കൊച്ചി: അഞ്ച് കോടിയുടെ മൺസൂൺ ബംബർ അടിച്ചത് പെരുമ്പാവൂർ കോടനാട് സ്വദേശിക്ക്. കുറിച്ചിലക്കോട് കിഴക്കാപ്പുറത്തുകുടി വീട്ടിൽ റെജിൻ കെ രവിയാണ് ആ ഭാഗ്യവാൻ. പെരുമ്പാവൂരിലെ ഓൾഡ് മൂവാറ്റുപുഴ റോഡിലെ പവർ ലിങ്ക് എന്ന സ്വകാര്യ സ്ഥാപനത്തിലെ ജീവനക്കാരനാണ് റെജിൻ. ഭാര്യയും ചെറിയ മകളും അടങ്ങുന്ന കൊച്ചുവീട്ടിലേക്കാണ് മഹാഭാഗ്യം വന്ന് ചേർന്നത്.
Also Read: കോലഞ്ചേരിയിൽ പീഡനത്തിനിരയായ വൃദ്ധയുടെ ആരോഗ്യനിലയിൽ പുരോഗതി; കിഡ്നിയുടെ പ്രവർത്തനം സാധാരണ നിലയിൽ
പെരുമ്പാവൂർ കുട്ടൻ പിള്ള കനി ഏജൻസിയിൽ നിന്നാണ് ലോട്ടറി എടുത്തത്. MD240331 എന്ന ടിക്കറ്റിനാണ് ഒന്നാം സമ്മാനം അടിച്ചത്. നറുക്കെടുപ്പ് ദിവസമാണ് റെജിൻ ലോട്ടറി എടുത്തത്. നറുക്കെടുപ്പ് ഫലം വന്നെങ്കിലും വിജയിയെ ആദ്യം തിരിച്ചറിഞ്ഞിരുന്നില്ല. സമാശ്വാസ വിജയികൾ എല്ലാവരും എത്തുകയും ചെയ്തു. യഥാർത്ഥ കോടീശ്വരനെ കാത്തിരിക്കുമ്പോഴാണ് റെജിൻ്റെ വരവ്. അടിച്ച ടിക്കറ്റ് റെജിനും ഭാര്യയും മകളും ചേർന്ന് പെരുമ്പാവൂരിലെ ബാങ്ക് ഓഫ് ഇന്ത്യ ശാഖയിൽ ഏൽപ്പിച്ചു.
Also Read: ഗൃഹനാഥയുമായി ഫോണിലൂടെ സൗഹൃദം... ഒടുവില് പണത്തിന് വേണ്ടി ഭീഷണി, വീട്ടില് കയറി മാല മോഷ്ടിച്ചു, പ്രതി അറസ്റ്റില്
സ്ഥിരമായി ലോട്ടറി എടുക്കുന്ന ആളല്ല താനെന്ന് റെജിൻ പറയുന്നു. ബംബർ ലോട്ടറികൾ മാത്രമാണ് എടുക്കാറുള്ളത്. വയ്യാത്ത ആരെങ്കിലും വന്നാൽ ചിലപ്പോൾ എടുക്കും. മുമ്പ് അയ്യായിരം രൂപ അടിച്ചിട്ടുണ്ട്. ലോട്ടറി അടിച്ചെന്നറിഞ്ഞപ്പോൾ ആദ്യം ഭാര്യയെ വിളിച്ചു പറഞ്ഞു. ലഭിക്കുന്ന പണം കൊണ്ട് വീടും സ്ഥലവും വാങ്ങണം. നിലവിലുള്ള ബാധ്യതകൾ തീർക്കണം. കുറച്ചധികം ആളുകൾക്ക് തൊഴിൽ നൽകാൻ കഴിയുന്ന ഒരു ബിസിനസ് തുടങ്ങണമെന്നാണ് ആഗ്രഹമെന്നും റെജിൻ പറയുന്നു.