കൊച്ചി: നിരവധി മാല മോഷണക്കേസിലൂടെ കുപ്രസിദ്ധനായിരുന്ന മോഷ്ടാവ് പിടിയില്. ചേരാനെല്ലൂർ വില്ലേജിലെ അമ്പലക്കടവിൽ പുതുവത്സലം വീട്ടിൽ ഉമേഷാണ് (38) അറസ്റ്റിലായത്. നോർത്ത് പറവൂർ പോലീസ് അറസ്റ്റ് ചെയ്ത പ്രതിക്കെതിരെ എറണാകുളം ജില്ലയിലെ വിവിധ സ്റ്റേഷനുകളിലായി നിരവധി കേസുകളുണ്ട്.
പറവൂർ നന്ത്യാട്ടുകുന്നത്ത് വൃദ്ധയെ ആക്രമിച്ച് സ്വർണ്ണ മാല കവർന്ന കേസ്സില് ഇയാള് ഒളിവിലായിരുന്നു. കഴിഞ്ഞ 26 ന് പൂഴവൂർ റോഡിൽ വച്ചായിരുന്നു ഇയാള് വൃദ്ധയെ ആക്രമിച്ച് മൂന്നേ മുക്കാൽ പവൻ തൂക്കം വരുന്ന സ്വർണ്ണമാല കവര്ന്നത്. തുടര്ന്ന് ആലുവ ഡെപ്യൂട്ടി സൂപ്രണ്ട് ജി.വേണുവിന്റെ നേതൃത്വത്തിലുളള സംഘം തെരച്ചില് ഊര്ജ്ജിതമാക്കിയിരുന്നു.
Also Read: എറണാകുളത്ത് 12 പേര്ക്ക് കൂടി കൊവിഡ്; 213 പേര് ചികിത്സയില്, സമൂഹവ്യാപനം ഇല്ലെന്ന് മന്ത്രി
നോർത്ത് പറവൂർ എസ്ഐ ഷോജോ വർഗ്ഗീസ്സ്, സബ് ഇൻസ്പെക്ടർമാരായ അരുൺദേവ്, ജോൺസൺ, അസിസ്റ്റന്റ് സബ് ഇൻസ്പെക്ടർ ബിജു പി ജെ, സിപിഒമാരായ റെജി, പ്രതീഷ് എന്നിവരടങ്ങുന്ന സംഘമാണ് പ്രതിയെ പിടികൂടിയത്. പ്രതിക്കെതിരെ ചേരാനെല്ലൂർ പോലീസ് സ്റ്റേഷനിൽ നാലു കേസ്സും വരാപ്പുഴ പോലീസ് സ്റ്റേഷനിൽ ഒരു കേസ്സും ബിനാനിപ്പുരം പോലീസ് സ്റ്റേഷനിൽ ഒരു കേസ്സും നിലവിലുണ്ട്. പ്രതിയെ കോടതിയിൽ ഹാജരാക്കി റിമാന്ഡ് ചെയ്തു.