ഫ്രീക്കനെ പിടികൂടി
കഴിഞ്ഞ ദിവസം അർധരാത്രി എടക്കാട് പോലിസ് സ്റ്റേഷൻ പരിധിയിലെ മുഴപ്പിലങ്ങാട് അസ്വാഭാവിക സാഹചര്യത്തിൽ കണ്ട ഒരു ഫ്രീക്കനെ നാട്ടുകാർ പിടികൂടി പോലിസിൽ ഏൽപ്പിച്ചിരുന്നു എന്നാൽ ഇയാൾക്ക് ബ്ളാക്ക്മാനുമായി ബന്ധമുണ്ടോയെന്നു പറയാൻ കഴിയില്ലെന്ന് പോലിസ് പറഞ്ഞു. യുവാവിനെതിരെ ഇതുവരെ കേസെടുത്തിട്ടില്ല. ഭുമി യുടെ പ്രതല നിരപ്പിൽ നിന്നും ഒഴുകി നടക്കുന്ന രൂപത്തിൽ കാണുന്ന പുതിയ ഒരു പ്രതിഭാസമാണ് സ്പ്രിങ് മാൻ. തലശേരിയിലെ ചില ഭാഗങ്ങൾ, മുഴപ്പിലങ്ങാട്, ധർമ്മടം, എടക്കാട് തുടങ്ങിയ സ്ഥലങ്ങളിൽ നിരവധി വീട്ടുകാർ സ്പ്രിങ് മാനെ കണ്ടതായി റിപ്പോർട്ടുണ്ട്.
തളിപ്പറമ്പ് മുതല്‍ പാപ്പിനിശേരി വരെ
ബ്ലാക്ക്മാനെപ്പോലെ രാത്രി കാലങ്ങളിൽ തന്നെയാണ് സ്പ്രിങ്മാന്‍ പ്രതിഭാസവും കണ്ടു വരുന്നത്. വീടുകളിലെ വാതിലിലും ജനാലയിലും മുട്ടി ഉറങ്ങിക്കിടക്കുന്നവരെ ഉണർത്തിയതിനു ശേഷം വായുവിലൂടെ ഒഴുകി പോകുന്നതു പോലെ രക്ഷപ്പെടുന്നതാണ് സ്പ്രിങ്മാന്‍റെ രീതി. വീട്ടിലെ പൂച്ചെടികൾ നശിപ്പിക്കുക, പക്ഷികളുടെ കൂട് തുറന്ന് വിടുക പൈപ്പ് തകർക്കുക, ബൾബുകൾ ഊരിമാറ്റുക തുടങ്ങിയ ഉപദ്രവങ്ങളും സ്പ്രിങ് മാൻ വരുത്തി വയ്ക്കുന്നുണ്ട്.ബ്ലാക്ക്മാനെന്ന പ്രതിഭാസത്തെ കൂടുതൽ കണ്ടുവരുന്നതായി പറയുന്നത് തളിപ്പറമ്പ് മുതൽ പാപ്പിനിശേരി വരെയുള്ള ഭാഗങ്ങളിലാണ് .
വാട്ആപ്പ് ഗ്രൂപ്പുകള്‍ നിരീക്ഷണത്തില്‍
പാപ്പിനിശേരി അരാളിയിൽ രാത്രി ടെറസിലെ ശബ്ദം കേട്ടു പോയി നോക്കിയ യുവാവിന്‍റെ കൈത്തണ്ടയിൽ ബ്ലാക്ക്മാന്‍ എന്നാരോപിക്കുന്നയാൾ കുത്തി പരുക്കേൽപ്പിച്ചതായി പറയുന്നു.ഇതിന്‍റെ ചിത്രം വാട്സ്ആപ്പിൽ പ്രചരിച്ചുകൊണ്ടിരിക്കെ വളപട്ടണം പോലിസ് അന്വേഷണം നടത്തി കേസെടുത്തുവെങ്കിലും പ്രതിയെ ഇതുവരെ പിടികൂടാൻ കഴിഞ്ഞിട്ടില്ല. ബ്ലാക്ക് മാൻ / സ്പ്രിങ് മാൻ ഭീതി ചിലർ ആസൂത്രിതമായി സൃഷ്ടിച്ചതാണെന്നാണ് പോലിസിന്റെ വാദം. അതു കൊണ്ടു തന്നെ സൈബർ പോലിസിന്റെ സഹായത്തോടെ അർധരാത്രിയ്ക്ക് ശേഷം ആക്ടീവാവുന്ന വാട്സ് ആപ്പ് ഗ്രൂപ്പുകളെ കേന്ദ്രീകരിച്ചാണ് ഇപ്പോൾ അന്വേഷണം നടക്കുന്നത്.