ആലപ്പുഴ: ഉദ്യോഗാർഥികളെ വലച്ച് പിഎസ്സി. ലോക്ക് ഡൗണിന് ശേഷം പിഎസ്സി വിവിധ തസ്തികകളിൽ നടത്തുന്ന പരീക്ഷയുടെ കൺഫർമേഷന് വേണ്ടി ഒരുക്കിയിരിക്കുന്ന സംവിധാനത്തിൽ വൺ ടൈം പാസ് വേഡ് ലഭിക്കാത്തതാണ് ഉദ്യോഗാർത്ഥികളെ കുഴക്കുന്നത്.
വിവിധ തസ്തികകളിലേക്ക് ഉള്ള പരീക്ഷയുടെ കൺഫർമേഷൻ നൽകുന്നതിന് മണിക്കൂറുകളാണ് ഉദ്യോഗാർഥികൾക്ക് ചിലവാകുന്നത്. പിഎസ്സി വിവിധ തസ്തികകളിൽ നടത്തുന്ന പരീക്ഷയുടെ കൺഫർമേഷന് വേണ്ടി ഒരുക്കിയിരിക്കുന്ന സംവിധാനത്തിൽ കൺഫോം നൗ എന്ന ബട്ടൺ അമർത്തിയശേഷം രജിസ്ട്രേഡ് മൊബൈൽ നമ്പറിലേക്കോ മെയിൽ ഐഡിയിലേക്കോ വൺടൈം പാസ്സ്വേർഡ് ലഭിക്കുമെന്നാണ് പിഎസ്സി നിർദേശിച്ചിരിക്കുന്നത്.
Also Read: എതിരില്ലാതെ സിപിഎം; യുഡിഎഫ്, എൻഡിഎ പത്രികകൾ തള്ളി
എന്നാൽ പല ഉദ്യോഗാർത്ഥികൾക്കും വൺ ടൈം പാസ് വേഡ് ലഭിച്ചിട്ടില്ല. ഇനി ലഭിച്ചാൽ തന്നെ ഏറെ നേരം പരിശ്രമിച്ചാൽ ഭാഗ്യമുണ്ടെങ്കിൽ ലഭിക്കുമെന്ന അവസ്ഥയാണ്. ഇനി ഭാഗ്യം കടാക്ഷിച്ചു എന്നിരുന്നാലും ഒടിപിയുമായി പിഎസ്സിയുടെ പ്രൊഫൈലിൽ എത്തുമ്പോഴേക്കും പ്രൊഫൈൽ ലോഗിൻ ടൈം അവസാനിച്ചിരിക്കും. പിന്നീട് വീണ്ടും ലോഗിൻ ചെയ്തു ലഭിച്ച ഒടിപി ടൈപ്പ് ചെയ്തു ചെയ്ത് വേണം പൂര്ത്തിയാക്കാന്. ഒന്നിലധികംം പരീക്ഷകളുടെ കൺഫർമേഷൻ നൽകേണ്ട ഉദ്യോഗാർത്ഥികൾ ഓരോ തവണയും ഇത്തരത്തിൽ ചെയ്യേണ്ട അവസ്ഥയാണ്.
രണ്ട് വിഭാഗമായാണ് കൺഫർമേഷൻ തീയതി ഉദ്യോഗാർത്ഥികൾക്ക് നൽകിയിട്ടുള്ളത്. ഒരു വിഭാഗത്തിന് ഈ മാസം 23 മുതൽ ഡിസംബർ 12 വരെയും, ഒരു വിഭാഗത്തിന് ഡിസംബർ നാലു മുതൽ 23 വരെയും ആണ് കൺഫർമേഷന് ഉള്ള സമയം നിശ്ചയിച്ചിരിക്കുന്നത്. എന്നാൽ വൺ ടൈം പാസ്വേർഡ് ലഭിക്കാത്തത് ഉദ്യോഗാർത്ഥികളെ ആശങ്കയിലാഴ്ത്തിയിരിക്കുകയാണ്. ഇതിനോടകം പിഎസ്സിയുടെ ഫേസ്ബുക്ക് പേജിലും ഒടിപി ലഭിക്കാത്തത് സംബന്ധിച്ച പരാതികൾ കമൻറുകൾ ആയി വന്നിട്ടുണ്ട്.
ആലപ്പുഴ ജില്ലയിൽ നിന്നുള്ള ഏറ്റവും പുതിയ നാട്ടുവാർത്തകൾക്കായി വാട്സ്ആപ്പ് ഗ്രൂപ്പ് ഫോളോ ചെയ്യൂ