ഇടുക്കി(Idukki): ഭക്ഷണത്തിന് അമിത വില ഈടാക്കിയത് ചോദ്യം ചെയ്തതിന്റെ പേരില് വിനോദ സഞ്ചാരികളെ പൂട്ടിയിട്ട് ഹോട്ടല് ഉടമ. ഹോട്ടലിലെ ദോശയ്ക്കൊപ്പം നല്കിയ സാമ്പാറിന് നൂറ് രൂപ ഈടാക്കിയത് ചോദ്യം ചെയ്തതിനായിരുന്നു ഹോട്ടല് ഉടമയുടെ പ്രതികാരം. നെടുങ്കണ്ടം കോമ്പംമുക്കിലുള്ള ഒരു ഹോട്ടലിലാണ് സംഭവം നടന്നത്.
ഇതോടെ ഹോട്ടല് ഉടമയും വിനോദ സഞ്ചാരികളും തമ്മില് ബില്ലിനെച്ചൊല്ലി തര്ക്കം ഉടലെടുത്തു. ഇരുവരും തമ്മില് വാക്കേറ്റം ഉണ്ടായി. ഇതിനിടെ ആറംഗ സംഘത്തിലെ ഒരാള് സംഭവം മൊബൈല് ഫോണില് പകര്ത്താനും ശ്രമിച്ചു. തുടര്ന്ന് പ്രകോപിതനായ ഹോട്ടല് ഉടമ ഇവരെ മുറിക്കുള്ളില് പൂട്ടിയിടുകയായിരുന്നു. വിവരം അറിഞ്ഞ് സ്ഥലത്തെത്തിയ നെടുങ്കണ്ടം പോലീസാണ് വിനോദ സഞ്ചാരികളെ മുറി തുറന്ന് മോചിപ്പിച്ചത്. തുടര്ന്ന് പോലീസ് ഇടപെട്ട് പ്രശ്നം ഒത്തുതീര്പ്പാക്കി. ഹോട്ടല് ആന്ഡ് റെസ്റ്റോറന്റ് അസോസിയേഷന് ഭാരവാഹികളും ഹോംസ്റ്റേ റിസോര്ട്ട് അസോസിയേഷന് ഭാരവാഹികളും വിവരം അറിഞ്ഞ് സ്ഥലത്ത് എത്തിയിരുന്നു. ഒടുവില് ബില്ലിലെ പ്രശ്നം പരിഹരിച്ച ശേഷം വിനോദ സഞ്ചാരികള് ഹോട്ടല് വിടുകയായിരുന്നു.
Topic: 100 rupees for sambar, hotel owner locked tourists,Idukki news