നെടുങ്കണ്ടം: കലാംസ് വേൾഡ് റെക്കോഡുമായി കൂട്ടാർ എസ്.എൻ.എൽ.പി. സ്കൂളിലെ നാലാം ക്ലാസുകാരി കാർത്തിക സജി. 10 മണിക്കൂർ 25 മിനിറ്റുകൊണ്ട് 500 ആശംസാ കാർഡുകൾ തയ്യാറാക്കി രാജ്യത്തെ വിവിധ മേഖലകളിലുള്ള പ്രമുഖർക്ക് അയച്ചുകൊടുത്താണ് കാർത്തിക റെക്കോഡ് കരസ്ഥമാക്കിയത്. മുംബൈ ആസ്ഥാനമായ സംഘടനയാണ് കലാംസ്.
കഴിഞ്ഞ ലോക്ഡൗൺ സമയത്താണ് ഓൺലൈനായി കാർത്തിക ചിത്രരചന പഠിച്ചത്. പിന്നീട് 500 ആശംസാ കാർഡുകൾ വരയ്ക്കാൻ അച്ഛന്റെ പിന്തുണയോടെ ശ്രമം ആരംഭിച്ചു. ഇതിനാണ് ഇപ്പോൾ റെക്കോഡ് ലഭിച്ചത്. ഇത്തരത്തിലുള്ള ആദ്യ റെക്കോഡ് കൂടിയാണ് കാർത്തികയുടേത്. യു.കെ.ജി. മുതൽ മയൂരനൃത്തം ഉൾപ്പെടെ വ്യത്യസ്ത മേഖലകളിൽ കഴിവുതെളിയിച്ചു കൊണ്ടിരിക്കുന്ന മിടുക്കിയാണ് കാർത്തിക.
കേരള സർക്കാർ ഇൻഫർമേഷൻ, പബ്ലിക് റിലേഷൻസ് വകുപ്പ്, ഹരിത കേരള മിഷൻ എന്നിവ സംയുക്തമായി സംഘടിപ്പിച്ച സ്നേഹപൂർവ്വം മുഖ്യമന്ത്രിക്ക് എന്ന പരിപാടിയിൽ സംസ്ഥാനതലത്തിൽ ഒന്നാംസ്ഥാനം നേടിയ കാർത്തിക് കൃഷ്ണയാണ് സഹോദരൻ. പിതാവ് സജി കർഷകനാണ്. സുമിതയാണ് അമ്മ.