തന്നെയാണ് ഇവര്‍ പുറത്തു വന്നാലും കുറച്ചു കാലം കാലുകള്‍ വയ്ക്കുക. ഇത് സ്വാഭാവിക രീതിയിലാകാന്‍ സമയം പിടിയ്ക്കും.

അമ്മയുടെ ഗന്ധം കുഞ്ഞ് പെട്ടെന്ന് തിരിച്ചറിയുന്നു. അത് അവര്‍ക്ക് ശാന്തമാകുവാനുള്ള പ്രേരണവും സുരക്ഷിതത്വവുമാണ്. ഇതു പോലെ കുഞ്ഞിന് മുതിര്‍ന്നവരേക്കാള്‍ എല്ലുകള്‍ കൂടുതലാണ്. 300 എല്ലുകളോളം ജനിയ്ക്കുമ്പോള്‍ ഉണ്ടാകും. ഇവയില്‍ ചിലത് പിന്നീട് ഒരുമിച്ചു ചേരുന്നു, ചിലത് ബലമുള്ളതാകുന്നു. കുഞ്ഞ് ജനിച്ച് ആദ്യ ദിവസങ്ങളില്‍ തന്നെ വെയ്റ്റ് കുറയുന്നത് സാധാരണയാണ്. ജനിക്കുമ്പോളുള്ളതിനേക്കാള്‍ 5-10 ശതമാനം വരെ ഭാരം കുറയുന്നു.

ഏതാണ്ട് ഒരു വയസിലാണ് കുഞ്ഞുങ്ങള്‍ സംസാരിയ്ക്കാന്‍ തുടങ്ങുന്നതെങ്കിലും ഇവര്‍ സംസാരിയ്ക്കാന്‍ 23 ആഴ്ചകളില്‍ തന്നെ പഠിയ്ക്കുമെന്നതാണ് വാസ്തവം. സംസാരിച്ചു തുടങ്ങുന്നതിനേക്കാള്‍ മുന്‍പേ അവര്‍ ഇത് പഠിയ്ക്കുന്നു. നിങ്ങളുടെ സ്വരവും തിരിച്ചറിയുന്നു. അതായത് വയറ്റില്‍ വച്ചു തന്നെ. ഇതു പോലെ ജനിച്ച കുഞ്ഞുങ്ങളുടെ കണ്ണിന്റെ കാഴ്ച കുറവാണ്. 20-30 സെന്റീമീറ്റര്‍ വരെ മാത്രമേ ഇവര്‍ക്ക് കാഴ്ചശക്തിയുള്ളൂ. ബാക്കിയെല്ലാം ഇവര്‍ക്ക് അവ്യക്തമായേ കാണാന്‍ സാധിയ്ക്കൂ.