നിങ്ങളുടെ പങ്കാളി ഒരു സാഡിസ്റ്റ് ആണോ?

'സാഡിസം', 'സാഡിസ്റ്റ്', പുട്ടിന് പീര പോലെ ഒന്നു പറഞ്ഞ് രണ്ടാമത്തേതിന് ദമ്പതിമാര്‍ പരസ്പരം വിളിക്കാന് സാധ്യതയുള്ള ഒരു പേരാണിത്. എന്നാല്‍ യഥാര്‍ത്ഥത്തില്‍ എന്താണ് സാഡിസം? മറ്റുള്ളവരെ വേദനിപ്പിക്കുക വഴി (പലപ്പോഴും ലൈഗികമായി) സന്തോഷം കണ്ടെത്തുന്നവരാണ് സാഡിസ്റ്റുകള്‍. ഒന്നോ രണ്ടോ സംഭവങ്ങള്‍ മാത്രമല്ല, സ്ഥിരമായും തുടര്‍ച്ചയായും ഇത്തരത്തില്‍ മറ്റുള്ളവരെ വേദനിപ്പിക്കുകയും സ്വയം സന്തോഷം കണ്ടെത്തുകയും ചെയ്യും ഇവര്‍. ഇത് ഒരു മാനസികരോഗം തന്നെയാണ്. കുട്ടിക്കാലത്തുണ്ടായ അനിഷ്ട സംഭവങ്ങള്‍, ഇന്‍ഫീരിയോറിറ്റി കോംപ്ലക്സ്, ഇന്സെക്യൂരിറ്റി എന്നിവയടക്കം ധാരാളം കാരണങ്ങള്‍ സാഡിസത്തിനുണ്ടാവാം. ചിലപ്പോള്‍ പ്രത്യേകിച്ച് കാരണമൊന്നും ഇല്ലാതെ തന്നെ സാഡിസ്റ്റായെന്നും വരാം.

നിങ്ങളുടെ പങ്കാളിയില്‍ സാഡിസം ഉണ്ടോ എന്ന് തിരിച്ചറിയാന്‍ ഇവ നിങ്ങളെ സഹായിക്കും.

സഹാനുഭൂതിയും അനുകമ്പയും ഇല്ല:നിങ്ങളോടു മാത്രമല്ല, ചുറ്റുപാടുമുള്ള മറ്റുള്ളവരോടും സഹാനുഭൂതിയോ കരുണയെ അനുകമ്പയോ സഹതാപമോ ഇവര്‍ക്കുണ്ടാവില്ല. നിങ്ങളുടെ വികാരങ്ങളെയും പ്രശ്നങ്ങളെയും ദുഖങ്ങളെയും ഇവര്‍ക്ക് മനസ്സിലാക്കാന്‍ കഴിയില്ല. അതില്‍ തീരെ താത്പര്യം കാട്ടുകയുമില്ല.

കള്ളങ്ങളുടെ ചീട്ടു കൊട്ടാരം:ആവശ്യത്തിനും അനാവശ്യത്തിനും കള്ളം പറയുന്നവരാണിവര്‍. നിര്‍ദ്ദോഷകരമായ കള്ളങ്ങള് മാത്രമല്ല, ഇവരുടെ സ്വാര്‍ത്ഥലാഭത്തിനായി മറ്റുള്ളവര്‍ക്ക് നാശകരമാവുന്ന കള്ളങ്ങള്‍ പറയാനും ഇവര്‍ക്ക് യാതൊരു മടിയുമില്ല. എത്ര തവണ പിടിക്കപ്പെട്ടാലും വീണ്ടും വീണ്ടും കള്ളങ്ങള്‍ പറഞ്ഞു കൊണ്ടേയിരിക്കും.

ടൂ ഗുഡ് ടു ബിലീവ്:ആദ്യ കൂടിക്കാഴ്ച്ചയില്‍, പ്രണയത്തിലായിരുന്നപ്പോള്‍ ഇത്രയും നല്ല സ്വഭാവം ആരും കണ്ടിട്ടുണ്ടാവില്ല. നിങ്ങളെ ഇംപ്രസ്സ് ചെയ്തു എന്നു മാത്രമല്ല നിങ്ങളുടെ സുഹൃത്തുക്കളേയും വീട്ടുകാരേയും ബന്ധുക്കളേയും വരെ കൈയ്യിലെടുത്തവരാവും ഇവര്‍. എന്നാല്‍ വിവാഹശേഷം സ്വഭാവം പാടേ മാറിയിട്ടുണ്ടാവും. നിങ്ങളെക്കുറിച്ച് തീരെ കെയര്‍ ചെയ്യാത്ത ആറ്റിറ്റ്യൂഡ് ആവും പിന്നീട് പ്രകടിപ്പിക്കുക. കുട്ടികളോടു പോലും ശരിക്ക് പെരുമാറില്ല.

കുറ്റബോധവും മനസാക്ഷിയും ഇല്ല:സ്വാര്‍ത്ഥ ലാഭത്തിനായി മറ്റുള്ലവരെ ചവിട്ടിത്തേയ്ക്കുകയാണെന്നറിഞ്ഞിട്ടും അതില്‍ യാതൊരു പശ്ചാത്താപവും ഇവര്‍ കാണിക്കില്ല. അതൊന്നും ഒരു തെറ്റായി ഇവര്‍ക്ക് തോന്നുകയുമില്ല.

പരിഹാസങ്ങളും കുത്തുവാക്കുകളും:തമാശ എന്നാല്‍ ഇക്കൂട്ടര്‍ക്ക് വേദനിപ്പിക്കുകയും അപമാനിക്കുകയും ചെയ്യുന്ന തമാശകളാണ്. മറ്റുള്ളവരുടെ കുറവുകളെക്കുറിച്ചും കഴിവുകേടിനെക്കുറിച്ചും മാത്രമേ ഇക്കൂട്ടര്‍ തമാശകള്‍ ഉണ്ടാക്കൂ. കേള്‍ക്കുന്നവര്‍ക്ക് വേദനിച്ചാലും സ്വന്തം തമാശകൾ ഇവര്‍ വളരെ ആസ്വദിക്കുകയും ചെയ്യും.

കിടപ്പറയില്‍:സ്വന്തം സന്തോഷവും സംതൃപ്തിയും മാത്രമേ ഇക്കൂട്ടര്‍ കാര്യമാക്കൂ. പങ്കാളിയുടെ താത്പര്യങ്ങള്‍ക്കോ. എന്തിന് വേദനകള്‍ക്ക് പോലുമോ ഇവര്‍ ചെവികൊടുക്കില്ല. സെക്സിനു ശേഷം സംസാരിക്കാനോ സ്നേഹം പ്രകടിപ്പിക്കാനോ ഇവര്‍ തയ്യാറാവില്ല.

ആവര്‍ത്തിക്കുന്ന തെറ്റുകള്‍:ചെയ്യുന്നത് തെറ്റാണെന്നും അത് മറ്റുള്ളവരെ വേദനിപ്പിക്കുന്നുണ്ടെന്നും മനസ്സിലാക്കിയാലും അവര്‍ വീണ്ടും വീണ്ടും അതേ തെറ്റ് ആവര്‍ത്തിച്ചു കൊണ്ടേ ഇരിക്കും.

ഇവയെല്ലാം സാഡിസത്തിന്‍റെ ചില ലക്ഷണങ്ങള്‍ മാത്രമാണ്. ഇവയെല്ലാം പങ്കാളിയില്‍ കാണപ്പെടുന്നുണ്ടെങ്കില്‍ എത്രയും പെട്ടെന്ന് ഒരു മാനസികരോഗ വിദഗ്ധന്‍റെ അഭിപ്രായം തേടുന്നതാണ് നല്ലത്.