കട്ടപ്പന: അർദ്ധരാത്രിയിൽ വീട്ടമ്മയുടെ മുഖത്ത് സ്പ്രേ ചെയ്ത് ആക്രമിച്ച് വീഴ്ത്തിയ ശേഷം സ്വർണ്ണമാല മോഷ്ടിച്ച് കടന്നു കളഞ്ഞു. മേട്ടുക്കുഴി മേച്ചേരിയിൽ തങ്കച്ചന്റെ ഭാര്യ മേരിക്കുട്ടി(63) യുടെ ഒന്നേകാൽ തൂക്കം വരുന്ന മാലയാണ് മോഷ്ടാവ് പൊട്ടിച്ച് കടന്ന് കളഞ്ഞത്. ഞായറാഴ്ച്ച രാത്രി 11.30ഓടെയാണ് സംഭവം. വീടിന് പുറത്തുള്ള ബാത്ത്റൂമിൽ പോകുന്നതിനായി പുറത്തിറങ്ങിയപ്പോഴാണ് അക്രമം ഉണ്ടായത്.
ശബ്ദം കേട്ട് തിരിഞ്ഞ് നോക്കുമ്പോൾ മുഖത്ത് സ്പ്രേ ചെയ്തു
തിരികെ കയറുമ്പോൾ വീടിന് സമീപത്ത് നിന്ന് ശബ്ദം കേട്ട് തിരിഞ്ഞു നോക്കിയപ്പോൾ മോഷ്ടാവ് മേരിക്കുട്ടിയുടെ മുഖത്തേയ്ക്ക് രൂക്ഷ ഗന്ധമുള്ള ദ്രാവകം സ്പ്രേ ചെയ്തു. പെട്ടെന്നുണ്ടായ നടുക്കം വിട്ടുമാറും മുൻപേ വീട്ടമ്മയുടെ കഴുത്തിൽ കുത്തിപ്പിടിച്ച് മാല പൊട്ടിച്ചെടുക്കാൻ ശ്രമിച്ചു. വയോധിക ഉറക്കെ നിലവിളിച്ച് പ്രതിരോധിക്കാൻ ശ്രമിച്ചെങ്കിലും ഇയാൾ ഇവരെ നിലത്ത് തള്ളി വീഴ്ത്തി തുടർന്ന് വീണ്ടും നടന്ന ബലപ്രയോഗത്തിൽ മോഷ്ടാവ് മാല പൊട്ടിച്ച് ഓടി മറയുകയായിരുന്നു. മേരിക്കുട്ടിയുടെ നിലവിളി കേട്ട് ഓടി കൂടിയ ആളുകൾ പ്രദേശത്താകെ പരിശോധന നടത്തിയെങ്കിലും മോഷ്ടാവിനെ കണ്ടെത്താനായില്ല.
Also Read: വന്ദേഭാരതിന്റെ ഏറ്റവും കുറഞ്ഞ ടിക്കറ്റ് നിരക്ക് 1400 രൂപ, 25ലെ യാത്ര തെരഞ്ഞെടുത്ത ആളുകളുമായി, ഷെഡ്യൂൾ ഇങ്ങനെ..
കഴുത്തിനും, കൈ മുട്ടിനും പരിക്കേറ്റു
വീട്ടുകാർ വിവരം അറിയിച്ചതിനെ തുടർന്ന് കട്ടപ്പന പോലീസ് രാത്രി തന്നെ സ്ഥലത്തെത്തി മൊഴിയെടുത്ത് അന്വേഷണം ആരംഭിച്ചു. മോഷ്ടാവിന്റെ ആക്രമണത്തിൽ മേരിക്കുട്ടിയുടെ കഴുത്തിനും കൈ മുട്ടിനും പരിക്കേറ്റു. സംഭവ സമയം ഭർത്താവ് തങ്കച്ചൻ വീട്ടിലുണ്ടായിരുന്നെങ്കിലും പക്ഷാഘാത സംബന്ധമായ ആരോഗ്യ പ്രശ്നങ്ങൾ ഉള്ളതിനാൽ പുറത്തേയ്ക്ക് ഇറങ്ങി വരാൻ കഴിഞ്ഞില്ല. മൂന്ന് മക്കളെയും വിവാഹം കഴിപ്പിച്ച് അയച്ചതിനാൽ തങ്കച്ചനും മേരിക്കുട്ടിയും തനിയെയാണ് കഴിയുന്നത്. പാന്റും ടീ ഷർട്ടുമായിരുന്നു മോഷ്ടാവിന്റെ വേഷം. മുഖം തുണി ഉപയോഗിച്ച് മറച്ചിരുന്നുവെന്ന് വീട്ടമ്മ പോലീസിന് മൊഴി നൽകി.
ഇടുക്കി ജില്ലയിലെ മുഴുവൻ വാ‍ര്‍ത്തകളും ഒറ്റ ക്ലിക്കിൽ ഇവിടെ വായിക്കാം
Read Latest Local News and Malayalam News