സ്ത്രീയുടെ ശരീരം തന്നെ പലപ്പോഴും വന്ധ്യതയുടെ പല സൂചനകളും കാണിച്ചു തരുന്നുമുണ്ട്. പലപ്പോഴും നാം ശ്രദ്ധിയ്ക്കാത്തതായിരിയ്ക്കും ഇതു തിരിച്ചറിയാന്‍ വൈകുന്നതിന്റെ കാരണവും. ഇത്തരം ചില സൂചനകളെക്കുറിച്ചറിയൂ.
ആര്‍ത്തവം
ആര്‍ത്തവം ഇല്ലാതിരിയ്ക്കുന്നതും ആര്‍ത്തവം ഉണ്ടായിരുന്നിട്ടു പെട്ടെന്നു തന്നെ നിലയ്ക്കുന്നതുമെല്ലാം തന്നെ സ്ത്രീ വന്ധ്യതാ പ്രശ്‌നങ്ങള്‍ക്കുള്ള സൂചന നല്‍കുന്ന ചിലതാണ്. ആര്‍ത്തവ സമയത്തു വേദനയുണ്ടാകുന്നതു സാധാരണയാണ്. എന്നാല്‍ സഹിയ്ക്കാന്‍ കഴിയാത്ത വയറു വേദന സൂക്ഷിയ്‌ക്കേണ്ട ഒന്നാണ്. ഇത് എന്‍ഡോമെട്രിയോസിസ്, ഫൈബ്രോയ്ഡുകള്‍, ഒവേറിയന്‍ സിസ്റ്റുകള്‍ തുടങ്ങിയ പല കാരണങ്ങളാലുമുണ്ടാകും. വേണ്ട രീതിയില്‍ ചികിത്സിച്ചില്ലെങ്കില്‍ ഇത് ചിലപ്പോള്‍ സ്ത്രീ വന്ധ്യതയ്ക്കുള്ള കാരണമാകും.
സ്ത്രീയിലെ ആര്‍ത്തവം
സ്ത്രീയിലെ ആര്‍ത്തവം വന്ധ്യതാ പ്രശ്‌നങ്ങള്‍ക്കുള്ള ആദ്യ സൂചനയാണ്. ക്രമ രഹിതമായ ആര്‍ത്തവം, ബ്ലീഡിംഗ് അളവ് സാധാരണയില്‍ നിന്നും കൂടുകയോ കുറയുകയോ ചെയ്യുന്നത് എന്നതെല്ലാം തന്നെ ചിലപ്പോള്‍ സ്ത്രീ വന്ധ്യതയ്ക്കുള്ള സൂചനകളാണ്. ആര്‍ത്തവ ക്രമക്കേടുകള്‍ ഇതിനുള്ള പ്രധാനപ്പെട്ട സൂചന തന്നെയാണ്.
സ്ത്രീകളുടെ മാറിടങ്ങളില്‍ നിന്നും
സ്ത്രീകളുടെ മാറിടങ്ങളില്‍ നിന്നും ചിലപ്പോള്‍ ഡിസ്ചാര്‍ജുണ്ടാകാറുണ്ട്. ഇതിനു പല തരത്തിലെ കാരണങ്ങള്‍ ഉണ്ടാകുകയും ചെയ്യും. എന്നാല്‍ പാല്‍ നിറത്തിലെ ഡിസ്ചാര്‍ജുണ്ടാകുന്നത് പ്രോലാക്ടിന്‍ എന്ന പിറ്റിയൂറ്ററി ഹോര്‍മോണ്‍ ഉല്‍പാദനം അധികരിയ്ക്കുന്നതിനെയാണ് കാണിയ്ക്കുന്നത്. ഇത് വന്ധ്യതാ ലക്ഷണമാണ്. ഹോര്‍മോണ്‍ പ്രശ്‌നങ്ങളാണ് ഇതു സൂചന നല്‍കുന്നത്.
ആര്‍ത്തവത്തിന് ഇടയിലുള്ള ദിവസങ്ങള്‍
ആര്‍ത്തവത്തിന് ഇടയിലുള്ള ദിവസങ്ങള്‍ ഓരോ തവണയും വ്യത്യസ്തമാകുന്നതും ആര്‍ത്തവ ക്രമക്കേടുകള്‍ക്കുള്ള സൂചന തന്നെയാണ്. ഇതിനുള്ള കാരണങ്ങള്‍ ഒവേറിയന്‍ ഏജിംഗ്, യൂട്രൈന്‍ അല്ലെങ്കില്‍ ഇന്‍ഡോമെട്രിയില്‍ ഡിസ്ഫംഗ്ഷന്‍, ഓവുലേറ്ററി ഡിസ്ഫംഗ്ഷന്‍ എന്നിവ കാരണമാകാം. ഇവ തിരിച്ചറിയാല്‍ സാധിച്ചാല്‍ തന്നെ പലപ്പോഴും വേണ്ടത്ര ചികിത്സകള്‍ നേരത്തെ തന്നെ കൈക്കൊണ്ട് പരിഹാരം കണ്ടെത്താന്‍ സാധിയ്ക്കുകയും ചെയ്യും.
സ്ത്രീകളില്‍ ചുണ്ട്, താടി, നെഞ്ച് എന്നിവിടങ്ങളിലെ രോമ വളര്‍ച്ച
സ്ത്രീകളില്‍ ചുണ്ട്, താടി, നെഞ്ച് എന്നിവിടങ്ങളിലെ രോമ വളര്‍ച്ച, ലൈംഗിക കഴിവിലും താല്‍പര്യത്തിലും വ്യത്യാസങ്ങള്‍ വരിക എന്നിവയും ശ്രദ്ധിയ്‌ക്കേണ്ടതാണ്. ഇതിനു പുറമേ ഭാരം കൂടുക, മുടിയുടെ ഉള്ളു കുറയുക, കൊഴിയുക എന്നിവയെല്ലാം തന്നെ സ്ത്രീയുടെ വന്ധ്യതാ പ്രശ്‌നങ്ങളിലേയ്ക്കുള്ള ചൂണ്ടുപലകയാണ്. ഹോര്‍മോണ്‍ പ്രശ്‌നങ്ങളാണ് ഇതു സൂചന നല്‍കുന്നത്.