എന്തിനാണ് കൊലപ്പെടുത്തിയതെന്ന് ഓർമയില്ല, പോലീസിന് മുന്നിൽ പൊട്ടിക്കരഞ്ഞ് ജോർജ്‌കുട്ടി; മരിച്ചത് ഉറ്റസുഹൃത്ത്

നെടുങ്കണ്ടം: മദ്യപാനത്തിനിടെയുണ്ടായ തർക്കത്തിനൊടുവിൽ വിമുക്ത ഭടൻ കൊല്ലപ്പെട്ട സംഭവത്തിൽ സുഹൃത്ത് അറസ്റ്റിൽ. കോടാലി കൊണ്ടുള്ള വെട്ടേറ്റാണ് തണ്ണിപ്പാറ ജാനകി മന്ദിരത്തിൽ രാമഭദ്രൻ (78) കഴിഞ്ഞ ദിവസം കൊല്ലപ്പെട്ടത്. രാമഭദ്രനെ കൊലപ്പെടുത്തിയ കേസിൽ സുഹൃത്ത് തെങ്ങുപള്ളി ജോർജ്‌കുട്ടി (61) ആണ് അറസ്റ്റിലായത്. മദ്യ ലഹരിയിൽ നടത്തിയ കൊലയാണെന്നാണ് പ്രാഥമിക വിലയിരുത്തൽ.

രാമഭദ്രനും ജോർജ്‌കുട്ടിയും അടുത്ത സുഹൃത്തുക്കളായിരുന്നു. ഇരുവരും ഒന്നിച്ച് മദ്യപിക്കുന്നതിനിടെ ജോർജ്‌കുട്ടിയുടെ വീട്ടിൽ വെച്ചാണ് കൊലപാതകം നടന്നത്. രാമഭദ്രന്‍റെ തലക്ക് പരിക്കേറ്റത് കൂടാതെ വാരിയെല്ലുകൾ പൊട്ടിയതായും കണ്ടെത്തിയിട്ടുണ്ട്. കഴിഞ്ഞ ശനിയാഴ്ച രാത്രിയാണ് കൊലപാതകം നടന്നത്. ഇരുവരും ഒന്നിച്ച് വാറ്റുചാരായം ഉണ്ടാക്കുകയും മദ്യപിക്കുകയും ചെയ്തിരുന്നു.

Also Read: അയല്‍ക്കാര്‍ തമ്മില്‍ തര്‍ക്കം; ഇടുക്കിയില്‍ 75കാരനെ കോടാലി കൊണ്ട് അടിച്ചുകൊന്നു

മദ്യലഹരിയിൽ ചെയ്തുപോയതാണെന്നും എന്തിനാണ് രാമഭദ്രനെ കൊലപ്പെടുത്തിയതെന്ന് ഓർമയില്ലെന്നും പറഞ്ഞ് അറസ്റ്റിലായ ജോർജ്‌കുട്ടി പൊട്ടിക്കരഞ്ഞു. ഇവർ തമ്മിൽ വ്യക്തിവൈരാഗ്യം ഒന്നുമില്ലെന്നാണ് പൊലീസിന് ലഭിച്ച സൂചന. രണ്ടു പേരും ഒന്നിച്ച് യാത്രകൾ നടത്തുകയും ചീട്ടുകളിക്കുകയും ചെയ്തിരുന്നു. ജോർജ്‌കുട്ടിയുടെ വീട്ടിൽ നിന്ന് കണ്ടെത്തിയ വാറ്റ് ചാരായം സൂക്ഷിച്ച കുപ്പിയിൽ രക്തക്കറ പുരണ്ടിട്ടുണ്ട്. ചീട്ടുകളി നടന്നുവെന്നതിനും പൊലീസിന് തെളിവ് ലഭിച്ചു.

ചീട്ടുകളിക്കിടെ ഇരുവരും തമ്മിൽ തർക്കമുണ്ടാകുകയും ജോർജ്‌കുട്ടിയുടെ തലക്ക് പരിക്കേൽക്കുകയും ചെയ്തതായും കണ്ടെത്തിയിട്ടുണ്ട്. തുടർന്ന് കോടാലി കൊണ്ട് ജോർജ്‌കുട്ടി രാമഭദ്രനെ വെട്ടിയ ശേഷം വാരിയെല്ല് ചവിട്ടി തകർത്തെന്നാണ് പ്രാഥമിക നിഗമനം. ലഭിച്ച തെളിവുകളുടെ അടിസ്ഥാനത്തിൽ പോലീസ് അന്വേഷണം ശക്തമാക്കിയിട്ടുണ്ട്.

Also Read: സ്റ്റുഡിയോയില്‍ പീഡന ശ്രമം; ഉടമ അറസ്റ്റില്‍
ഇടുക്കി ജില്ലയിൽ നിന്നുള്ള ഏറ്റവും പുതിയ നാട്ടുവാർത്തകൾക്കായി വാട്സ്ആപ്പ് ഗ്രൂപ്പ് ഫോളോ ചെയ്യൂ