'ശ്രീദേവി' മാത്രമല്ല, ഷാഫിയ്ക്ക് സഹായത്തിന് 'സജ്നമോളും' 'ശ്രീജ'യും; വ്യാജ അക്കൗണ്ടുകളുടെ എണ്ണം 3 ആയി

ശ്രീദേവി എന്ന വ്യാജ അക്കൗണ്ട് ഉപയോഗിച്ചാണ് ഷാഫി ഇലന്തൂരിലെ ഭഗവൽ സിങ്ങിനെയും ഭാര്യ ലൈലയെയും കുടുക്കുന്നത്. 2019 ലാണ് ശ്രീദേവി എന്ന അക്കൗണ്ട് വഴി ഭഗവൽ സിങ്ങിന് റിക്വസ്റ്റ് അയക്കുന്നത്. ദമ്പതികളുമായി അടുപ്പം കൂടിയ ഷാഫി ശ്രീദേവി എന്ന അക്കൗണ്ട് വഴി സിദ്ധനാണെന്നു സ്വയം പരിചയപ്പെടുത്തുകയായിരുന്നു. ബന്ധം ദൃഢമായതോടെ സിദ്ധൻ ചമഞ്ഞ് ഷാഫി ദമ്പതികളെ ഫോണിൽ ബന്ധപ്പെടുകയും പണം ആവശ്യപ്പെടുകയും ചെയ്തു.

കടം വാങ്ങിയ പണം ദമ്പതികൾ തിരിച്ചു ചോദിക്കുന്നത് ഒഴിവാക്കാനായാണ് സജ്നമോൾ, ശ്രീജ എന്നീ രണ്ടു അക്കൗണ്ടുകൾ ഷാഫി ഉപയോഗിച്ചിരുന്നത്. സിദ്ധൻ്റെ ഇടപെടലിലൂടെ കുടുംബ ഐശ്വര്യം ഉണ്ടായെന്നു സ്ത്രീകളുടെ പേരികളിലുള്ള വ്യാജ അക്കൗണ്ടുകളിലൂടെ ഭഗവൽ സിങ്ങിനെയും ലൈലയെയും ധരിപ്പിക്കുകയായിരുന്നു. കടം വാങ്ങിയ പണം ഭഗവൽ സിങ് തിരികെ ചോദിക്കുമ്പാഴാണ് ഇതു വഴിതിരിച്ചുവിടാനായി ഷാഫി ഇരു അക്കൗണ്ടുകളും ഉപയോഗിച്ചിരുന്നതെന്ന് പോലീസ് പറയുന്നു.

2021 നവംബർ 21 നാണ് വ്യാജ അക്കൗണ്ടുകളിലൂടെ നരബലിയെക്കുറിച്ചു ആദ്യമായി സംസാരിക്കുന്നത്. ഇക്കാര്യത്തിൽ ആറുമാസത്തോളം നീണ്ട ചർച്ച നടന്നു. മുഴുവൻ ചാറ്റുകളും പോലീസ് വീണ്ടെടുത്തു. നിലവിലെ പരിശോധനയിൽ വ്യാജ അക്കൗണ്ടുകളിലൂടെ ഭഗവൽ സിങ്ങിനെയും ലൈലയെയും മാത്രമാണ് ലക്ഷ്യമിട്ടിരുന്നതെന്നാണ് പോലീസ് വ്യക്തമാക്കുന്നത്. വിശദ പരിശോധനയ്ക്കു ശേഷം തെളിവുകൾ കോടതിയിൽ ഹാജരാക്കും.

അതിനിടെ, നരബലിക്കു വിധേയയാക്കിയ തമിഴ്നാട് സ്വദേശിനി പത്മത്തിൻ്റെ ഫോൺ പമ്പയാറിൽ വലിച്ചെറിഞ്ഞുവെന്ന് ഷാഫി മൊഴി നൽകിയിട്ടുണ്ട്. ഇതിൻ്റെ അടിസ്ഥാനത്തിൽ ഷാഫിയെ സ്ഥലത്തെത്തിച്ചു തെളിവെടുപ്പു നടത്തും. കൊലപാതകത്തിനു ഉപയോഗിച്ച ആയുധങ്ങളടക്കം വാങ്ങിയ കടകളിലും പ്രതികളെ എത്തിച്ചു തെളിവെടുപ്പ് നടത്തും.