മൂന്നാര്‍: ഇതൊരു രസമുള്ള കാഴ്ചയാണ്, ഒപ്പം കൊവിഡ് കാലത്ത്‌ സമൂഹിക അകലം എന്ന ആശത്തിന് ഏറെ ഊന്നല്‍ നല്‍കുന്നതുമാണ് ഈ കാഴ്ച്ച. മാട്ടുപെട്ടിയില്‍ നിന്നും ടോപ്പ് സ്റ്റേഷനിലേക്കുള്ള യാത്രയില്‍ കുണ്ടളയ്ക്കു സമീപമാണ് സാമൂഹിക അകലം പാലിച്ചിരിക്കുന്ന വാനരന്‍മാരെ കാണാനായത്. കൊവിഡ് ഭീതിയൊന്നും പക്ഷേ ഈ വാനരപടയുടെ മുഖത്തില്ല. കാഴ്ച കൗതുകമായത് കുരങ്ങുകള്‍ തമ്മില്‍ പരസ്പര അകലം പാലിച്ച് കുത്തിയിരിക്കുന്നത് ശ്രദ്ധയില്‍പ്പെട്ടതോടെയാണ്.
കുട്ടിക്കുരങ്ങന്‍ മുതല്‍ മുതര്‍ന്ന കുരങ്ങന്‍മാര്‍വരെ അകലം പാലിച്ച് റോഡിരികില്‍ കുത്തിയിരിക്കുന്നു. സാമൂഹിക അകലം തങ്ങള്‍ പാലിക്കുന്നുണ്ടെന്ന ഒരു മട്ടും ഭാവവും വാനരപ്പടയുടെ ഇരിപ്പിലുമുണ്ടായിരുന്നു.
സാധാരണ ആര്‍ത്തുല്ലസിച്ച് മരങ്ങളില്‍ ചാഞ്ചാടി നടക്കുന്നതാണ് കാണാനാവുക. എന്നാല്‍ ഈ വാനരക്കൂട്ടം അത്രയങ്ങ് ഉത്സാഹത്തിലായിരുന്നില്ല. മുതിര്‍ന്നു കുരങ്ങന്‍മാര്‍ നോക്കിയിരിക്കുമ്പോള്‍ കുട്ടിക്കുരങ്ങന്‍മാരാണ് അല്പമെങ്കിലും വികൃതി കാട്ടുന്നത്.
Also Read: അപ്രഖ്യാപിത ലോക്ക് ഡൗണില്‍ മൂന്നാര്‍ നിശ്ചലമായി... എങ്ങനെ സംഭവിച്ചുവെന്ന് ജനങ്ങൾ!
വാനരക്കൂട്ടത്തിന്റെ ഈ ഉത്സാഹക്കുറവിനും കൊവിഡ് തന്നെയാണ്‌ കാരണം. വിനോദ സഞ്ചാരികളുടെ വരവു കുറഞ്ഞതോടെയാണ് ഈ ഉത്സാഹ കുറവ്. വിനോദസഞ്ചാരികള്‍ എത്തിയിരുന്ന സമയത്ത് സഞ്ചാരികള്‍ നല്‍കുന്ന ഭക്ഷണങ്ങളു മറ്റും കഴിച്ച് സുഭിക്ഷമായി കഴിഞ്ഞു വരുന്നതിനിടയിലായിരുന്നു ലോക് ഡൗണ്‍ പ്രഖ്യാപനം. സഞ്ചാരികള്‍ വരാതായതോടെ ഈ വാനരകൂട്ടം വെട്ടിലായി. പൂട്ടിക്കിടന്ന കടകള്‍ തുരന്നു കയറി മോഷണം നടത്തി വയറു നിറച്ചിരുന്ന ഇവയെ പേടിച്ച് കടക്കാര്‍ സാധനങ്ങള്‍ കടകളില്‍ നിന്നും വീടുകളിലേക്ക് മാറ്റിയതോടെ വീണ്ടും വെട്ടിലായിരിക്കുകയാണ് ഈ വാനര്‍നമാര്‍. മഴക്കാലമായതോടെ കാടുകളില്‍ പഴങ്ങളും തീര്‍ന്നു തുടങ്ങിയതോടെ പലയിടങ്ങളിലേക്കും ചേക്കേറുകയാണ് ഈ കൂട്ടം. എക്കോ പോയിന്റില്‍ നിന്നും മാട്ടുപ്പെട്ടി ഭാഗത്തുള്ള കാടുകളിലേക്കാണ് വാനരകൂട്ടം ഇപ്പോള്‍ യാത്ര ചെയ്യുന്നത്‌.