ദുരിതാശ്വാസ നിധി കേസ്: ലോകായുക്ത ഉത്തരവിൽ ഇടപെടാൻ വിസമ്മതിച്ച് ഹൈക്കോടതി

കൊച്ചി: മുഖ്യമന്ത്രിയുടെ ദുരിതാശ്വാസ നിധി ദുർവിനിയോഗം ചെയ്തുവെന്ന കേസിലെ ലോകായുക്ത ഉത്തരവിൽ ഇടപെടാതെ ഹൈക്കോടതി. കേസ് ലോകായുക്ത ഫുൾ ബെഞ്ചിന് വിട്ടതിനെതിരെയായിരുന്നു ഹർജി. വിഷയത്തിൽ ഇടപെടാൻ കാരണം കാണുന്നില്ലെന്ന് ഹൈക്കോടതി വ്യക്തമാക്കി. ചീഫ് ജസ്റ്റിസ് എസ് വി ഭട്ടി അധ്യക്ഷനായ ബെഞ്ചിന്റേതാണ് നടപടി. ലോകായുക്ത ഉത്തരവിനെതിരെ പരാതിക്കാരനായ ആർ എസ് ശശികുമാറാണ് കോടതിയെ സമീപിച്ചത്. ജൂൺ ആറിനാണ് ലോകായുക്തയുടെ വിശാല ബെഞ്ച് കേസ് പരിഗണിക്കുന്നത്. കേസ് നിലനിൽക്കുമോ എന്ന കാര്യത്തിൽ തന്നെ രണ്ടഭിപ്രായമുണ്ടെന്ന് അടക്കം വ്യക്തമാക്കിയാണ് ലോകായുക്ത രണ്ടംഗ ബെഞ്ച് കേസ് മൂന്നംഗ ബെഞ്ചിന് വിട്ടത്. ഇതിനെതിരെയാണ് ആർ ശശികുമാർ ഹൈക്കോടതിയെ സമീപിച്ചത്.


അതേസമയം വാദം കേൾക്കാൻ കേസ്‌ ബുധനാഴ്ച്ചത്തേയ്ക്ക് മാറ്റിവെക്കുകയാണ് ചെയ്തതെന്ന് ഹർജിക്കാരൻ ആർ എസ് ശശികുമാർ പ്രതികരിച്ചു. നേരത്തെ ഫുൾ ബെഞ്ച് പരിഗണിച്ച വിഷയമാണ് വീണ്ടും ഫുൾ ബെഞ്ചിന് വിട്ടിരിക്കുന്നതെന്നും അദ്ദേഹം പറഞ്ഞു. കേസിൽ ജൂൺ ഏഴിനാണ് ഹൈക്കോടതി വിശദമായ വാദം കേൾക്കുക. ജൂൺ ആറിനു ലോകായുക്ത ഫുൾ ബെഞ്ച് പരിഗണിക്കും.

എറണാകുളം ജില്ലയിലെ മുഴുവൻ വാ‍ര്‍ത്തകളും ഒറ്റ ക്ലിക്കിൽ ഇവിടെ വായിക്കാം

Read Latest Local News and Malayalam News