കട്ടപ്പന: ഇടുക്കിക്കവല ബൈപ്പാസ് റോഡില് ഭവന നിര്മാണ ബോര്ഡിന്റെ ഉടമസ്ഥതയില് തരിശായിക്കിടക്കുന്ന രണ്ടേക്കര് ഭൂമി ഏറ്റെടുത്ത് പാര്ക്ക് നിര്മിക്കണമെന്ന ആവശ്യം ശക്തമാകുന്നു. മുന് എംഎല്എ വി റ്റി സെബാസ്റ്റ്യന്റെ പേരില് പാര്ക്ക് നിര്മിക്കണമെന്നതാണ് കാലങ്ങളായുള്ള ആവശ്യം. പലപ്പോഴായി മാറി വന്ന കട്ടപ്പന നഗരസഭാ ഭരണ സമിതി ഇക്കാര്യം പരിഗണിച്ചിരുന്നുവെങ്കിലും പിന്നീട് തടസവാദങ്ങളുടെ ഊരാക്കുടുക്കില് വീണ് പോകുകയായിരുന്നു.
കട്ടപ്പന നഗരത്തിലെ വിശ്രമ കേന്ദ്രത്തിന്റെ അഭാവം മന്ത്രി റോഷി അഗസ്റ്റിനെ അറിയിക്കുകയും ഇതുമായി ബന്ധപ്പെട്ട് നഗരസഭ കൗണ്സിലര് സോണിയ ജെയ്ബി നിവേദനം നല്കുകയും ചെയ്തു. നിലവിലെ സാഹചര്യത്തില് പൊതുജനങ്ങള്ക്ക് വിശ്രമിക്കുവാന് തക്കതായ ഒരു സംവിധാനവും കട്ടപ്പനയിലില്ല. നഗര മധ്യത്തിലെ പഴയ പഞ്ചായത്ത് മൈതാനി വിശ്രമ കേന്ദ്രമാക്കണമെന്ന് ആവശ്യം ഉയര്ന്നിരുന്നെങ്കിലും നഗരസഭ അനുകൂല നടപടി സ്വീകരിച്ചില്ല. മാത്രമല്ല ഇത് പാര്ക്കിങ്ങിനായി ലേലം ചെയ്ത് നല്കുകയും ചെയ്തിരുന്നു.