ആലപ്പുഴയിൽ വീണ്ടും കൊവിഡ് മരണം; മരിച്ചത് റിട്ടയേർഡ് ഗ്രഫ് ഉദ്യോഗസ്ഥന്‍

ആലപ്പുഴ: ജില്ലയിൽ വീണ്ടും കൊവിഡ് മരണം. ക്വാറൻ്റൈനിൽ കഴിഞ്ഞു വന്ന റിട്ടയേർഡ് ഗ്രഫ് ഉദ്യോഗസ്ഥനായ കായംകുളം കൃഷ്ണപുരം കാപ്പിൽമേക്ക് ആതിരഭവനത്തിൽ മോഹനൻ ആണ് മരിച്ചത്. 60 വയസായിരുന്നു. ഇദ്ദേഹം കഴിഞ്ഞ മാസം ഇതര സംസ്ഥാനത്തുനിന്നും നാട്ടിലേക്ക് എത്തുകയും 28 ദിവസം ക്വാറൻ്റൈനിൽ കഴിയുകയും പരിശോധന ഫലം നെഗറ്റീവ് ആവുകയും ചെയ്തിരുന്നു.

Also Read: ആലപ്പുഴയില്‍ കര്‍ശന നിയന്ത്രണങ്ങള്‍; മാര്‍ഗരേഖ പുറത്തിറക്കി പോലീസ്‌

ക്വാറൻ്റൈൻ പൂർത്തിയാക്കിയ ശേഷം പനയന്നാര്‍കാവ് ക്ഷേത്രത്തിന് സമീപമുള്ള മുടിവെട്ട് കടയിലെ ജീവനക്കാരൻ മോഹനൻ്റെ വീട്ടിൽ മുടിവെട്ടുന്നതിനായി എത്തിയിരുന്നു. ഇതിന് ശേഷം മുടിവെട്ട് കടയിലെ ജീവനക്കാരന് കൊവിഡ് സ്ഥിരീകരിച്ചു. ഇതോടെ മോഹനൻ അടക്കം വീട്ടിലെ അംഗങ്ങള്‍ എല്ലാവരും ക്വാറൻ്റൈനിൽ കഴിയുകയായിരുന്നു. ഇതിന് ഇടയ്ക്കാണ് മോഹനന് നെഞ്ചിൽ അസ്വസ്ഥത അനുഭവപ്പെട്ടത്. ഹൃദയാഘാതം മൂലം മരിച്ചതാണെന്നായിരുന്നു പ്രാഥമിക നിഗമനം.

Also Read: കായംകുളത്തെ കെറ്റിഡിസിയുടെ ആരാം ഇനി മുതല്‍ ഹോട്ടല്‍ ആഹാര്‍; സവിശേഷതകളേറെ

അതേസമയം മറ്റ് രോഗങ്ങൾ ഇല്ലാത്തിരുന്ന മോഹനൻ കൊവിഡ് ലക്ഷണം പ്രകടിപ്പിച്ചിരുന്നെങ്കിലും ഇത് ആരോഗ്യപ്രവർത്തകരെ അറിയിച്ചിരുന്നില്ലെന്ന് ആരോഗ്യവിഭാഗം പറയുന്നു. എന്നാൽ ശനിയാഴ്ച നെഞ്ച് വേദനയും ശ്വാസതടസവും കൂടിയതോടെ മോഹനനെ സ്വകാര്യ ആംബുലന്‍സില്‍ കായംകുളം താലൂക്ക് ആശുപത്രിയില്‍ എത്തിച്ചെങ്കിലും മരണം സംഭവിക്കുകയായിരുന്നു. ഇതിന് ശേഷം നടത്തിയ കൊവിഡ് പരിശോധനയിലാണ് മോഹനന് രോഗം സ്ഥിരീകരിച്ചത്. ഭാര്യ: ഷീബ മകള്‍: ആതിര. മരുമകന്‍: സിജിന്‍. താലൂക്കാശുപത്രി മോര്‍ച്ചറിയില്‍ സൂക്ഷിച്ചിരിക്കുന്ന മൃതദേഹം കൊവിഡ് ഫലം വന്നതിനു ശേഷം സംസ്‌കരിക്കും.