വ്യാജ ജനന സര്‍ട്ടിഫിക്കറ്റ് കേസ്; ക്രമക്കേടുകള്‍ പുറത്ത്, ഒപി-ഐപി രേഖകള്‍ നിര്‍മിച്ചതും കൃത്രിമമായി

എറണാകുളം: കളമശ്ശേരി വ്യാജ ജനന സര്‍ട്ടിഫിക്കറ്റ് വിവാദത്തില്‍ വന്‍ ഗൂഡാലോചനയെന്ന് കണ്ടെത്തി. മെഡിക്കല്‍ കോളജിലെ ഡോക്ടേഴ്‌സ് അടക്കമുള്ള കൂടുതല്‍ ജീവനക്കാര്‍ക്ക് വ്യാജ രേഖ നിര്‍മിച്ചതില്‍ പങ്കുണ്ടോ എന്ന് അന്വേഷിക്കുകയാണ് പോലീസ്. ഇതിന്റെ ഭാഗമായി ഗൈനക്കോളജി വിഭാഗത്തിലെ ഡോക്ടര്‍മാരെയും ചോദ്യം ചെയ്‌തേക്കും.

കേവലം അഡ്മിനിസ്‌ട്രേറ്റീവ് അസിസ്റ്റന്റ് അനില്‍കുമാറില്‍ മാത്രം ഒതുങ്ങുന്നതല്ല കളമശേരി മെഡിക്കല്‍ കോളജിലെ വ്യാജ ജനന സര്‍ട്ടിഫിക്കറ്റ് നിര്‍മ്മാണമെന്നാണ് പുറത്തു വരുന്ന വിവരങ്ങള്‍ .ഒ പി – ഐ പി നമ്പരുകള്‍ കൃത്രിമമായി നിര്‍മ്മിച്ചതിന്റെ രേഖകള്‍ ട്വന്റിഫോറിന് ലഭിച്ചു. ജനുവരി 12നാണ് സുനിത എസ് എന്ന പേരില്‍ പ്രസവത്തിനായി 43 കാരിയെ ആശുപത്രിയില്‍ അഡ്മിറ്റ് ചെയ്തുവെന്ന് ജനന റിപ്പോര്‍ട്ടില്‍ പറയുന്നന്നത്. 31 ന് പ്രസവിച്ചെന്നും പെണ്‍കുഞ്ഞാണെന്നും റിപ്പോര്‍ട്ടിലുണ്ട്.

ഗൈനോക്കോളജി വിഭാഗത്തിലെ ഡോക്ടര്‍ ധന്യ പോള്‍ യുവതിയെ നോക്കിയെന്നാണ് രേഖ. ഇത് പ്രകാരമാണ് 31 ന് ജനന സര്‍ട്ടിഫിക്കറ്റിനായി അപേക്ഷ നല്‍കിയതും പിന്നീട് സര്‍ട്ടിഫിക്കറ്റ് കൈപ്പറ്റിയതും. കൂടുതല്‍ ജീവനക്കാര്‍ക്ക് സംഭവത്തില്‍ പങ്കുണ്ടെന്നാണ് പോലീസ് പറയുന്നത്. വ്യാജരേഖയില്‍ പേരുള്ള ഡോക്ടര്‍ ധന്യ പോളിനെ ചോദ്യം ചെയ്യാനാണ് തീരുമാനം. സംഭവത്തില്‍ ആശുപത്രി സൂപ്രണ്ടിന്റെ പങ്ക് അന്വേഷിക്കണമെന്നാവശ്യപ്പെട്ട് യൂത്ത് കോണ്‍ഗ്രസ് പ്രവര്‍ത്തകര്‍ നടത്തിയ കളമശേരി പോലീസ് സ്റ്റേഷന്‍ മാര്‍ച്ച് അക്രമാസക്തമായി. ബാരിക്കേഡ് തകര്‍ക്കാന്‍ ശ്രമിച്ച പ്രവര്‍ത്തകര്‍ക്ക് നേരെ പോലീസ് ജലപീരങ്കി പ്രയോഗിച്ചു.

ഖാദി സൗഭാഗ്യ ഷോറൂം പ്രവര്‍ത്തനമാരംഭിച്ചു

കേരള ഖാദി ഗ്രാമ വ്യവസായ ബോര്‍ഡിന്റെ ഏജന്‍സി ഭവന്‍ കാക്കനാട് സുരഭി നഗറില്‍ പ്രവര്‍ത്തനമാരംഭിച്ചു. ഷോറൂമിന്റെ ഉദ്ഘാടനം ജില്ലാ കളക്ടര്‍ ഡോ. രേണു രാജ് നിര്‍വഹിച്ചു. ഖാദി ഉത്പന്നങ്ങളെ എല്ലാവരും പ്രോത്സാഹിപ്പിക്കണമെന്ന് ജില്ലാ കളക്ടര്‍ പറഞ്ഞു. ആദ്യ വില്‍പ്പന തൃക്കാക്കര നഗരസഭ വൈസ് ചെയര്‍മാന്‍ ഇബ്രാഹിം കുട്ടിക്ക് നല്‍കി ജില്ലാ പഞ്ചായത്ത് വൈസ് പ്രസിഡന്റ് സനിത റഹിം നിര്‍വഹിച്ചു.

ജില്ലാ പഞ്ചായത്ത് പ്രസിഡന്റ് ഉല്ലാസ് തോമസ്, തൃക്കാക്കര നഗരസഭ ചെയര്‍പേഴ്‌സണ്‍ അജിത തങ്കപ്പന്‍, കൗണ്‍സിലര്‍മാരായ ഉണ്ണി കാക്കനാട്, വി.ഡി. സുരേഷ്, സി.സി. വിജു, ഖാദി ബോര്‍ഡ് സെക്രട്ടറി ഡോ. കെ.എ. രതീഷ്, പ്രൊജക്ട് ഓഫീസര്‍ പി.എ. അഷിത, ഖാദി സൗഭാഗ്യ മാനേജര്‍ രേഖ വിനീസ്, ഖാദി ബോര്‍ഡ് അംഗം കെ. ചന്ദ്രശേഖരന്‍, ഖാദി തൊഴിലാളി ക്ഷേമനിധി ബോര്‍ഡ് ചെയര്‍പേഴ്‌സണ്‍ സോണി കോമത്ത് തുടങ്ങിയവര്‍ പങ്കെടുത്തു.