പ്രൊഫ. എംകെ പ്രസാദ് അന്തരിച്ചു; അന്ത്യം കൊവിഡ് ബാധയെ തുടര്ന്ന്
പരിസ്ഥിതി പ്രവര്ത്തകനായ പ്രൊഫ. എംകെ പ്രസാദ് അന്തരിച്ചു. 89 വയസായിരുന്നു. കൊവിഡ് ബാധിച്ച് ചികിത്സയിലായിരുന്നു അദ്ദേഹം. രവിപുര ശ്മശാനത്തില് മൃതദേഹം സംസ്കരിക്കും. കേരളത്തിലെ പരിസ്ഥിതി സംരക്ഷണ പ്രസ്ഥാനങ്ങളുടെ തുടക്കക്കാരില് ഒരാളായിരുന്നു പ്രൊഫ. എംകെ പ്രസാദ്.
Lipi 17 Jan 2022, 10:28 am
ഹൈലൈറ്റ്:
- പ്രൊഫ. എംകെ പ്രസാദ് അന്തരിച്ചു
- പരിസ്ഥിതി പ്രവര്ത്തകനും പ്രഭാഷകനുമായിരുന്നു
- കൊവിഡ് ബാധിച്ച് ചികിത്സയിലായിരുന്നു
കൊച്ചി(Kochi): പ്രശസ്ത പരിസ്ഥിതി പ്രവർത്തകനും പ്രഭാഷകനുമായിരുന്ന പ്രൊഫ. എം കെ പ്രസാദ് അന്തരിച്ചു. 89 വയസ്സായിരുന്നു. കൊവിഡ് ബാധിതനായി കൊച്ചിയിലെ സ്വകാര്യആശുപത്രിയില് കഴിഞ്ഞ ഞായറാഴ്ച മുതല് ചികിത്സയിലായിരുന്നു. രാവിലെ 5.30ഓടെയാണ് അന്ത്യം സംഭവിച്ചത്. എറണാകുളം ഗിരിനഗറിലെ വീട്ടില് പത്ത് മിനിറ്റ് മാത്രം വച്ചതിന് ശേഷം രവിപുരം ശ്മശാനത്തില് ഉച്ചയ്ക്ക് മുമ്പായി സംസ്ക്കരിക്കും. പ്രകൃതി സംരക്ഷണത്തിന്റെയും സുസ്ഥിര വികസനത്തിന്റെയും അറിയപ്പെടുന്ന പ്രഭാഷകനും, പ്രകൃതി സ്നേഹിയുമായിരുന്നു. കേരളത്തിലെ പരിസ്ഥിതി സംരക്ഷണ പ്രസ്ഥാനങ്ങളുടെ തുടക്കക്കാരിൽ ഒരാളായിരുന്നു പ്രൊഫ. എം കെ പ്രസാദ്.
വേൾഡ് വൈഡ് ഫണ്ട് ഓഫ് നേച്ചറിലെ പ്രവർത്തനങ്ങൾ ഇതിന്റെ ഭാഗമായിരുന്നു. വയനാട്ടിലെ എംഎസ് സ്വാമിനാഥൻ റിസർച്ച് ഫൗണ്ടേഷനിലെ പ്രോഗ്രാം അഡ്വൈസറി കമ്മിറ്റി ചെയർപേഴ്സനായിരുന്നു. സംസ്ഥാന ആസൂത്രണ ബോര്ഡിന്റെ സീനിയര് കണ്സള്ട്ടന്റായിരുന്നു. 1992ല് റിയോ ഡി ജനീറോയില് നടന്ന ഭൗമ ഉച്ചകോടി, 1995ല് ബര്ലിനില് നടന്ന കാലാവസ്ഥാ വ്യതിയാന ഉച്ചകോടി, ഉള്പ്പെടെ ഒട്ടേറെ അന്താരാഷ്ട്ര പരിസ്ഥിതി സമ്മേളനങ്ങളില് പ്രതിനിധിയായിട്ടുണ്ട്. നാല് പുസ്തകങ്ങളും നൂറില്പ്പരം പോപ്പുലര് സയന്സ് ലേഖനങ്ങളും പ്രസിദ്ധീകരിച്ചു.
1933 ജനുവരി 24ന് എറണാകുളം ചെറായിയിലാണ് ജനനം. ബോട്ടണിയിൽ ബിരുദാനന്തര ബിരുദം നേടിയ അദ്ദേഹം 30 വര്ഷത്തോളം വിദ്യാഭ്യാസരംഗത്ത് ഉയർന്ന നിലകളിൽ പ്രവർത്തിച്ചു. ഭാര്യ ഷേര്ളി ചന്ദ്രന് മഹാരാജാസ് കോളേജ് മുന് പ്രിന്സിപ്പലാണ്. അമല്, അഞ്ജന എന്നിവരാണ് മക്കള്.
Topic: MK Prasad, MK Prasad obit, Ernakulam