ആ ചുവന്ന മുളകും ഉള്ളിയും കൂട്ടി ഒരു പിടി പിടിച്ചാൽ എന്‍റെ സാറേ..

ഒരു ഗംഭീര സദ്യകഴിച്ചാലോ അടിപൊളി 5 കോഴ്സ് ഡിന്നര്‍ കഴിച്ചാലോ കിട്ടാത്ത ആത്മസംതൃപ്തി നല്‍കുന്ന ഒരു വിഭവം പറയട്ടെ പഴങ്കഞ്ഞീം ചുവന്ന മുളകും ഉള്ളീം പുളീം ഞെരടിയതും. നല്ല തണുത്ത പഴങ്കഞ്ഞില്‍ ഇച്ചിരി പുളിയുള്ള തൈരൊഴിച്ച് നന്നായി ഇളക്കി ഈ ചമ്മന്തീം കൂട്ടി ഒരു പിടി പിടിച്ചാലുണ്ടല്ലോ.. വയറു മാത്രമല്ല, മനസ്സും നിറയും.

ചമ്മന്തി ചേരുവകള്‍

ചുവന്ന മുളക് (വറ്റൽ മുളക്) 8-10 എണ്ണം
ചെറിയ ചുവന്നുള്ളി തൊലി കളഞ്ഞത്- 10-13 എണ്ണം
വാളൻപുളി ചെറിയ നെല്ലിക്ക വലിപ്പത്തിൽ ഉരുട്ടിയത്
ഉപ്പ് പാകത്തിന്
വെളിച്ചെണ്ണ 2 ടേബിൾ സ്പൂൺ

ആദ്യമേ പറഞ്ഞേക്കാം, നല്ല എരിവിലുണ്ടാക്കിയാലേ ഇതിന് രുചി വരൂ. എരിവ് പറ്റാത്തവര്‍ പ്ലീസ് എക്സ്ക്യൂസ്.

ചുവന്ന മുളക് ചുട്ടെടുക്കുക. ചുട്ടെടുക്കാൻ കഴിഞ്ഞില്ലെങ്കിൽ ഫ്രൈ പാനിലോ ചിനച്ചട്ടിയിലോ ഇത്തിരി പോലും എണ്ണ ചേ‍ര്‍ക്കാതെ നന്നായി മൂപ്പിച്ചെടുക്കുക. ഉള്ളിയും ഇതേപോലെ എണ്ണയില്ലാതെ മൂപ്പിക്കുക. മുളകും ഉള്ളിയും ഞെരടി ചേ‍ക്കുകയാണ് അടുത്ത പടി. അമ്മിയിലോ ചെറിയ ഇടികല്ലിലോ ആണെങ്കില്‍ അത്യുത്തമം. അല്ലെങ്കിൽ മിക്സിയിൽ ചെറുതായി കറക്കി എടുക്കാം. പുളിയും ഉപ്പും ചേര്‍ത്താണ് ഒതുക്കി എടുക്കേണ്ടത്. ഏറ്റവും ഒടുവിലായി വെള്ളിച്ചെണ്ണയും ചേ‍ര്‍ക്കാം.

ഇനി റെഡിയായിക്കോ വയറു നിറയെ കഞ്ഞികുടിക്കാൻ.

PS: ഒരു കിണ്ണം ചോറുണ്ണാനും ഇത് തന്നെ മതി കേട്ടോ..