കണ്ണൂരിൽ വീണ്ടും കൊവിഡ് മരണം; മരിച്ചത് ആലക്കോട്, തളിപ്പറമ്പ് സ്വദേശികൾ

കണ്ണുർ: കൊവിഡ് മരണനിരക്ക് കുത്തനെ ഉയരുന്നത് കണ്ണൂരിനെ നടുക്കത്തിലാഴ്ത്തുന്നു. ശനിയാഴ്ച്ച പുലർച്ചെ കൊവിഡ് ബാധിച്ചു ചികിത്സയിലിരിക്കെ രണ്ടു പേരാണ് മരണമടഞ്ഞത്. ആലക്കോട് നടുവിൽ പാത്തൻപാറയിലെ പുതുവാക്കര സെബാസ്റ്റ്യൻ (59), തളിപ്പറമ്പ് പൂവത്തെ കൂവൻ ഇബ്രാഹിം (52) എന്നിവരാണ് മരിച്ചത്. ഇരുവരും പരിയാരത്തെ കണ്ണൂർ ഗവ. മെഡിക്കൽ കോളേജിൽ ചികിത്സയിലിരിക്കെയാണ് മരിച്ചത്.

Also Read: കൊവിഡ് ഫലം നെഗറ്റീവ്; മന്ത്രി ഇ പി ജയരാജൻ ആശുപത്രി വിട്ടു

കഴിഞ്ഞ ദിവസവും കണ്ണൂരില്‍ കൊവിഡ് ബാധിച്ചു രണ്ടുപേര്‍ മരിച്ചിരുന്നു. തലശേരിക്കടുത്തെ എടക്കാട് സ്വദേശി ഹംസ (75), തളിപ്പറമ്പ് സ്വദേശി സത്യന്‍ (53) എന്നിവരാണ് മരിച്ചത്. ഇവർ രണ്ടുപേരും കണ്ണൂർ ഗവ. മെഡിക്കല്‍ കോളജില്‍ ചികിത്സയിലായിരുന്നു. തളിപ്പറമ്പ് കപാലിക്കുളങ്ങര സ്വദേശിയായ സത്യന് ഇക്കഴിഞ്ഞ 16 നാണ് കൊവിഡ് സ്ഥിരീകരിച്ചത്. 53 കാരനായ സത്യന്‍ പ്രമേഹ രോഗി കൂടിയായിരുന്നു. പ്രമേഹം മൂര്‍ച്ഛിച്ചതിനെ തുടര്‍ന്നാണ് പരിയാരത്തെ കണ്ണൂര്‍ ഗവ. മെഡിക്കല്‍ കോളേജില്‍ പ്രവേശിപ്പിച്ചത്. ഇതു കൂടാതെ ഇദ്ദേഹത്തിന് ന്യൂമോണിയ ബാധയുമുണ്ടായിരുന്നു. വെള്ളിയാഴ്ച്ച പുലര്‍ച്ചെയാണ് മരണം സംഭവിച്ചത്.

Also Read: ഉമ്മൻ ചാണ്ടിയെ കല്ലെറിഞ്ഞ കേസ് പിൻവലിക്കാനുള്ള ഹർജി തള്ളി

കൊവിഡ് ബാധിതനായി മരണമടഞ്ഞ എടക്കാട് സ്വദേശിയായ ഹംസയ്ക്ക് 75 വയസായിരുന്നു. നാഡീ സംബന്ധമായ അസുഖങ്ങള്‍ക്കും കിഡ്നി രോഗങ്ങള്‍ക്കും ചികിത്സ തേടുകയായിരുന്നു. വാര്‍ധക്യസഹജമായ മറ്റ് രോഗങ്ങളുമുണ്ടായിരുന്ന ഹംസയെ ഇക്കഴിഞ്ഞ ഒൻപതിനാണ് കണ്ണൂര്‍ ഗവ. മെഡിക്കല്‍ കോളേജില്‍ പ്രവേശിപ്പിച്ചത്. കൊവിഡ് സ്ഥിരീകരിച്ചതിന് പിന്നാലെ ന്യൂമോണിയ ബാധയെ തുടര്‍ന്ന് ഗുരുതരാവസ്ഥയിലാവുകയായിരുന്നു.

Also Read: കണ്ണൂരിൽ കുതിച്ച് പ്രതിദിന കൊവിഡ് കേസുകൾ; 300 കടന്നു, 2000 ത്തിലധികം രോഗബാധിതർ

കണ്ണൂരിൽ മുപ്പതിലേറെപ്പേർ കൊവിഡ് ബാധിച്ചു മരിച്ചുവെന്നാണ് ഔദ്യോഗിക കണക്കുകൾ. ജില്ലയിലെ മിക്ക പ്രദേശങ്ങളും കൊവിഡിൻ്റെ പിടിയിലാണ്. വൈറസ് വ്യാപനത്തെ തുടർന്ന് കൊട്ടിയൂർ, കേളകം, കണിച്ചാർ, പയ്യന്നൂർ നഗരസഭ എന്നിവടങ്ങളിൽ സമ്പുർണ അടച്ചിടൽ പ്രഖ്യാപിച്ചു. ഇതിനിടെ കണ്ണൂർ ജില്ലയിൽ പോസറ്റീവ് കേസുകൾ മുന്നൂറ് കടന്നു. പുതുതായി 330 പേർക്ക് കൂടി കൊവിഡ് സ്ഥിരീകരിച്ചത്.


കണ്ണൂർ ജില്ലയിൽ നിന്നുള്ള ഏറ്റവും പുതിയ നാട്ടുവാർത്തകൾക്കായി വാട്സ്ആപ്പ് ഗ്രൂപ്പ് ഫോളോ ചെയ്യൂ