നടന്ന് നടന്ന് അരിക്കൊമ്പൻ; നാലു ദിവസം കൊണ്ട് സഞ്ചരിച്ചത് 40 കിലോമീറ്റർ; കേരളത്തിൽ തിരിച്ചെത്തി

ഇടുക്കി: തമിഴ്നാട് വനമേഖലയിലേക്ക് നീങ്ങിയ കാട്ടാന അരിക്കൊമ്പൻ കേരളത്തിലെ പെരിയാർ ടൈഗർ റിസർവ് വനമേഖലയിലേക്ക് തിരിച്ചെത്തി. വ്യാഴാഴ്ച രാത്രിയോടെ ആന തമിഴ്നാട് ഭാഗത്തുനിന്നു കേരളത്തിലേക്ക് കടന്നു. കൊമ്പൻ ജനവാസമേഖലയിലേക്ക് കടക്കാതിരിക്കാൻ കേരള, തമിഴ്നാട് വനം വകുപ്പുകൾ നിരീക്ഷണം തുടരുകയാണ്. കഴിഞ്ഞമാസം 29 നാണ് ചിന്നക്കനാലിലും പരിസരപ്രദേശങ്ങളിലും പേടിസ്വപ്നമായിരുന്ന അരിക്കൊമ്പനെ പിടികൂടി പെരിയാർ ടൈഗർ റിസർവിൻ്റെ ഭാഗമായ മേദകാനത്തിന് സമീപത്തെ സീനിയറോടയിൽ തുറന്നുവിട്ടത്. നാലു ദിവസംകൊണ്ടു അരിക്കൊമ്പൻ 40 കിലോമീറ്റർ സഞ്ചരിച്ചു. പെരിയാർ ടൈഗർ റിസർവിനോടു ചേർന്നുള്ള തമിഴ്നാട്ടിലെ മേഘമല വന്യജീവി സങ്കേതത്തിൽ വ്യാഴാഴ്ച അരിക്കൊമ്പനെ കണ്ടിരുന്നു. കൂടാതെ, തമിഴ്നാട്ടിലെ മണലാർ എസ്റ്റേറ്റിൻ്റെ അതിർത്തിവരെ അരിക്കൊമ്പൻ എത്തിയിരുന്നു. ആന തമിഴ്നാട്ടിലെ ജനവാസമേഖലയിലേക്ക് കടക്കാതിരിക്കാൻ മേഘമല റേഞ്ച് ഓഫീസറുടെ നേതൃത്വത്തിലുള്ള വനപാലക സംഘം നീരിക്ഷണം ശക്തമാക്കിയിരുന്നു.


എന്നാൽ വ്യാഴാഴ്ച രാത്രിയോടെ കേരളത്തിലെ പെരിയാർ ടൈഗർ റിസർവിൻ്റെ വനമേഖലയിലേക്ക് അരിക്കൊമ്പൻ കടന്നതായി വനം വകുപ്പിനു സിഗ്നൽ ലഭിച്ചു. പെരിയാർ ടൈഗർ റിസർവ് ഇടതൂർന്ന വനമേഖല ആയതിനാൽ ആനയുടെ കഴുത്തിൽ ഘടിപ്പിച്ചിരിക്കുന്ന റേഡിയോ കോളറിൽ നിന്നുള്ള സിഗ്നൽ ലഭിക്കാൻ തടസം നേരിട്ടേക്കുമെന്നു വനം വകുപ്പ് സൂചന നൽകിയിട്ടുണ്ട്. കഴിഞ്ഞദിവസം പുലർച്ചെയും അരിക്കൊമ്പനിൽനിന്നുള്ള സിഗ്നൽ തടസപ്പെട്ടിരുന്നു. പിന്നീട് രാത്രിയോടെ സിഗ്നൽ കിട്ടിത്തുടങ്ങി. തേക്കടിയിലെ നിരീക്ഷണകേന്ദ്രത്തിലാണ് അരികൊമ്പനിൽനിന്നുള്ള സിഗ്നൽ ലഭിക്കുന്നത്.

അരിക്കൊമ്പൻ വിലസിയത് ഇടതുകണ്ണിൻ്റെ കാഴ്ചയിൽ, വലതുകണ്ണിനു ഭാഗിക കാഴ്ച മാത്രം; തുമ്പിക്കൈയിൽ മുറിവ്
അതേസമയം പെരിയാർ വനത്തിനുള്ളിലെ മംഗളാദേവി ക്ഷേത്രത്തിൽ ഇന്ന് ഉത്സവമാണ്. കഴിഞ്ഞദിവസം മംഗളാദേവി മലനിരകൾക്കു സമീപത്തേക്ക് അരിക്കൊമ്പൻ എത്തിയിരുന്നു. ഉത്സവം പ്രമാണിച്ചു നിരവധി തീർഥാടകർ എത്തുന്ന സാഹചര്യത്തിൽ വനം വകുപ്പ് ഈ ഭാഗത്തും നിരീക്ഷണം ശക്തമാക്കിയിട്ടുണ്ട്. ആന എത്തിയാൽ പടക്കം പൊട്ടിച്ച് ഓടിക്കാനുള്ള സംഘത്തെ വനം വകുപ്പ് നിയോഗിച്ചിട്ടുണ്ട്.

ഇടുക്കി ജില്ലയിലെ മുഴുവൻ വാ‍ര്‍ത്തകളും ഒറ്റ ക്ലിക്കിൽ ഇവിടെ വായിക്കാം

Read Latest Local News and Malayalam News