കണ്ണൂരിൽ ജയിലിലും കൊവിഡ്; രണ്ട് തടവുകാർക്ക് ഉൾപ്പെടെ 10 പേർക്ക് കൂടി രോഗം, കടുത്ത നിയന്ത്രണം

കണ്ണൂർ: കണ്ണൂർ ജില്ലയെ ഞെട്ടിച്ചു കൊണ്ട് ജയിലിലും കൊവിഡ്. റിമാൻഡ് പ്രതികളായ രണ്ടു പേർക്ക് കൊവിഡ് സ്ഥിരീകരിച്ചതോടെ ഇവരുമായി പ്രാഥമിക സമ്പർക്കത്തിലേർപ്പെട്ട പോലീസുകാരും ജയിൽ അധികൃതരും ക്വാറന്റൈനിൽ പ്രവേശിച്ചിരിക്കുകയാണ്. കണ്ണപുരം, ചെറുപുഴ പോലിസ് അറസ്റ്റു ചെയ്ത രണ്ടു പേർക്കാണ് സ്രവ പരിശോധനയിൽ പോസറ്റീവ് വ്യക്തമായത്. ഇവരെ കണ്ണൂർ ഗവ.മെഡിക്കൽ കോളേജിലേക്ക് മാറ്റി.

Also Read: ഉത്രയെ കൊലപ്പെടുത്തിയത് എന്തിനെന്ന് വെളിപ്പെടുത്തി സൂരജ്; നടപ്പാക്കിയത് മൂന്ന് മാസത്തെ ആസൂത്രണം! ആദ്യം കടിപ്പിച്ചത് അണലിയെ കൊണ്ട് പിന്നീട് മൂർഖനെ കൊണ്ട്

ഇന്ന് കണ്ണൂരിൽ പത്തു പേർക്ക് കൂടി കൊവിഡ് സ്ഥിരീകരിച്ചു. കൊവിഡ് സമൂഹ വ്യാപനം തടയുന്നതിനായി കണ്ണൂർ ജില്ലയിൽ കടുത്ത നിയന്ത്രണങ്ങൾ കൊണ്ടുവരാൻ ജില്ലാ ഭരണകൂടം തീരുമാനിച്ചു. കണ്ണൂർ മാർക്കറ്റിൽ വൈകിട്ട് മൂന്നു മണി വരെ കടകൾ തുറന്ന് പ്രവർത്തിക്കാൻ അനുമതി നൽകുകയുള്ളൂ. വ്യാപാരി പ്രതിനിധികളുമായി നടത്തിയ ചർച്ചയെ തുടർന്നാണ് തീരുമാനം. കണ്ണൂര്‍ ജില്ലയിലെ പിണറായിയെ ഹോട്സ്പോട്ട് പട്ടികയിൽ ഉൾപ്പെടുത്തി.

Also Read: നാല് ദിവസം കൊണ്ട് 32 കൊവിഡ് കേസുകള്‍! സമൂഹ വ്യാപന ഭീതിയിൽ പാലക്കാട്, നിരോധനാജ്ഞ പ്രാബല്യത്തിൽ

അതേസമയം സംസ്ഥാനത്ത് രോഗം സ്ഥിരികരിച്ച് ചികിത്സയിലായിരുന്ന 12 പേരുടെ പരിശോധനാഫലം നെഗറ്റീവ് ആയിട്ടുണ്ട്. കാസര്‍കോട് ജില്ലയില്‍ നിന്നുള്ള 6 പേരുടെയും കൊല്ലം ജില്ലയില്‍ നിന്നുള്ള 2 പേരുടെയും എറണാകുളം, ഇടുക്കി, മലപ്പുറം, വയനാട് ജില്ലകളില്‍ നിന്നുള്ള ഒരാളുടെ വീതവും പരിശോധനാഫലമാണ് നെഗറ്റീവ് ആയത്. ഇതോടെ 359 പേരാണ് രോഗം സ്ഥിരീകരിച്ച് ചികിത്സയിലുള്ളത്. 532 പേര്‍ ഇതുവരെ കോവിഡില്‍ നിന്നും മുക്തി നേടി.