ബിജെപി സംസ്ഥാന സമിതിയംഗം എംകെ ശശീന്ദ്രൻ അന്തരിച്ചു

കണ്ണൂർ: കണ്ണൂർ ജില്ലയിലെ തല മുതിർന്ന നേതാവും ബിജെപി സംസ്ഥാന സമിതി അംഗവും മുൻ ജില്ലാ അദ്ധ്യക്ഷനുമായ കണ്ണൂർ നഗരത്തിനടുത്തെ വാരം സ്വദേശി അരവിന്ദം വീട്ടിൽ എം.കെ. ശശീന്ദ്രൻ മാസ്റ്റർ (69) അന്തരിച്ചു. വാരം യു പി സ്കൂൾ റിട്ടേർഡ് പ്രഥമാ ധ്യാപകനാണ് . ഭാര്യ : എൽ. രാധാമണി. മക്കൾ: ആസാദ് ശശീന്ദ്രൻ ,അരവിന്ദ് ശശീന്ദ്രൻ (ഇരുവരും ഗൾഫ്). മരുമക്കൾ: വന്ദന, അശ്വതി. പരേതനായ സി. പി . ഗോവിന്ദൻ നമ്പ്യാർ- ശ്രീദേവി അമ്മ ദമ്പതികളുടെ മകനാണ്.

Also Read: സൂരജിന്റെ കൂടുതല്‍ തട്ടിപ്പ് കഥകള്‍ പുറത്ത്; തുണയായത് ഉത്രയുടെ കുടുംബം

ചെറുപ്പകാലം മുതലേ സംഘ് പരിവാർ സംഘടനകളിൽ പ്രവർത്തിച്ചു തുടങ്ങിയ എം കെ ശശീന്ദ്രൻ മാസ്റ്റർ ജനസംഘത്തിന് ശേഷം രൂപീകരിച്ച ബിജെപിയിൽ ചേരുകയായിരുന്നു. കണ്ണൂർ ജില്ലയിൽ പാർട്ടി കെട്ടിപ്പെടുക്കാൻ കെജി മാരാർക്കൊപ്പം അക്ഷീണം പ്രയത്നിച്ച നേതാക്കളിലൊരാളായിരുന്നു. സംഘ് പരിവാർ സംഘടനകളും പാർട്ടിയും ഏറെ വെല്ലുവിളി നേരിട്ട കാലത്ത് സികെ പത്മനാഭൻ, പികെ കൃഷ്ണദാസ്, പിപി കരുണാകരൻ തുടങ്ങിയ നേതാക്കൾക്കൊപ്പം മുൻ നിരയിൽ പ്രവർത്തിച്ച നേതാക്കളിലൊരാളായിരുന്നു.

Also Read: അടിമാലി താലൂക്ക് ആശുപത്രിയിൽ എത്തുന്നവര്‍ക്ക് ഇനി കൈതൊടാതെ കൈകഴുകാം; സെന്‍സര്‍ ടാപ്പ് സംവിധാനമൊരുക്കി വിദ്യാര്‍ഥികള്‍

രണ്ടു തവണ ബി ജെ പി ജില്ലാ അധ്യക്ഷനായും ജില്ല ജനറൽ സെക്രട്ടറി ,സെക്രട്ടറി എന്നീ ചുമതലകൾ വഹിച്ചിട്ടുണ്ട്. കണ്ണൂർ ജില്ലയിലെ അധ്യാത്മിക മേഖലയിൽ സജീവ സാന്നിധ്യമായിരുന്നു ശശീന്ദ്രൻ മാസ്റ്റർ . ഏറെക്കാലമായി പാർട്ടി പ്രവർത്തനത്തിൽ സജീവമല്ലാതിരുന്ന അദ്ദേഹം കെ.സുരേന്ദ്രൻ സംസ്ഥാന പ്രസിഡന്റായ കാലയളവിലാണ് തിരിച്ചു വരുന്നത്. പിപി .കരുണാകരൻ മാസ്റ്റർക്കൊപ്പം പുതിയ സംസ്ഥാന സമിതിയിൽ അദ്ദേഹത്തിനും പാർട്ടി സ്ഥാനം നൽകുകയായിരുന്നു.എം.കെ ശശീന്ദ്രൻ മാസ്റ്ററുടെ വിയോഗത്തിൽ കേന്ദ്ര സഹമന്ത്രി വി മുരളിധരൻ, സംസ്ഥാന അധ്യക്ഷൻ കെ.സുരേന്ദ്രൻ, ദേശീയ നിർവാഹക സമിതിയംഗങ്ങളായ പികെ കൃഷ്ണദാസ്, സികെ പത്മനാഭൻ , സംസ്ഥാന ജനറൽ സെക്രട്ടറി കെ.രഞ്ചിത്ത്, ജില്ലാ പ്രസിഡന്‍റ് എൻ.ഹരിദാസൻ, സംസ്ഥാന ജനറൽ സെക്രട്ടറി സി.സദാനന്ദൻ, പി സത്യപ്രകാശ്, ബിജു എളക്കുഴി, കെ.കെ വിനോദ് കുമാർ.എം.കെ ദാമോദരൻ. അരുൺ കൈതപ്രം തുടങ്ങിയവർ അനുശോചിച്ചു.