ഇടുക്കിയിൽ മൃഗാശുപത്രി ജീവനക്കാരിക്ക് കൊവിഡ്, ഉറവിടം അവ്യക്തം! ജില്ലയിൽ 12 പേര്‍ക്ക് കൂടി രോഗം

ഇടുക്കി: ഇടുക്കി ജില്ലയില്‍ മൃഗാശുപത്രി ജീവനക്കാരി ഉള്‍പ്പെടെ 12 പേര്‍ക്ക് കൂടി കൊവിഡ്-19 സ്ഥിരീകരിച്ചതായി ജില്ലാ കളക്ടര്‍ അറിയിച്ചു. ഇന്ന് കൊവിഡ് സ്ഥിരീകരിച്ച കഞ്ഞിക്കുഴി സ്വദേശിനി തോപ്രാംകുടി മൃഗാശുപത്രി ജീവനക്കാരിയാണ്. ജൂലൈ എട്ടിനാണ് സ്രവ പരിശോധനയ്ക്ക് വിധേയായത്. ഉറവിടം വ്യക്തമല്ലെന്നും ആരോഗ്യ വകുപ്പ് അറിയിച്ചു.

Also Read: വരുമാനമില്ലാത്ത കൊവിഡ് കാലം! ഇരുട്ടടിയായി ഇന്ധനവില വർധനവും... ടാക്സി തൊഴിലാളികള്‍ ദുരിതത്തിൽ

കഴിഞ്ഞ ദിവസം കൊവിഡ് സ്ഥിരീകരിച്ച ആരോഗ്യ പ്രവര്‍ത്തകയുടെ ഉറവിടവും വ്യക്തമല്ലാത്ത സാഹചര്യത്തില്‍ ജില്ല അതീവ ജാഗ്രതയിലാണ്. ഇന്ന് അഞ്ചു വയസുള്ള പെണ്‍കുട്ടിക്കും ജില്ലയില്‍ കൊവിഡ് സ്ഥിരീകരിച്ചു. ജൂലൈ ആറിന് തമിഴ്‌നാട് നിന്നും വന്ന കൊവിഡ് രോഗികളുമായി സമ്പര്‍ക്കമാണ് രോഗകാരണം. ജൂലൈ എട്ടിനു സ്രവം പരിശോധനക്കെടുത്തു. കുട്ടി വീട്ടില്‍ നിരീക്ഷണത്തില്‍ ആയിരുന്നു.

Also Read: ആരോഗ്യ പ്രവര്‍ത്തകയ്ക്ക് കൊവിഡ്; കഞ്ഞിക്കുഴി പിഎച്ച്സി അടച്ചു: ഇടുക്കി ലോക്ക് ഡൗണിലേക്കോ?

ജൂലൈ അഞ്ചിന് ദുബായില്‍ നിന്നും കൊച്ചിയിലെത്തിയ ഇരട്ടയാര്‍ സ്വദേശി, ജൂണ്‍ 25 ന് ഷാര്‍ജയില്‍ നിന്നും കൊച്ചിയിലെത്തിയ വാഴത്തോപ്പ് സ്വദേശി ജൂണ്‍ 29ന് രാജസ്ഥാനില്‍ നിന്നും ട്രെയിന് എറണാകുളത്തെത്തിയ കാമാക്ഷി സ്വദേശിനി, ജൂണ്‍ 30 ന് ബെംഗളൂരുവിൽ നിന്നും വിമാനത്തില്‍ കൊച്ചിയില്‍ എത്തിയ മൂന്നാര്‍ സ്വദേശിനി എന്നിവരും രോഗം സ്ഥിരീകരിച്ചവരിൽ ഉൾപ്പെടുന്നു. ജൂണ്‍ 28 ന് ഡല്‍ഹിയില്‍ നിന്നും ട്രെയിന് എറണാകുളത്ത് എത്തിയ പടമുഖം സ്വദേശി, ബാംഗ്ലൂരില്‍ നിന്നും സുഹൃത്തുക്കള്‍ക്കൊപ്പം എത്തിയ മുട്ടം സ്വദേശി എന്നിവര്‍ക്കും ഇന്ന് രോഗം സ്ഥിരീകരിച്ചു.

Also Read: മാങ്കുളം മേഖലയില്‍ കാട്ടാന ശല്യം രൂക്ഷം: ഏക്കറുകണക്കിന് കൃഷിയിടങ്ങള്‍ നശിച്ചു

സുഹൃത്തുക്കളോടൊപ്പം കാറില്‍ ബെംഗളൂരുവിൽ നിന്നും എത്തിയ മുവാറ്റുപുഴ സ്വദേശിക്കും കൊവിഡ് ബാധിച്ചു. അന്യ സംസ്ഥാനങ്ങളില്‍ നിന്നെത്തിയ മറ്റ് മൂന്നുപേര്‍ക്ക് കൂടി കൊവിഡ് പോസിറ്റീവായി. ഉറവിടമറിയാത്ത കേസുകളുടെ പശ്ചാത്തലത്തില്‍ സാമൂഹ്യ വ്യാപനത്തിൻ്റെ ആദ്യഘട്ടത്തിലേക്കാണ് ഇടുക്കി കടക്കുന്നതെന്നാണ് പൊതുവേയുള്ള വിലയിരുത്തല്‍.