സംസ്ഥാനത്ത് വീണ്ടും കൊവിഡ് മരണം; ഇന്നലെ മരിച്ചയാൾക്ക് രോഗം സ്ഥിരീകരിച്ചു

കൊച്ചി: സംസ്ഥാനത്ത് വീണ്ടും കൊവിഡ് മരണം. ഇന്നലെ എറണാകുളത്ത് ഹൃദയാഘാതം മൂലം മരിച്ച പുല്ലുവഴി സ്വദേശിക്കാണ് കൊവിഡ് സ്ഥിരീകരിച്ചത്. പൊന്നയംമ്പിള്ളിൽ പികെ ബാലകൃഷ്ണൻ (79) നായരാണ് മരിച്ചത്.

ബാലകൃഷ്ണന് എവിടെ നിന്നാണ് രോഗം ബാധിച്ചതെന്ന് വ്യക്തമല്ല. ആരോഗ്യവകുപ്പ് അധികൃതർ ഇദ്ദേഹവുമായി സമ്പർക്കമുള്ളവരുടെ പട്ടിക തയ്യാറാക്കി വരികയാണ്. ഇദ്ദേഹത്തിന്റെ മകൻ ആലുവ കെഎസ്ഇബി ഓഫിസിലാണ് ജോലി ചെയ്തിരുന്നതെന്നാണ് റിപ്പോർട്ടുകൾ വ്യക്തമാക്കുന്നത്.

Also Read: മരണപ്പെട്ട 82 ആരോഗ്യപ്രവർത്തകരിൽ 63 പേരുടെ കുടുംബത്തിനും കേന്ദ്രത്തിന്‍റെ ഇൻഷുറൻസ് തുകയെത്തിയില്ല

ബാലകൃഷ്ണന് കൊവിഡ് സ്ഥിരീകരിച്ചതോടെ സംസ്ഥാനത്തെ കൊവിഡ് മരണം 29 ആയി ഉയർന്നിരിക്കുകയാണ്. കൊവിഡ് മരണം സ്ഥിരീകരിച്ചതോടെ രായമംഗലം പഞ്ചായത്തിൽ അടിയന്തര യോഗം ചേര്‍ന്നു. ബാലകൃഷ്ണൻ ആദ്യം ചികിത്സ തേടിയ വളയന്‍ചിറങ്ങരയിലെ സ്വകാര്യ ക്ലിനിക് താത്ക്കാലികമായി അടച്ചിട്ടു.

സംസ്ഥാനത്ത് ഇന്നലെയും കൊവിഡ് മരണം സ്ഥിരീകരിച്ചിരുന്നു. തിരുവനന്തപുരം മാണിക്യവിളാകം സ്വദേശി സെയ്ഫുദീൻ (67) ആണ് ഇന്നലെ മരിച്ചത്. തിരുവനന്തപുരം മെഡിക്കല്‍ കോളേജ് ആശുപത്രിയിൽ ചികിത്സയിലായിരുന്നു ഇദ്ദേഹം. പ്രമേഹം ഉൾപ്പെടെയുള്ള വാർധക്യസഹജമായ അസുഖങ്ങൾ ഉണ്ടായിരുന്ന സെയ്‌ഫുദീൻ വെള്ളിയാഴ്‌ച രാവിലെയാണ് മരിച്ചത്.