കൊച്ചി( kochi): അന്യ സംസ്ഥാന തൊഴിലാളികള്‍ ചേരിതിരിഞ്ഞ് ഏറ്റുമുട്ടിയപ്പോള്‍ കിഴക്കമ്പലം സാക്ഷ്യംവഹിച്ചത് ഇതുവരെ കണ്ടിട്ടില്ലാത്ത സംഭവങ്ങള്‍ക്ക്. പോലീസുകാര്‍ക്കും നാട്ടുകാര്‍ക്കും നേരെ അന്യസംസ്ഥാന തൊഴിലാളികള്‍ തിരിഞ്ഞപ്പോള്‍ നാട് നടുങ്ങുകയായിരുന്നു. പരസ്പരം ഏറ്റുമുട്ടിയ അന്യസംസ്ഥാന തൊഴിലാളികള്‍ നാട്ടുകാര്‍ക്കും സംഘര്‍ഷം അറിഞ്ഞ് സ്ഥലത്തെത്തിയ പോലീസുകാര്‍ക്കും നേരെ ആക്രമണം അഴിച്ചുവിടുകയായിരുന്നു. പോലീസ് ജീപ്പടക്കം ഇവര്‍ അഗ്നിക്കിരയാക്കുകയായിരുന്നു. കുന്നത്തുനാട് പോലീസ് സ്‌റ്റേഷനിലെ ഇന്‍സ്‌പെക്ടര്‍ അടക്കം 5 പോലീസുകാര്‍ക്കാണ് പരുക്കേറ്റത്. പോലീസുകാര്‍ കോലഞ്ചേരി മെഡിക്കല്‍ കോളേജില്‍ ചികിത്സയിലാണ്.
ആക്രമണ ദൃശ്യങ്ങള്‍ ചിത്രീകരിക്കാന്‍ ശ്രമിച്ച നാട്ടുകാര്‍ക്ക് നേരെ ഇവര്‍ കല്ലെറിയുകയും മൊബൈല്‍ ഫോണുകള്‍ നശിപ്പിക്കാന്‍ ശ്രമിക്കുകയും ചെയ്തു. നാട്ടുകാര്‍ വിവരം അറിയിച്ചതിനെ തുടര്‍ന്ന് സ്ഥലത്തെത്തിയ പോലീസ് സംഘത്തെ ഇവര്‍ വളഞ്ഞിട്ട് ആക്രമിക്കുകയായിരുന്നു. എസ്‌ഐ ഉള്‍പ്പെടെയുള്ളവരുടെ തലയ്ക്ക് ഇവര്‍ കല്ലുകൊണ്ട് ഇടിപ്പിച്ച് പരുക്കേല്‍പ്പിച്ചു. പോലീസുകാരെ പുറത്തിറങ്ങാന്‍ അനുവദിക്കാതെ ഡോര്‍ ചവിട്ടിപ്പിടിച്ച ശേഷം വാഹനത്തിന് തീയിട്ടുവെന്നും റിപ്പോര്‍ട്ടുകളുണ്ട്. തുടര്‍ന്ന് ബലമായി ഡോര്‍ തുറന്ന് പോലീസ് വാഹനത്തില്‍ നിന്നും ഇറങ്ങി ഓടുകയായിരുന്നു. മറ്റ് സ്ഥലങ്ങളില്‍ നിന്നുള്‍പ്പെടെ കൂടുതല്‍ പോലീസുകാരെ എത്തിച്ചാണ് സ്ഥിതിഗതികള്‍ നിയന്ത്രണ വിധേയമാക്കിയത്. നൂറോളം അന്യസംസ്ഥാന തൊഴിലാളികളെ അറസ്റ്റ് ചെയ്ത് നീക്കി. അതേസമയം ഈ ക്യാമ്പിലെ തൊഴിലാളികള്‍ക്കെതിരെ നിരവധി പരാതികളാണ് നാട്ടുകാര്‍ ഉന്നയിക്കുന്നത്.
Topic: Kizhakkambalam, Migrant workers kizhakkambalam, kitex kizhakkambalam