ശീതകാലത്ത് ചൂടോടെ കഴിക്കാനിതാ സ്വാദിഷ്ടമായ സൂപ്പ്

തണുപ്പ്കാലത്ത് ശരീരത്തെ ഊര്‍ജ്ജസ്വലതയോടെ കാക്കാൻ കുറച്ച് സൂപ്പ് കഴിച്ചാലോ. കുരുമുളക് രസം കഴിക്കുന്നത് ശീതകാലത്തെ മടിയകറ്റാൻ ഉത്തമമാണ്. ഇക്കാലത്ത് പനിയും കഫക്കെട്ടും പിടിപെടാനുള്ള സാധ്യത വളരെയേറെ കൂടുതലാണ്. ഇവയെ ചെറുക്കാനും ഈ സ്വാദിഷ്ടമായ സൂപ്പിന് കഴിയുമെന്ന് കേട്ടാല്‍ ഒട്ടും തന്നെ അതിശയിക്കേണ്ട.

വളരെ പെട്ടെന്ന് തന്നെ കുരുമുളക് രസം ഉണ്ടാക്കാനാകും

ആവശ്യമുള്ള സാധനങ്ങള്‍

കുരുമുളക് പൊടി - ഒരു ടീസ്‍‍പൂൺ
ജീരകം - കാൽ ടീസ്‍‍പൂൺ അരച്ചത്
മഞ്ഞൾപ്പൊടി - കാൽ ടീസ്‍‍പൂൺ
അല്‍പം മല്ലിയില
10 ഗ്രാം നെയ്
പുളി - വലിയ നെല്ലിക്കാവലുപ്പത്തിൽ വെള്ളത്തിൽ ഇട്ട് കുറച്ചുകഴിഞ്ഞ് പിഴിഞ്ഞ് വെള്ളം എടുക്കുക. ചൂടുള്ള വെള്ളത്തിൽ ഇട്ടാൽ വേഗം പിഴിഞ്ഞെടുക്കാം. അര ഗ്ലാസ്സ് വെള്ളം ഇതിനായി എടുക്കാം.
ശർക്കര - ഒരു ആണി.
ഉപ്പ്
വറവിടാൻ, കടുക്, രണ്ടു വലിയ മുളക്, കറിവേപ്പില.

പുളിവെള്ളവും, കുരുമുളകുപൊടി, മഞ്ഞൾപ്പൊടി, ഉപ്പ്, എന്നിവ അടുപ്പത്ത് തിളയ്ക്കാൻ വയ്ക്കുക. കുറച്ച് വെള്ളവും ചേർക്കാം. വേവ് പകുതിയായാൽ ശർക്കര ചേര്‍ക്കാം. ശർക്കരയും വെന്ത് യോജിച്ചാൽ ജീരകം അരച്ചത് ചേർക്കുക. അതും യോജിച്ച് തിളച്ചാൽ നെയ്യില്‍ വറുത്ത വറവിടുക. കുരുമുളക് പൊടി കൂടുതൽ ചേർക്കണമെങ്കിൽ ഓരോരുത്തരുടെ ഇഷ്ടം പോലെ ചേര്‍ക്കാം. ജീരകം അരക്കുന്നതിനു പകരം ജീരകപ്പൊടിയും ചേർക്കാം.

സ്റ്റൗവിൽ കൽച്ചട്ടി വയ്ക്കുമ്പോൾ നന്നായിശ്രദ്ധിയ്ക്കണം. എപ്പോഴും തീ കുറച്ചേ വയ്ക്കാവൂ. പിന്നെ നന്നായി തിളയ്ക്കുമ്പോൾ സ്റ്റൗ ഓഫ് ചെയ്യാം. അല്ലെങ്കിൽ ചിലപ്പോൾ തിളച്ചുമറിയാനിടയുണ്ട്. കൽച്ചട്ടിയുടെ ചൂടുകൊണ്ട് തീയിൽ നിന്നു മാറ്റിയാലും തിളയ്ക്കും. ഇനി മാറ്റി വെച്ചിരിക്കുന്ന മല്ലിയില കൂടി വിതറി ഉപയോഗിക്കാം. ചൂടോടെ തന്നെ കുടിക്കുന്നതാണ് ആരോഗ്യത്തിന് ഉത്തമം.

Healthy Indian soups for winter